އައްމާން (ނޮވެމްބަރު 13): އުރުދުންގެ ޕާލިމެންޓަށް މެމްބަރުން ހޮވުމަށް މިދިޔަ އަންގާރަ ދުވަހު ބޭއްވި އިންތިހާބުގެ ނަތީޖާ އިއުލާން ކުރުމުން އެގައުމުގައި ބޭއްވި އެއްވުންތަކާ ގުޅިގެން އެގައުމުގެ އިންޓީރިއާ މިނިސްޓަރު އިސްތިއުފާ ދެއްވައިފި އެވެ.
އުރުދުންގެ އާއްމު އިންތިހާބުގައި ގިނަ ގޮނޑިތައް ކާމިޔާބު ކުރީ މިނިވަން އަދި ސަރުކާރަށް ތާއިދު ކުރާ ކެންޑިޑޭޓުންނެވެ. އޭގެ ތެރޭގައި އަސްކަރިއްޔާއިން ރިޓަޔާ ކުރި ގިނަ އަދަދެއްގެ އޮފިސަރުން ހިމެނެ އެވެ. އަދި ޕާލިމެންޓުގެ މެޖޯރިޓީ އެ މީހުންނަށް ލިބޭ އިރު ސިޔާސީ ޕާޓީއަކާ ގުޅިފައި ވަނީ އެންމެ 16 ޕަސެންޓު މެމްބަރުންނެވެ.
އެ އިންތިހާބުގެ ނަތީޖާ އިއުލާން ކުރަން ފެށުމުން މީހުން މަގުތަކަށް އެއްވުން ހުއްޓުވުމަށްޓަކައި އުރުދުންއިން ކާފިއު އިއުލާން ކުރި އެވެ. ނަމަވެސް ބުދަ ދުވަހު ނަތީޖާ ހާމަ ކުރަން ފެށުމުން، ޕާލިމެންޓުން ގޮނޑިތައް ކާމިޔާބު ކުރި މެމްބަރުންނާއި ނާކާމިޔާބުވި ކެންޑިޑޭޓުންނަށް ތާއިދު ކުރާ މީހުންވެސް ގައުމުގެ އެކި ސަރަހައްދުތަކުގައި އެއްވުންތައް ބޭއްވި އެވެ.
އެގޮތުން ބައެއް މީހުން މަގުތަކަށް އެއްވެ ކާމިޔާބީ ފާހަގަ ކުރި އިރު އެހެން މީހުން ވަނީ ނަތީޖާއާ ގުޅިގެން ނުރުހުން ފާޅު ކުރުމުގެ ގޮތުން ޓަޔަރާއި ކުނި ބުނީގައި ރޯކޮށް، މަގުތައް ބަންދުކޮށްފަ އެވެ.
އޭގެ ސަބަބުން އުރުދުންގެ ސަރުކާރަށް ގިނަ އަދަދެއްގެ މީހުންގެ ފާޑު ކިޔުން އަމާޒުވި ފަހުން އިންޓިރިއާ މިނިސްޓަރު ތައުފީގު އަލް ހަލަލްމާ ވަނީ އެ މައްސަލައިގެ ޒިންމާ ނަންގަވާ، އިސްތިއުފާ ދެއްވާފަ އެވެ.
މީގެ އިތުރުން ރަސްގެފާނު އަބްދުﷲ ދެވަނަ ވަނީ ކާފިއުއާ ހިލާފުވުމަކީ ގާނޫނާ ހިލާފު ކަމެއް ކަމަށް ވިދާޅުވެފަ އެވެ.
އުރުދުންގެ އެންމެ ބޮޑު އިދިކޮޅު ފެކްޝަން އަދި އެގައުމުގައި ހަރަކާތްތެރިވާ މުސްލިމް ބްރަދަހުޑްގެ ސިޔާސީ ފިޔަ ކަމަށްވާ އިސްލާމިކް އެކްޝަން ފްރޮންޓް (އައިއޭއެފް)އަށް މިފަހަރުގެ އިންތިހާބުން ލިބުނީ އެންމެ އަށް ގޮނޑި އެވެ. އެއާ އަޅާ ބަލާއިރު ކުރީގެ ޕާލިމެންޓުގައި އެ ޕާޓީގެ 16 މެމްބަރުން ތިއްބެވި އެވެ.
މީގެ އިތުރުން މި ފަހަރުގެ ޕާލިމެންޓުގައި އަންހެން މެމްބަރުން ތިއްބަވާ އަދަދުވެސް ވަނީ މަދުވެފަ އެވެ. އެގޮތުން ކުރީގެ ޕާލިމެންޓުގައި 20 އަންހެން މެމްބަރުން ތިއްބެވި އިރު މިފަހަރު އަންހެނުން ހޮވިފައި ވަނީ 15 ގޮނޑިއަކަށެވެ. އެއީ އަންހެނުންނަށް ހާއްސަކޮށްފައިވާ 15 ގޮނޑި އެވެ.
އެ އިންތިހާބުގައި 1،674 ކެންޑިޑޭޓުން ވާދަ ކުރި އިރު އޭގެ ތެރޭގައި ހިމެނުނީ 360 އަންހެން ކެންޑިޑޭޓުންނެވެ. އަދި އެ އިންތިހާބުގައި ވޯޓު ލުމުގެ ހައްގު ލިބިގެންވާ މީހުންގެ އަދަދު 4.5 މިލިއަނަށް އެރި ނަމަވެސް ވޯޓުގައި ބައިވެރިވީ އެންމެ 1.38 މިލިއަން މީހުންނެވެ. އެއީ 29.9 ޕަސެންޓު މީހުންނެވެ. އެއާ އަޅާ ބަލާއިރު 2016 ވަނަ އަހަރުގެ އާއްމު އިންތިހާބުގައި 36 ޕަސެންޓު މީހުން ވޯޓު ދިނެވެ.