ވިލާގެ ޕެޓްރޯލް ޝެޑު ވިލާ ފިއުލްއަށް ރީބްރޭންޑު ކުރުމަށް ފަހު އަލުން ހުޅުވައިފި އެވެ.
ސިނާއީ އަވަށުގައި ހުޅުވި ވިލާ ފިއުލް ޝެޑަކީ ޖާގައިގެ ގޮތުން ތަނަވަސް، އަދި ކުރިން ހިންގި ވިލާގެ ޝެޑާ މުޅިން ތަފާތު ގޮތަކަށް ހަދާފައިވާ ޝެޑެކެވެ.
އަލަށް ހުޅުވި އެ ޝެޑުގައި ޕެޓްރޯލް އަޅާ 12 ޕޮއިންޓް އަދި ޑީސަލް އަޅާ ހަތަރު ޕޮއިންޓް ހުރެ އެވެ.
މީގެ ކުރިން މާލޭގައި ވިލާގެ ޕެޓްރޯލް ޝެޑު ހުރީ ދަރުމަވަންތަ ހޮސްޕީޓަލް އިންވެގެން ބޮޑުތަކުރުފާނުމަގު، އަމީނީމަގު ކަންމަތީގައި މިހާރު ޕާކެއް ހަދާފައިވާ ބިމުގަ އެވެ.
މާލޭގެ އިތުރުން ހުޅުމާލޭގައި ވެސް ވިލާއިން އަންނަނީ ޕެޓްރޯލް ޝެޑެއް އޮޕަރޭޓު ކުރަމުންނެވެ.
ވިލާއިން ބުނި ގޮތުގައި ވިލާ ފިއުލްއިން ރަނގަޅު ކޮލެޓީއާ އެކު ސްޕީޑު އަވަސް ހިދުމަތް ކަސްޓަމަރުން ލިބޭނެ އެވެ.
ވިލާ ފިއުލްއިން ހުކުރު ދުވަސް ފިޔަވައި ކޮންމެ ދުވަހަކު ހެނދުނު 8:00 އިން ރޭގަނޑު 11:00އަށް ހިދުމަތް ލިބޭނެ ކަމަށް އެ ކުންފުނިން ބުންޏެވެ. އަދި ހުކުރު ދުވަހު ހިދުމަތް ލިބޭނީ މެންދުރު 2:00 އިން ރޭގަނޑު 11:00 އަށެވެ.