މާލިއްޔަތު ގަވައިދު އިސްލާހުނުކޮށް، ޕްރޮކިއުމަންޓް ޕޮލިސީ ބޯޑު އުފެއްދުމުން، އެ ބޯޑު އުފެއްދި ގޮތާ މެދު ސުވާލު އުފެދިއްޖެ އެވެ.
ހަތް މެމްބަރުންގެ މައްޗަށް އެކުލެވޭ ޕްރޮކިއުމަންޓް ޕޮލިސީ ބޯޑް އެކުލަވައިލީ މި އަހަރުގެ ފެބްރުއަރީ މަހުގެ 23 ވަނަ ދުވަހު ރައީސް އިބްރާހިމް މުހައްމަދު ސޯލިހެވެ. އެއީ ޖެނުއަރީ މަހުގެ 29 ވަނަ ދުވަހު، ފިނޭންސް މިނިސްޓްރީން ރައީސް އޮފީހުގައި އެކަމަށް އެދުމުންނެވެ.
އެ ބޯޑުގެ ޗެއާޕާސަންގެ މަގާމަށް އައްޔަން ކުރެއްވީ ފިނޭންސް މިނިސްޓަރު އިބްރާހިމް އަމީރެވެ. ފިނޭންސް މިނިސްޓްރީގެ ސްޓޭޓް މިނިސްޓަރު އަހުމަދު ޝަރީފުވެސް އެ ބޯޑުގައި ހިމެނިވަޑައިގަންނަވަ އެވެ. ދެން އެ ބޯޑުގައި ތިއްބަވަނީ އެންވަޔަރަމެންޓް މިނިސްޓްރީގެ ފަރާތުން އަޖުވަދު މުސްތަފާ އާއި، އިކޮނޮމިކް މިނިސްޓްރީގެ ފަރާތުން ޝުހާދު އިބްރާހިމާއި، ޕްލޭނިން މިނިސްޓްރީގެ ފަރާތުން ޝިފާޒު އަލީ އާއި، އޮޑިޓާ ޖެނެރަލްގެ އޮފީހުގެ ފަރާތުން އިބްރާހިމް ނައީމް އަދި ޕްރައިވެޓް ސެކްޓާއިން ޑރ. މުހައްމަދު އާދިލެވެ.
ނަމަވެސް، އޭރު އެ ބޯޑު އެކުލަވާލީ މާލިއްޔަތު ގަވައިދުގައި އެ ބޯޑުގެ ވާހަކައެއް ނެތީހެވެ. އެ ބޯޑުގެ ބޭނުމާއި، ބޯޑަށް މެމްބަރުން އައްޔަން ކުރާނެ ގޮތާއި، ބޯޑުގައި ހިމެނޭ މެމްބަރުންގެ އަދަދުގެ ވާހަކަ މާލިއްޔަތު ގަވައިދަށް އިތުރުކުރީ މި އަހަރުގެ ޖުލައި މަހު މާލިއްޔަތު ގަވައިދަށް ގެނައި އިސްލާހަށް ފަހު އެވެ. އެއީ ބޯޑު އައްޔަން ކުރިތާ ފަސް މަސް ފަހުން ގެނައި އިސްލާހެކެވެ.
ބޯޑު އުފެއްދި އިރު މާލިއްޔަތު ގަވާއިދުގެ 10.06ގައި ވަނީ ޕްރޮކިއުމަންޓާއި ގުޅޭ ކަންކަން ރާވައި ހިންގައި މާލިއްޔަތު ގަވާއިދާ ބެހޭގޮތުން ނެރެންޖެހޭ އެންމެހައި ސާކިއުލާތަކާއި ދެންނެވުންތައް ނެރޭނީ މިނިސްޓަރު ނުވަތަ އެކަން ލިޔުމުން ހަވާލުކުރުމުން ފައިނޭންޝަލް ކޮންޓްރޯލަރު ކަމަށެވެ.
ނަމަވެސް، މާލިއްޔަތު ގަވައިދަށް ގެނައި އިސްލާހާއެކު އެ ގަވައިދުގެ 10.06ގައި މިހާރު ވަނީ ޕްރޮކިއުމަންޓް ނިޒާމް ހަރުދަނާ ކުރުމާއި، އެ ގަވާއިދުގެ ދަށުން ޕްރޮކިއުމަންޓާ ބެހޭގޮތުން ނެރެންޖެހޭ އުސޫލުތައް އެކުލަވާލާނީ ޕްރޮކިއުމަންޓް ޕޮލިސީ ބޯޑުން ކަމަށެވެ. އަދި ބޯޑުގެ ނިންމުންތައް ތަންފީޒުކުރާނީ، މިނިސްޓަރު އަންގާ ގޮތެއްގެ މަތީން ދައުލަތުގެ މާލީ ވުޒާރާގައި ހަމަޖެހިފައިވާ އިދާރީ އޮނިގަނޑުގެ ތެރެއިން ކަމަށްވެ އެވެ.
އޭގެ އިތުުރުން، އެ ބޯޑުގައި ތިބޭނީ ހަތް މެމްބަރުން ކަމާއި، އެ މެމްބަރުން އައްޔަން ކުރާނީ ރައީސުލްޖުމްހޫރިއްޔާ ކަމަށް ބަޔާންކޮށްފައިވެ އެވެ.
އަދި މިހާރު ޕްރޮކިއުމެންޓް ޕޮލިސީ ބޯޑުގެ ހިންގާ ގަވައިދުވެސް ވަނީ ގެޒެޓުކޮށްފަ އެވެ. އެ ގަވައިދު ގެޒެޓު ކުރީ ސެޕްޓޭމްބަރު 7، 2020ގަ އެވެ.
ބައެއް ގާނޫނީ ވަކީލުން މިހާރު ބުނަމުން ދަނީ އެ ބޯޑު އެކުލަވާލީ މާލިޔަތު ގަވައިދާ ހިލާފަށް ކަމަށެވެ. މިކަމާ ގުޅިގެން ވާހަކަ ދެއްކި ގާނޫނީ ވަކީލަކު ވިދާޅުވީ، މާލިއްޔަތު ގަވައިދުގައި ބޯޑުގެ ވާހަކައެއް ނެތީސް އެ ބޯޑު އެކުލަވާލުމަކީ ކުރެވޭނެ ކަމެއް ނޫން ކަމަށެވެ. އަދި އެއީ "ރެޓްރޯސްޕެކްޓިވް"ކޮށް ގާނޫނު ހިންގުން ކަމަށާއި، ބޯޑު ޖެހޭނީ އަލުން އެކުލަވާލަން ކަމަށްވެސް ބުންޏެވެ.
މާލިއްޔަތު ގަވައިދުގައި ޕްރޮކިއުމެންޓް ޕޮލިސީ ބޯޑުގެ ވާހަކަ ނެތީސް، އެ ބޯޑުން ނިންމި ނިންމުންތައް ތަންފީޒު ކުރަން ލާޒިމު ނުކުރެވޭނެ ކަމަށްވެސް ވަކީލަކު ބުންޏެވެ.