ނެޕިޑާއޮ (1 އެޕްރީލް 2025): މިޔަންމާއަށް އައި ބާރުގަދަ ބިންހެލުމުގައި މިހާތަނަށް މަރުވި މީހުންގެ ޖުމުލަ އަދަދު 2719 އަށް އަރައިފިއެވެ.
މި ބިންހެލުމުގެ އަސަރު އެންމެ ބޮޑަށް ކުރި ދެ ގައުމު ކަމަށްވާ މިޔަންމާއާއި ތައިލެންޑްގެ ރަސްމީ ފަރާތްތަކާ ހަވާލާދީ ޗައިނާގެ ރަސްމީ ޓީވީ ބުނާގޮތުން ބިންހެލުމުގެ ސަބަބުން ތައިލެންޑުން މަރުވިކަން މިހާތަނަށް އެނގިފައިވަނީ ގާތްގަނޑަކަށް 100 މީހުންނެވެ. އެ ނޫން މީހުން މަރުވެފައިވަނީ ބިންހެލުން އައި ގައުމު ކަމަށްވާ މިޔަންމާއިންނެވެ.
ތައިލެންޑުގެ ސަރުކާރު ބުނާގޮތުން ބިންހެލުމުގެ ސަބަބުން އެ ގައުމުންވަނީ ހަދަމުން ދިޔަ 30 ބުރީގެ އިމާރާތެއް ވެއްޓި ބިމާ ހަމަވެފައެވެ. އެ އިމާރާތުގެ ބައިތަކުގެ ދަށުން މިހާތަނަށްވަނީ މަރުވެފައިވާ 19 މީހެއްގެ ހަށިތައް ނަގާފައެވެ. ނަމަވެސް، އަދި އިތުރު 75 މީހަކު އެ އިމާރާތުގެ ބައިތަކުގެ ދަށުގައިވާ ކަމަށް ވަނީ ބެލެވިފައެވެ.
އެ މީހުންގެ ހާލަތާމެދު ބެލެވެނީ އޭގެ ތެރެއިން އެއް ބަޔަކު މަރުވުން އެކަށީގެންވާ ކަމަށާއި ނަމަވެސް ދިރިތިބި މީހުން ވުން އެކަށީގެންވާ ކަމުގައެވެ. ވެއްޓިފައިވާ އެ އިމާރާތުގެ ބައިތައް ނެގުމުގެ މަސައްކަތް އަދިވެސް އަންނަނީ ކުރަމުންނެވެ.
މި ބިންހެލުމުގައި މިޔަންމާއިން މިހާތަނަށް 2600 އަށް ވުރެގިނަ މީހުން މަރުވެ 3900 އަށް ވުރެ ގިނަ މީހުން ޒަޚަމުވިކަންވަނީ ކަށަވަރުވެފައެވެ. މިޔަންމާއިން އިއްޔެ ބުނެފައިވަނީ ބިންހެލުމުގައި މަރުވިމީހުންގެ އަދަދު 2000 އަށް ވުރެ މައްޗަށް ގޮސްފައިވާ ކަމަށާއި މި އަދަދު 10،000 އަށް އެރުން އެކަށީގެންވާ ކަމުގައެވެ.
މިދިޔަ ހުކުރު ދުވަހު މިޔަންމާގެ މެދުތެރެއަށް އައި ބިންހެލުމަކީ ރެކްޓަރު މިންގަނޑުން 7.7 ގެ ބާރުމިނުގައި އައި ބިންހެލުމެކެވެ. މި ބިންހެލުމުގެ އަސަރު އެންމެ ބޮޑަށް ކޮށްފައިވަނީ އެ ގައުމަށެވެ. ނަމަވެސް، އަވައްޓެރި ތައިލެންޑްގެ ބައެއް ސަރަހައްދުތަކަށް ވެސް މި ބިންހެލުމުގެ އަސަރު ވަރަށް ބޮޑަށް ކޮށްފައިވެއެވެ. މީގެ ތެރޭގައި ތައިލެންޑްގެ ވެރިރަށް ބެންކޮކް ހިމެނެއެވެ.
މި ބިންހެލުމުގައި ތައިލެންޑްގެ އިމާރާތްތެއް ވެއްޓި ގިނަ އިމާރަތްތަކެއްގައި ރެދުލުން ފަދަ ގެއްލުންތައް ލިބިފައިވާކަން އެ ގައުމުންވަނީ ހާމަކޮށްފައެވެ.
ރެކްޓަރު މިންގަނޑުން 7.7 ގެ ބާރުމިނުގައި އައި ބިންހެލުމަށް ފަހު ވެސް މިޔަންމާއަށް އިތުރު ހައެއްކަ ބިންހެލުން އައިސްފައިވެއެވެ. މިއީ ބިންހެލުންކަމަށް ބެލެވުނު ނަމަވެސް މިއީ ބޮޑު ބިންހެލުމަށް ފަހު ބިންގަނޑު އަލުން ހަމަޖެހުމަށްޓަކައި އައި ބޮޑެތި ލޮޅުންތަކެއް ކަމަށް އެމެރިކާގެ ޖިއޮލޮޖިކަލް ސާވޭއާ ބެހޭ ދިރާސާ މަރުކަޒުން ބުނެފައިވެއެވެ.
މި ލޮޅުންތަކުގެ ބާރުމިން އުޅެނީ ރެކްޓަރު މިންގަނޑުން ފަހަކަށް ވުރެ ދަށުގައެވެ. އެހެންކަމުން މި ލޮޅުންތަކުގެ އަސަރު އަވައްޓެރި ތައިލެންޑަށް ކޮށްފައިނުވާ ކަމަށް އެ ގައުމުން ބުނެފައިވެއެވެ.
މިޔަންމާއަށް އައި ބިންހެލުމުގެ އަސަރު ތައިލެންޑްގެ އިތުރުން އިންޑިއާ، ބަންގްލަދޭޝް، ލާއޮސް އަދި ޗައިނާއަށް ވެސް ކޮށްފައިވެއެވެ. ނަމަވެސް، އެ ގައުމުތަކަށް މާ ބޮޑު ގެއްލުންތަކެއް ލިބިފައެއް ނުވެއެވެ.