މިދިޔަ ހުކުރު ދުވަހު މިޔަންމާއަށް އައި ބިންހެލުމުގެ ސަބަބުން އިމާރާތެއްގެ ދަށުގައި ތާށިވި މީހަކު ފަސް ދުވަސް ފަހުން ދިރިހުއްޓާ މިއަދު ސަލާމަތްކޮށްފިއެވެ.
މިޔަންމާގެ މެދުތެރޭގެ ސާގިން ސިޓީގެ ހުޅަނގު އުތުރުން ހުކުރު ދުވަހު މެންދުރު ފަހު ބިންހެލުން އައީ ބިމުގެ ތިލަ ހިސާބަކަށް، 7.7 މެގްނިޓިއުޑްގެ ބާރު މިނުގައެވެ. އޭގެ މަދު މިނެޓްކޮޅެއް ފަހުން 6.4 މެގްނިޓިއުޑްގެ އާފްޓާޝޮކެއް ވެސް އައިސްފައިވެއެވެ. އެ ހާދިސާގައި މިހާތަނަށް 2700 އަށްވުރެ ގިނަ މީހުން މަރުވެ، އެތައް ބައެއްގެ ގެދޮރު ވަނީ ގެއްލިފައެވެ.
އިމާރާތެއްގެ ދަށުވިތާ ފަސް ދުވަސް ފަހުން ދިރިހުއްޓާ ފެނުނީ އުމުރުން 26 އަހަރުގެ މީހެކެވެ. އޭނާ ފެނުނީ މިޔަންމާގެ ވެރިރަށް ނައިޕީޑަވްގެ ސުންނާފަތިވެފައިވާ ހޮޓަލެއްގެ ދަށުންނެވެ.
އެމީހާއަކީ އެ ހޮޓަލުގައި މަސައްކަތްކުރާ މީހެކެވެ. އެމީހާ ފެނުނީ މިޔަންމާ އާއި ތުރުކީވިލާތުގެ ޖޮއިންޓް ޓީމަކުން ކުރި މަސައްކަތުންނެވެ.
އަސްކަރީ ވެރިކަމެއް އޮންނަ މިޔަންމާގެ ވެރިޔާ މިން އަންގް ހިއިންގް އަންގާރަ ދުވަހު ވިދާޅުވީ މަރުވި މީހުންގެ އަދަދު 2،719އަށް އަރާފައިވާއިރު، 4،500 އަށް ވުރެ ގިނަ މީހުން ޒަޚަމްވެފައިވާ ކަމަށެވެ. އިތުރު 441 މީހުން ވީނުވީއެއް ނޭނގި ގެއްލިފައިވާ ކަމަށް ހިއިންގް ވިދާޅުވިއެވެ. ނަމަވެސް މި އަދަދުތައް އިތުރުވާނެ ކަމަށް ބެލެވޭ ކަމަށް އޭނާ ވިދާޅުވިއެވެ.
އިމާރާތްތަކުގެ ދަށުގައި ތާށިވި މީހުން ސަލާމަތްކުރުމުގެ މަސައްކަތް ޓީމުތަކުން ކުރަނީ. ފޮޓޯ/އީޕީއޭ
ރިލީފް ގްރޫޕްތަކާ ހަވާލާދީ ރޮއިޓާސްއިން ބުނާ ގޮތުގައި 2021ވަނަ އަހަރު ބަޣާވާތަކުން ވެރިކަން ހޯދި ޖަންޓާގެ ވެރިކަމާ ދެކޮޅަށް ހަތިޔާރު އެޅި ޖަމާއަތްތަކުން ދޭ ހަމަލާތަކުގެ ސަބަބުން މިއަންމާގައި ގެއްލިފައިވާ އެހީ ފޯރުކޮށްދިނުމާއި މީހުން ހޯދުމަށްވެސް ވަނީ ހުރަސްއެޅިފައެވެ.
އދ. އިން މިޔަންމާއަށް ކަނޑައަޅާފައި ހުންނަ ޚާއްސަ މަންދޫބު ޖޫލީ ބިޝޮޕް ވަނީ ހުރިހާ ފަރާތަކުން ވެސް އާންމުންގެ ހިމާޔަތާއި ފުރާނަ ސަލާމަތް ކުރުމަށް އެހީތެރިކަން ފޯރުކޮށްދިނުމަށް މަސައްކަތް ކުރުމަށް ގޮވާލައްވާފައެވެ.
ހުކުރު ދުވަހު އައި ބިންހެލުމުގެ ކުރިންވެސް ހަނގުރާމައިގެ ސަބަބުން 3.5 މިލިއަން މީހުން ގެދޮރު ގެއްލިފައިވާއިރު، އޭގެ ތެރެއިން ގިނަ މީހުންނަށް ބަނޑުހައިހޫނުކަމުގެ ނުރައްކާ އޮތް ކަމަށް އދ. އިން ބުނެއެވެ.
ބިންހެލުމުގެ ހާދިސާގައި ތައިލޭންޑުގެ ވެރިރަށް ބެންކޮކުން މިހާތަނަށް 22 މީހުން މަރުވެފައިވާކަން ކަށަވަރުކޮށްދީފައިވާއިރު، 70 އަށްވުރެ ގިނަ މީހުން އިމާރާތްތަކުގެ ދަށުގައި ތާށިވެފައިވާ ކަމަށް ބެލެވޭ ކަމަށް ކަމާބެހޭ ފަރާތްތަކުން ހާމަކުރެއެވެ.
މިޔަންމާއަށް އައި ބިންހެލުމުގެ އަސަރު ތައިލެންޑްގެ އިތުރުން އިންޑިއާ، ބަންގްލަދޭޝް، ލާއޮސް އަދި ޗައިނާއަށް ވެސް ކޮށްފައިވެއެވެ. ނަމަވެސް، އެ ގައުމުތަކަށް މާ ބޮޑު ގެއްލުންތަކެއް ލިބިފައެއް ނުވެއެވެ.