މިވަގުތު އެންމެ މުހިއްމު އެއްކަމަކީ ރާއްޖެއަކީ ދުނިޔޭގެ އެއްވަނަ ޑެސްޓިނޭޝަނުގެ ގޮތުގައި ދެމެހެއްޓުން ކަމަށް މޯލްޑިވްސް އެސޯސިއޭޝަން ފޯ ޓޫރިޒަމް އިންޑަސްޓްރީ (މަޓީ) ގެ ވައިސް ޗެއާމަން ހުސައިން އަފީފް ވިދާޅުވެއްޖެ އެވެ.
މިިދޔަ އަހަރުގެ ވޯލްޑް ޓްރެވަލް އެވޯޑްސް ގައި ރާއްޖެ އަށް ވަނީ ދުނިޔޭގެ ފަތުރުވެރިކަމުގެ އެންމެ މަގުބޫލު މަންޒިލުުގެ އެވޯޑު ލިބިފަ އެވެ.
ރާއްޖޭގެ ޓޫރިޒަމަށް 50 އަހަރުފުރޭ ރަންޔޫބީލް ހަރަކާތްތަކުގައި ބޭނުންކުރާނެ ލޯގޯ ތައާރަފު ކުރުމަށް މިއަދު ބޭއްވި ރަސްމިއްޔާތުގައި ވާހަކަ ދައްކަވަމުން އަފީފް ވިދާޅުވީ އެންމެ ބުރަ މަސައްކަތަކަށް ވާނީ އެއްވަނާގައި ހިފަހައްޓާލާ، އެ ވަނަ ދިފާއު ކުރުން ކަމަށެވެ.
ރާއްޖޭގެ ޓޫރިޒަމްގެ ކާމިޔާބުގައި އެނންމެ ބޮޑު ހިއްސާއެއް އަދާކުރާ ކަމަކީ ސަރުކާރާއި ޕްރައިވެޓް ސެކްޓަރާ ދެމެދު އޮތް ގުޅުން ކަމަށެވެ.
"ވަރަށް ބޮޑެތި ބަދަލުތައް އަތުވެއްޖެ ޓޫރިޒަމަށް. ކުރިއަށް އޮތްތަނުގައި އެއަށްވުރެ ގިނަ ބަދަލުތައް އަންނާނެ. ރާއްޖޭގެ ޓޫރިޒަމު މިހާބޮޑަށް ކާމިޔާބުވި އެންމެ ބޮޑު އެއް ސަބަބަކީ ސަރުކާރާ ޕްރައިވެޓް ސެކްޓަރާ ދެމެދު އޮތް ގުޅުން،" އަފީފް ވިދާޅުވި އެވެ.
މިއަދުގެ ރަސްމިއްޔާތުގައި މަޓީގެ ޗެއާމަން މުހަައްމަދު އުމަރު މަނިކު ވިދާޅުވީ ޓޫރިޒަމް ރާއްޖޭގައި ފެށުނީ ވަރަށް ކުޑަކޮށް ނަމަވެސް، އަދިވެސް ރާއްޖޭގެ ޓޫރިޒަމް ދެމިއޮތީ އޭރުވެސް އެ އިންޑަސްޓްރީ ބިނާވެފައިވާ މައިގަނޑު ކަންތައް ކަމުގައިވާ ރާއްޖޭގެ ގުދުރަތީ ރީތި ކަމުގެ ސަބަބުން ކަމަށެވެ.
"އަންނަ މީހުންވެސް ތަފާތުވެއްޖެ. ދެކޭ ގޮތް ވެސް ތަފާތުވެއްޖެ. އެހެން ނަމަވެސް ރާއްޖޭގެ ނެޗުރަލް ބިޔުޓީ އެއީ ބޭސިކް އެލެމެންޓެއްގެ ގޮތުގައި މީހުން ދެކެނީ،" އެމްޔޫ މަނިކު ވިދާޅުވި އެވެ.