ނެޕިޑޯ (ޖޫން 17): މިޔަންމާގެ އަސްކަރިއްޔާއިން އެގައުމުގެ އަވަށެއް އެއްކޮށް އަންދާލާފައިވާ ކަމަށް އެ އަވަށުގައި ދިރިއުޅޭ މީހުން ބުނެފި އެވެ.
މިޔަންމާގެ ކިން މާ އަވަށުން ރޮއިޓާސް ނޫހާ ވާހަކަ ދެއްކި މީހުން ބުނި ގޮތުގައި ސިފައިން އެ އަވަށުގައި ރޯ ކުރީ އެގައުމުގެ އަސްކަރިއްޔާއިން މިދިޔަ ފެބްރުއަރީ މަހު ކުރި ބަޣާވާތާ ދެކޮޅަށް ތެދުވި ބަޔަކާ ކުރިމަތިލުމަށް ފަހު އެވެ. އަދި ކިން މާގެ 200 ވަރަކަށް ގެ މިހާރު އެއްކޮށް އަނދާ އަޅިއަށް ވެފައިވާ ކަމަށާއި ބާކީ ހުރީ އެންމެ 30 ވަރަކަށް ގެ ކަމަށް އަވަށުގެ ރައްޔިތުން ބުންޏެވެ.
ކިން މާގައި ރޯކުރި އަލިފާންގަނޑު ނާސާގެ ސެޓެލައިޓު ފަޔާ ޓްރެކިން ސިސްޓަމަށް އަރާ ވަރަށް ބޮޑު ކަމަށް އަލް ޖަޒީރާއިން ރިޕޯޓު ކުރި އެވެ. އަދި އަލިފާންގަނޑުން ސަލާމަތް ނުވި، އުމުރުން ދުވަސްވީ ދެ މީހަކު މަރުވި ކަމަށްވެސް ރިޕޯޓުތަކުގައިވެ އެވެ.
މިޔަންމާގެ ދައުލަތުގެ މީޑިއާއިން ބުނި ގޮތުގައި 800 ވަރަކަށް މީހުން ދިރިއުޅޭ ކިން މާގައި ރޯކުރީ ޓެރަރިސްޓުންތަކެކެވެ. އަދި އެ ވާހަކަ އެހެން ގޮތަކަށް ރިޕޯޓު ކުރާ މީޑިއާތަކަކީ "އަސްކަރިއްޔާގެ އަގު ވައްޓާލަން މަސައްކަތް ކުރާ" ބަޔެކެވެ.
މިޔަންމާގެ އަސްކަރިއްޔާއިން 2017 ވަނަ އަހަރުވެސް އަވަށްތަކެއްގައި ރޯކޮށް، އެއްކޮށް އަންދާލި ކަމަށް އިންސާނީ ހައްގުތަކަށް މަސައްކަތް ކުރާ ޖަމިއްޔާތަކުން ތުހުމަތު ކުރި އެވެ. އެއީ އޭރު ރޮހިންގާ ދަރިކޮޅުގެ ހަނގުރާމަވެރިންތަކެއް ހޯދުމަށް ކަމަށް ބުނެ ކުރިއަށް ގެންދިޔަ އޮޕަރޭޝަނެއްގަ އެވެ. އެދުވަސްތަކުގައި ސިފައިން ކުރަމުން ދިޔަ އަނިޔާތަކުގެ ސަބަބުން ރޮހިންގާ ދަރިކޮޅުގެ އެތައް ހާސް މީހުންނަށް ގައުމު ދޫކޮށް ދާން ޖެހުނެވެ.
މިޔަންމާގެ ކުރީގެ ލީޑަރު އަންގް ސަން ސޫޗީގެ ވެރިކަން ވައްޓާލުމަށް ފަހު އަސްކަރިއްޔާއިން ފެބްރުއަރީ މަހު ކުރި ބަޣާވާތާ ދެކޮޅަށް އެގައުމުގައި އަދިވެސް ދަނީ މުޒާހަރާތައް ބާއްވަމުންނެވެ. އަދި އެ ބަޣާވާތުގެ ފަހުން ސަލާމަތީ ފައުޖުތަކުން 865 މީހަކު މަރާފައިވާ ކަމަށް އިންސާނީ ހައްގުތަކަށް މަސައްކަތް ކުރާ ޖަމިއްޔާއެއް ކަމަށްވާ އެސިސްޓެންސް އެސޯސިއޭޝަން ފޯ ޕޮލިޓިކަލް ޕްރިޒަނާސްއިން ބުންޏެވެ.