ވޮޝިންޓަން (މާޗް 30) : އީރާނުގެ ނިއުކްލިޔާ އެއްބަސްވުމަށް އެމެރިކާ އެނބުރި ރުޖޫއަވުމަށްޓަކައި އީރާނާއެކު ވާހަކަތައް ފެށުމުގެ ޕްލޭނެއް މިހަފްތާ ތެރޭގައި އެމެރިކާއިން ހުށަހަޅާނެ ކަމަށް އެމެރިކާގެ މަޝްހޫރު ނޫހެއްކަމަށްވާ "ޕޮލިޓިކޯ" ބުނެފިއެވެ.
ނަންހާމަކުރަން ނޭދޭ އެމެރިކާގެ މަސްއޫލުވެރިއަކާ ހަވާލާދީ "ޕޮލިޓިކޯ" ބުނިގޮތުގައި އެމެރިކާގެ ހުށަހެޅުން ބިނާވެފައިވަނީ އީރާނުން ޔުރޭނިޔަމް ފައްކާކުރުމަށް ބޭނުންކުރާ ޒަމާނީ ސެންޓްރިފިއުޖް މެޝިންތައް ބޭނުންކުރުން ހުއްޓާލުމާއި ޔޫރޭނިޔަމް ފައްކާކުރާ މިންވަރު 20 އަށްވުރެ ދަށްކުރުމުން އެމެރިކާއިން އީރާނާދެކޮޅަށް އަޅާފައިވާ ދަތިކުރުމުގެ ފިޔަވަޅުތަކަށް ލުއިތަކެއް ދިނުމުގެ މައްޗަށެވެ. ލުއިތަކުގެ ތެރޭގައި ބައެއް ފިޔަވަޅުތައް އުވާލުން ހިމެނޭކަމަށް ވެއެވެ.
އެމެރިކާ މިހުށަހެޅުން ހުށަހަޅަނީ ކުރީގެ ރައީސް ޑޮނަލްޑް ޓްރަމްޕްގެ ވެރިކަމުގައި ނިއުކްލިޔާ އެއްބަސްވުމުން އެމެރިކާ ވަކިވެ އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އެއްކޮށް ނައްތާނުލަނީސް ނިއުކްލިޔާ އެއްބަސްވުމާ ޚިލާފަށް އީރާނުން ހިންގާ ހަރަކާތްތައް ހުއްޓާނުލެވޭނެ ކަމަށް އީރާނުން ތަކުރާރުކޮށް ބުނަމުން ގެންދިޔުމާ ގުޅިގެންނެވެ.
އެމެރިކާގެ ރައީސް ޖޯ ބައިޑެން ވަނީ ނިއުކްލިޔާ އެއްބަސްވުމާ ޚިލާފަށް އީރާނުން ހިންގާ ހަރަކާތްތައް ހުއްޓާލުމުން ނޫނީ އެމެރިކާއިން އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާނުލާނެ ކަމަށް ވިދާޅުވެފައެވެ. ނަމަވެސް އީރާން ބުނާގޮތުން ފުރަތަމަ ފިޔަވަޅުއަޅަންޖެހޭނީ އެމެރިކާއެވެ. ސަބަބަކީ އީރާނުގެ ނިއުކްލިޔާ އެއްބަސްވުމުގައި ސޮއިކުރުމަށްފަހު އެ އެއްބަސްވުމުން އެކެހެރި ގޮތެއްގައި ވަކިވީ އެމެރިކާ ކަމަށްވެފައި އެއެއްބަސްވުމާ ޚިލާފަށް އީރާނާ ދެކޮޅަށް ދަތިކުރުމުގެ ފިޔަވަޅުތައް އެޅީވެސް އެމެރިކާ ކަމަށްވާތީއެވެ. ނިއުކްލިޔާ އެއްބަސްވުމުގެ ބައެއް ބައިތަކާ އީރާން ޚިލާފުވާންޖެހުނީ އެމެރިކާގެ މިއަމަލުތަކާ ގުޅިގެން އީރާނަށް ލިބޭ ގެއްލުންތަކާ ގުޅިގެން އެކަމ ކުރިމަތިލުމަށް އެނޫންގޮތެއް ނެތިގެން ކަމަށްވާތީއެވެ.
"ޕޮލިޓިކޯ" ގައި ޝާއިޢުކޮށްފައިވާ މިޚަބަރާ ގުޅިގެން އީރާނުންވަނީ އެގައުމުން މިކަމުގައި ގެންގުޅޭ ސިޔާސަތު އަނެއްކާވެސް ހަމަކޮށްފައެވެ. އެއީ ދަތިކުރުމުގެ ހުރިހާ ފިޔަވަޅުތަކެއް އުވާނުލަނީސް ނިއުކްލިޔާ އެއްބަސްވުމާ ޚިލާފަށް ހިންގާ ހަރަކާތްތައް ހުއްޓާނުލުމުގެ ސިޔާސަތެވެ.
އދ. ގައި ހުންނަވާ އީރާނުގެ ދާއިމީ މަންދޫބު މަޖީދު ތަޚްތު ރުވާންޖީ ވިދާޅުވީ އެމެރިކާގެ ކިބައިން ބޭނުންވަނީ އައު ހުށަހެޅުންތަކެއް ނޫންކަމަށާ ދަތިކުރުމުގެ ހުރިހާ ފިޔަވަޅުތަކެއް އުވާލައި ނިއުކްލިޔާ އެއްބަސްވުމަށް އެމެރިކާ އަލުން ރުޖޫއަވުން ކަމުގައެވެ. މިނޫންގޮތެއް އީރާނުން ގަބޫލުނުކުރާނެކަމަށްވެސް އީރާނުގެ މަންދޫބު ވިދާޅުވިއެވެ. (އަލްޖަޒީރާ)