ބޮލީވުޑްގެ ކާމިޔާބު ދެތަރިން ކަމަށްވާ ޕްރިޔަންކާ ޗޯޕްރާ އާއި ރާޖްކުމާރު ރާއޯގެ "ދަ ވައިޓް ޓައިގާ" ނެޓްފްލިކްސްގެ އެއްވަނަ މަގާމަށް ޖެހިލައިފިއެވެ.
މި ފިލްމަކީ މި މަހު 13 ވަނަ ދުވަހު ސިނަމާތަކުގައި އެޅުވި ފިލްމެކެވެ. މި ފިލްމު ސިނަމާތަކުގައި އެޅުވުމަށްފަހު މިދިޔަ ހަފްތާގެ ތެރޭގައި ވައިޓް ޓައިގާ ނެޓްފްލިކްސްގައި ރިލީޒްކުރިއެވެ.
ފިލްމު ނެޓްފްލިކްސްގެ އެއްވަނަ މަގާމަށް ޖެހިލުމާއެކު ޕްރިޔަންކާ ހިއްސާކުރި ޕޯސްޓެއްގައި ބުނީ މި ފިލްމު ނެޓްފްލިކްސްގެ އެއްވަނަ މަގާމުގައި އޮތުމަކީ އޭނާ އަށް ލިބޭ ޝަރަފެއްް ކަމަށާއި މިއީ ވަރަށް ބޮޑު އުފަލެއް ކަމަށެވެ. އަދި އާންމުން އޭނާއަށް ދޭ ސަޕޯޓަށް ފަށްފަށުން ޝުކުރުއަދާކުރާ ކަމަށާއި ފިލްމު ބެލުމަށްފަހު ފީޑްބެކް ދިނުމަށްވެސް ޕްރިޔަންކާ ވަނީ އެދިފައެވެ.
"ދަ ވައިޓް ޓައިގާ" ނެޓްފްލިކްސްގެ އެއްވަނައިގއި އޮތް އިރު ދެވަނައިގައި އޮތީ "އައުޓްސައިޑް ދަ ވަޔާ" އެވެ. ތިން ވަނައިގައި އޮތީ "ވީ ކޭން ބީ ހީރޯސް" އެވެ.
މި ފިލްމަކީ ޕްރިޔަންކާ އާ ރާޖްކުމާރު އެކުގައި ފެނިގެންދިޔަ ފުރަތަމަ ފިލްމެވެ. އެ ފިލްމަކީ ވާހަކަ ލިޔުންތެރިޔާ އަރްވިންދު އަދިގާގެ ވާހަކަ "ދަ ވައިޓް ޓައިގާ" އަށް ބިނާކޮށް އުފެއްދި ފިލްމެކެވެ.