ސަރުކާރުގައި މަސައްކަތްކުރާ މުވައްޒަފުންނަށް މި އަހަރުގެ ރަމަޟާން މަހުގެ އެލަވެންސް މިމަހުގެ އަށްވަނަ ދުވަހު ދޫކުރާނެކަމަށް ފިނޭންސް މިނިސްޓްރީ އިން ބުނެފި އެވެ.
ފިނޭންސް މިނިސްޓަރު އިބްރާހިމް އަމީރު ސޮއިކުރައްވާ ނެރުއްވި ސާކިޔުލާގައި ބުނީ ރަމަޟާން މަހުގެ އިނާޔަތުގެ ގޮތުގައި ކޮންމެ މުވައްޒަފަކަށް ވެސް 3،000 ރުފިޔާ ދޭނެ ކަމަށާއި މުސާރަ ލިބޭގޮތަށް އެއް ވަޒީފާއަށް ވުރެ ގިނަ ވަޒީފާ އަދާކުރާ މުވައްޒަފުންނަށް އިނާޔަތުގެ
ފައިސާ ދޭ އިރު، އިނާޔަތް ދޭނީ ހަމައެކަނި އެ މުވައްޒަފެއްގެ އަސާސީ ވަޒީފާ އޮންނަ އޮފީހަކުން ކަމަށެވެ.
އިނާޔަތުގެ ފައިސާ ދީފައިވާ މުވައްޒަފަކު، ރަމަޟާން މަހުގެ ތިންބައިކުޅަ އެއްބައި ފާއިތުނުވަނީސް ވަޒީފާއިން ވަކިވެއްޖެނަމަ، ވަކިވި ދުވަހާ ހަމައަށްވާ ފައިސާ ފިޔަވައި އިތުރުވާ ފައިސާ އެމުވައްޒަފެއްގެ އަތުން ހޯދައި، އެ ފައިސާ އަނބުރާ ޖަމާކުރަން ޖެހޭނެ ކަމަށްވެސް ވަނީ ބުނެފައެވެ.
މީގެ އިތުރުން ރޯދަ މަހުގެ ތެރޭގައި އަލަށް ވަޒީފާ ދޭ މުވައްޒަފުންނަށް އެ މުވައްޒަފަކު ވަޒީފާ އަދާކުރާ ތާރީހުން ފެށިގެން ރަސްމީ ހަތް ދުވަސް ތެރޭ ރޯދަ މަހުގެ އިނާޔަތް ދޭން ޖެހޭނެ ކަމަށާއި އެގޮތަށް އިނާޔަތް ދޭއިރު ދުވަސް ގުނާނީ ދުވާލަކަށް ޖެހޭ އަދަދު 30 އިން ގެއްލައިގެން ކަމަށް ވެސް ބުންޏެވެ.
ރަމަޟާން މަހުގެ ތެރޭގައި ވަޒީފާއިން ވަކިވުމަށް ހަމަޖެހިފައިވާ މުވައްޒަފުންނަށް އިނާޔަތުގެ ފައިސާ ދޭނީ ރަމަޟާން މަހު އެމީހަކު މަސައްކަތްކުރި ދުވަހަށް ކަމަށްވެސް ބުނެފައި ވެއެވެ.
މީގެ އިތުރުން ރޯދަ މަސް "ޕޭ ލީވް" ސްކޮލާޝިޕް މުވައްޒަފުންނާއި "ނޯ ޕޭ ލީވް"ގައި ތިބޭ މުވައްޒަފުންނަށް އިނާޔަތުގެ ފައިސާ ނުލިބޭނެ ކަމަށާއި އެފަދަ "ލީވް"އެއްގައި ހުންނަ މުވައްޒަފަކު ރަމަޟާން މަހުގެ ތެރޭގައި އެނބުރި ޚިދުމަތަށް ނުކުމެއްޖެ ނަމަ އެދުވަހަކުން ފެށިގެން މަހުގެ ނިޔަލަށް ޖެހޭ އަދަދެއް ބަލައި، އެ އަދަދަށް އިނާޔަތުގެ ފައިސާ ދޭން ވާނެ ކަމަށް ސާކިޔުލާގައި ބުނެފައި ވެއެވެ.
މިއަދުން ފެށިގެން، ރަމަޟާން މަހުގެ އިނާޔަތުގެ ފައިސާގެ ތަފްސީލް ތައްޔާރުކޮށް އިނާޔަތުގެ ފައިސާ ހޯދުމަށް މި މިނިސްޓްރީއަށް ހުށަހެޅުމަށް ސާކިޔުލާގައި ވެއެވެ.
ވަޒީފާ އާއި ބެހޭ ގާނޫނު ބުނާގޮތުން ވަޒީފާ އަދާކުރާ ކޮންމެ މުަސްލިމު މުވައްޒަފަކަށް ރަމަޟާން މަހުގެ އިނާޔަތުގެ ގޮތުގައި 3،000 ރުފިޔާ ދޭން ޖެހެއެވެ.