ކުދިން ހިތާނުކޮށް، ގިނަ މީހުން އެއްވާގޮތަށް ޕާޓީތަކާއި މިއުޒިކް ޝޯ ފަދަ މުނިފޫހިފިލުވުމުގެ ހަރަކާތްތައް ނުބާއްވަން އަންގައި ހިތާނު ކުރުމުގެ ހަރަކާތްތައް ބޭއްވުމުގައި އަމަލުކުރާނެ ގޮތުގެ އުސޫލު ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިއަދު އާންމުކޮށްފި އެވެ.
އެޗްޕީއޭ އިން އާންމުކުރި އުސޫލުގައި ބުނެފައި ވަނީ ކޮވިޑް19ގެ ސަބަބުން ހިތާނުކުރުމާ ގުޅިގެން ކުރިއަށް ގެންދާ ހަރަކާތްތަކުގައި ރައްކާތެރިކަމުގެ ފިޔަވަޅު އެޅުމަކީ މުހިންމު ކަމެއް ކަމަށެވެ.
އެހެންކަމުން ކުދިން ހިތާނުކުރުމުގައި އުސޫލާ އެއްގޮތަށް އަމަލުކުރަން އެޗްޕީއޭ އިން އިލްތިމާސްކުރެ އެވެ.
އުސޫލުގައި ބުނެފައި ވަނީ ހިތާނުކުރާ ގިނަ ކުދިން އެކުގައި ހޯލް ފަދަ ތަންތަނުގައި ނުބޭތިއްބުމަށާއި، އަމިއްލަ ގޭގައި ކުދިން ބޭތިއްބުމުގެ އިންތިޒާމް ހަމަޖެއްސުމަށެވެ.
އަދި އެއް ކުއްޖަކަށް ވުރެ ގިނަ ކުދިން ބައިތިއްބާ ނަމަ، ގޭގައި އެކުގައި ދިރިއުޅޭ ކުދިން ނުވަތަ އެއް އާއިލާއެއްގެ ކުދިން ބޭތިއްބުމަށެވެ.
ކުދިން ބައިތިއްބާ ތަނުގެ ސާފުތާހިރުކަން ކަށަވަރުކުރުމުގެ އިތުރުން، ތިން ފޫޓު ދުރުމިން ބެހެއްޓޭ ގޮތަށް އިންތިޒާމްތައް ހަމަޖައްސަން ވެސް އުސޫލުގައި ބުނެފައިވެ އެވެ.
ހިތާނުކޮށްފައި ތިބީ ކުދިންނަށް މީހުން ޒިޔާރަތްކުރާ ނަމަ، އެއްފަހަރާ ގިނަ ބަޔަކު ޖަމާނުވާނެ ގޮތަކަށް އިންތިޒާމްތައް ހަމަޖެއްސުމަށާއި ޒިޔާރަތްކުރާ މީހުން ގިނައިރު މަޑުނުކުރުމަށް ބާރުއެޅުމަށާއި ކޮވިޑް19ގެ އަލާމާތެއް ހުރި މީހެއް ނަމަ ކުދިންނަށް ޒިޔާރަތް ނުކުރުމަށް ވެސް އުސޫލުގައި ބުނެފައިވެ އެވެ.
ހަމައެއާއެކު، ގިނަ މީހުން އެއްވާގޮތަށް ޕާޓީ ތަކާއި، މިއުޒިކް ޝޯ ފަދަ މުނިފޫހިފިލުވުމުގެ ހަރަކާތްތައް ނުބާއްވަން ވެސް އުސޫލުގައި ބުނެފައިވެ އެވެ.
މީގެ އިތުރުން ތަނުގެ ސާފުތާހިރުކަމާއި، މީހުންގެ ސާފުތާހިރުކަމަށް ސަމާލުކަން ދިނުމަށާއި ކޮވިޑް19ގެ ކޮމިއުނިޓީ ސްޕްރެޑެއް އޮތް ތަނެއްގައި އަމަލުކުރަންޖެހޭ އުސޫލުތަކަށް ބޯލެނބުމަށް ވެސް އެޗްޕީއޭ އިން ބުންޏެވެ.