ކްރެޑިޓް ރޭޓިން އޭޖެންސީ ފިޗް އިން މިދިޔަ އަހަރުގެ ތެރޭގައި ސީސީސީ ރޭޓިންގްއަށް ދަށްކުރި އޭޝިއާ ޕެސިފިކްގެ ތިން ގައުމެއްގެ އިގްތިސާދީ ހާލަތު މި އަހަރުގެ ތެރޭގައި ކުރިއަރާނެ ކަމަށް އެ އޭޖެންސީން ލަފާކޮށްފި އެވެ. މިދިޔަ އަހަަރުގެ ތެރޭގައި ސީސީސީ ރޭޓިން އަށް ފިޗް އިން ދަށްކުރި ތިން ގައުމަކީ ލާއޯސް، ސްރީލަންކާ އަދި ދިވެހިރާއްޖެ އެވެ.
ފިޗް އިން މިދިޔަ ބުރާސްފަތި ދުވަހު ބުނި ގޮތުގައި ތިން ގައުމުގެ އިގްތިސާދީ ހާލަތު ކުރިއަރާނެ ކަމަށް ބެލުނު ނަމަވެސް ކޮވިޑް19ގެ ކުރީގައި ހުރި މިންވަރަށް ކްރެޑިޓްވޯދިނަސް ނޫފުލޭނެ ކަމަށެވެ.
ފިޗް އިން ބުނި ގޮތުގައި ތިން ގައުމުގެ އިގްތިސާދު ވެސް މި އަހަރު ނިންމާލާނީ ޑެފިސިޓާއެކު އެވެ. އެހެން ނަމަވެސް ކޮވިޑް19ގެ ސަބަބުން ފަތުރުވެރިކަމަށް ކުރުވާ އަސަރަކުން އެ ގައުމުތަކުގެ އާމްދަނީއަށް އަސަރު ކުރާނެ އެވެ.
ބޭރުން ލިބޭ މާލީ އެހީގެ ސަބަބުން އެކްސްޓާނަލް ލިކުއިޑިޓީ ސްޓެސް ފަސޭހަވާނެ ކަމަށް ބުނަމުން، ފިޗް އިން ވަނީ ރާއްޖެ އިން 2020 ވަނަ އަހަރު ބޭރުން ގިނަ އަދަދެއްގެ އެހީ ހޯދާފައިވާކަން ފާހަގަކޮށްފަ އެވެ.
ޖީ20 ޑެޓް ސާވިސް ސަސްޕެންޝަން ފަދަ، ބޭރުގެ ގައުމުތަކާއި ޖަމިއްޔާތަކާއި އިއްތިހާދުތަކުން ދޭ މާލީ އެހީތެރިކމަކީ އެކްސްޓާނަލް ފައިނޭންސިން ސްޓްރެސް ދަށްކޮށްދޭ ކަމެއްކަން ފާހަގަކޮށް، ފިޗް އިން ބުނީ އޭޝިއާ ޕެސިފިކްގައި ސީސީސީ ރޭޓިންގް ގައުމުތަކުގެ ތެރެއިން އެ ހިދުމަތް ލިބިފައި ވަނީ ދިވެހިރާއްޖެއަށް އެކަނި ކަމަށެވެ. އަދި 2021 އިން 2022ގެ ނިޔަލަށް ވެސް ރާއްޖެއަށް މިފަދަ އެހީތައް ލިބެމުން ދާނެކަމަށް ފިޗް އިން ބުންޏެވެ.
އެހެން ނަމަވެސް ލާއޯސް އަދި ސްރީލަންކާއަށް އައިއެމްއެފްގެ މާލީ އެހީ ހޯދުމަށް ދަތިތަކެއް އެބަ ހުރި ކަމަށާއި އެ ދެ ގައުމަށް ޗައިނާ އިން ބޮޑެތި އެހީތަކެއް ލިބިއްޖެ ނަމަ ފައިދާ ބޮޑުވާނެ ކަމަށް ފިޗް އިން ބުންޏެވެ.
ފިޗް އިން ބުނީ ކްރެޑިޓްވޯދިނަސް އިހު ހުރި މިންވަރަކަށް އިއާދަކުރުމަށް އެންމެ އުނދަގޫވެ މުއްދަތު ދިގުވާނީ ސްރީލަންކާ އަށް ކަމަށެވެ.
"ދިވެހިރާއްޖެ އާއި ލާއޯސްއާ އަޅާ ކިޔާއިރު ސްރީލަންކާގެ ދަރަނި މާ ބޮޑު. މިކަމުގެ ސަބަބުން އެ ގައުމަށް ބޭރުގެ މާލީ އެހީ ހޯދުމަށް އުނދަގޫވެދާނެ. އަދި ސްރީލަންކާގެ އިންޓަރެސްޓް ކޮސްޓް ބޮޑުވުމުގެ ސަބަބުން ޑެޓް ސަސްޓެއިނަބިލިޓީ ހަމަޖެއްސުމަކީ ގޮންޖެހުމަކަށް ވާނެ." ފިޗް އިން ބުންޏެވެ.
ފިޗް އިން ބުނީ ރާއްޖެ އާއި ސްރީލަންކާއަކީ ވަރަށް ގިނަ ބަޔަކު ފަތުރުވެރިކަމުގެ ދާއިރާގައި ވަޒީފާ އަދާކުރާ، އަދި އެ ދާއިރާ އިން ބޭރު ފައިސާ ގިނަ އަދަދަކަށް ހޯދާ ދެ ގައުމު ކަމުން އެ ދެ ގައުމުގެ އިގްތިސާދަށް ކޮވިޑް19 އިން ކުރި އަސަރު ވަރަށް ބޮޑު ކަމަށެވެ. ދިވެހިރާއްޖޭގެ އިގްތިސާދު 30 ޕަސަންޓުން އަދި ލަންކާގެ އިގްތިސާދު 6.7 ޕަސަންޓުން ދަށްވި އިރު، އެމެރިކާ ޑޮލަރުން ބަލާ އިރު ރާއްޖޭގެ ނޮމިނަލް ޖީޑީޕީ 2015ގެ ކުރީގައި ހުރި މިންވަރަށް (ބޮލަކަށް 3،423.3 ޑޮލަރަށް) ވެއްޓުނު ކަމަށް ފިޗް އިން ބުންޏެވެ.
އަދި ރާއްޖެ އާއި ސްރީލަންކާގެ ރޭޓިންގް ސީސީސީއަށް ދަށްކުރި އެއް ސަބަބަކީ ޕަންޑެމިކުގެ ސަބަބުން ކުރިމަތިވި އިގްތިސާދީ ހީނަރުކަމާ ގުޅިގެން ދެ ގައުމުގެ ކްރެޑިޓް މެޓްރިކް ބަލިކަށިވުން ކަމަށް ވެސް ފިޗްއިން ބުންޏެވެ.
ފިޗް އިން ލަފާކުރަނީ ރާއްޖޭގެ އިގްތިސާދި 2021-2022 އަށް އެވަރެޖްކޮށް 18 ޕަސަންޓަށް ކުރިއަރާނެ ކަމަށެވެ. އެހެން ނަމަވެސް ޕެންޑެމިކުން ފަތުރުވެރިކަމަށް ކުރާނެ އަސަރުތަކާ ގުޅިގެން މިކަމުގައި ރިސްކުތަކެއް ވެސް އެކުލެވޭ ކަމަށް ފިޗްއިން ބުންޏެވެ. އެހެން ނަމަވެސް ފޯކާސްޓުތަކުން ދައްކަނީ ރާއްޖޭގެ 2022 ވަނަ އަހަރުގެ ރިއަލް އައުޓްޕުޓް ހުންނާނީ 2019ގައި ހުރި މިންވަރަށް ވުރެ ދަށުގައި ކަމަށް ފިޗްއިން ބުންޏެވެ.
މީގެ އިތުރުން ޕަބްލިކް ޑެޓްގެ އުނދަގޫތައް ވެސް ސީސީސީ ކެޓަގަރީގެ ގައުމުތަކުގައި ބޮޑުވެ، ގައުމުގެ ކްރެޑިޓްވޯދިނަސްއަށް ޕްރެޝާކުރާނެކަމަށް ބެލެވޭކަމަށް ވެސް އެ އޭޖެންސީން ބުންޏެވެ. އެގޮތުން ރާއްޖޭގެ ޖެނެރަލް ގަވަމަންޓް ޑެޓް 2022 ވަނަ އަހަރު ނިމޭ އިރު ހުންނާނީ ޖީޑީޕީގެ 105 ޕަސަންޓުގައި ކަމަށް ވެސް ފިޗްއިން ލަފާކުރެ އެވެ.
ފިޗް އިން ބުނީ ރާއްޖެއަށް ލިބޭ ބޭރުގެ މާލީ އެހީގެ ސަބަބުން އެކްސްޓާނަލް ލިކުއިޑިޓީ ޕްރެޝާ ފަސޭހަކޮށްދޭ ނަމަ ރާއްޖޭގެ ކްރެޑިޓް ރޭޓިންގް އަޕްގްރޭޑު ކުރެވިދާނެ ކަމަށެވެ. އެގޮތުން ފައިނޭންސިން އޮޕްޝަންތައް އިތުރުކޮށް، ނުވަތަ ދެމެހެއްޓެނިވި ގޮތެއްގައި ފޮރިން އެކްސްޗޭންޖު ރިޒާވް އިތުރުކުރުން ފަދަ ކަންކަމުން މިކަމަށް އެހީތެރިވެދެވޭނެކަމަށް ފިޗްއިން ބުންޏެވެ.