ސްރީލަންކަން އެއާލައިންސް އިން ރާއްޖެ އާއި އިނގިރޭސިވިލާތުގެ ލަންޑަނާ ދެމެދު އަނެއްކާވެސް ދަތުރުތައް ފަށަން ތައްޔާރުވެއްޖެ އެވެ.
އެ އެއާލައިނުން ބުނީ އަންނަ ފެބްރުއަރީ މަހުގެ 13 އިން ފެށިގެން އިނގިރޭސިވިލާތުގެ ލަންޑަނާއި މާލެ އާއި ދެމެދު ސީދާ ދަތުރުތައް ފަށާނެ ކަމަށެވެ. ކޮންމެ ހަފްތާއެއްގެ ބުދަ އަދި އާދިއްތަ ދުވަހު ރާއްޖެ-ލަންޑަން ދަތުރުތައް ބާއްވާނެ އެވެ.
ޓޫރިޒަމްގެ ސީޒަނާ ދިމާކޮށްވެސް ސްރީލަންކަން އެއާލައިންސް އިން ވަނީ ރާއްޖެ އާއި ލަންޑަނާ ދެމެދު ސީދާ ދަތުރުތައް ބާއްވައިފަ އެވެ. ނަމަވެސް އިނގިރޭސިވިލާތުގައި ހަލުވިކަމާއެކު ކޮވިޑް19 ފެތުރެެން ފެށުމާއެކު ދަތުރުތައް ވަނީ މެދުކަނޑާލައިފަ އެވެ.
ސްރީލަންކަން އެއާލައިންސް އިން މާލެ އާއި ކޮލަމްބޯ އާ ދެމެދު ދަތުރުތައް މިހާރުވެސް ބާއްވާއިރު ދުނިޔޭގެ ބޮޑެތި ސިޓީތަކާއި މާލެ އާ ގުޅާލާފައިވެ އެވެ. އެގޮތުން ލަންޑަނާ، ފްރޭންކްފާޓް އަދި މިލާން ފަދަ ސިޓީތަކަށް ކަނެކްޝަން ފްލައިޓުތައް އެ އެއާލައިނުން ބާއްވަ އެވެ.
ސްރީލަންކަން އެއާލައިންސް އިން ރާއްޖެ އާއި ސްރީލަންކާ އާއި ދެމެދު ދަތުރު ބާއްވަ އެވެ. މިއަދު ލަންކާގެ ބޯޑަރު ހުޅުވާލުމާއެކު ދެ ގައުމުގެ ދެމެދުގައި ދަތުުރު ކުރާ މީހުން އިތުރވާނެ ކަމަށް ލަފާކުރެވެ އެވެ.
ލަންކާގެ ޓުއަރިޒަމް ޕްރޮމޯޝަން ބިއުރޯ (އެސްއެލްޓީޕީބީ) އިން ބުނި ގޮތުގައި އެގައުމުން ފަތުރުވެރިން ގެންދަނީ ރައްކާތެރިކަމުގެ ހަރުކަށި ފިޔަވަޅުތައް އެޅުމަށް ފަހު އެވެ. ފަތުރުވެރިން ލަންކާއަށް ދިޔުމުގެ 72 ގަޑި އިރު ކުރިން ކޮވިޑް ޓެސްޓެއް ހަދަން ޖެހޭނެ އެވެ. އަދި އެގައުމަށް ދިޔުމަށް ފަހު އިތުރު ޓެސްޓަކާއި ހަތް ދުވަސް ފަހުން އަނެއްކާވެސް ޓެސްޓެއް ހަދަން ޖެހޭނެ އެވެ.