ސިވިލް ސާވިސް ކޮމިޝަން (ސީއެސްސީ) އަށް ގުޅަން ފަސޭހަ އިންތިޒާމުތަކެއް ހަމަޖައްސައިފިއެވެ.
އެ ކޮމިޝަނުން ނެރުނު ސާކިޔުލާއެއްގައި ބުނީ ސިވިލް ސާވިސް މުވައްޒަފުންނާއި އާންމުން އެކިއެކި ބޭނުންތަކުގައި އެ ކޮމިޝަނަށް މުއާމަލާތު ކުރާއިރު މައުލޫމާތު ލިބިދިނުން ފަސޭހަކޮށްދިނުމަށް މަސައްކަތް ކުރަމުންދާ ކަމަށެވެ. އެގޮތުން ފޯނަށް ނުގުޅޭ ހާލަތުގައިވެސް ކޮމިޝަނާ މުއާމަލާތް ކުރެވޭނެ ގޮތްތައް މިހާރު ވަނީ ހަމަޖަައްސައިފައެވެ.
ސީއެސްސީ އިން ބުނީ ކޮމިޝަނުގެ ވެބްސަިއޓުގައި، އެކިއެކި ބޭނުންތަކަށް ކޮމިޝަނުގެ މުވައްޒަފުންނާ މުއާމަލާތް ކުރުމަށް ޗެޓް ފީޗާއެއް ގާއިމްކޮށްފައިވާނެ ކަމަށެވެ. ކޮމިޝަނުގެ އިދާރާ އިން އެއްވެސް ކަމެއް ސާފުކުރަން ބޭނުންނަމަ މި ފީޗާ ބޭނުންކުރެވޭނެ ކަމަށް ސީއެސްސީ އިން ބުންޏެވެ.
ކޮމިޝަނުން މައުލޫމާތު ސާފުކުރަން ބޭނުންނަމަ ކޮމިޝަނަށް އީމެއިލް މެދުވެރިކޮށް އެ ހޯދަން ބޭނުންވާ މައުލޫމާތާ ގުޅޭ ކުރު ހުލާސާ އެއް ފޮނުވުމުން ރަސްމީ އެއް ދުވަހުގެ ތެރޭގައި ކޮމިޝަނުން ގުޅާނެ ކަމަށައި ނުވަތަ އީމެއިލް މެދުވެރިކޮށް އެ ޖަވާބު ފޯރުކޮށްދޭނެ ކަމަށް ސީއެސްސީ އިން ބުންޏެވެ.
އަދި ކޮމިޝަނުގެ ވަކި މުވައްޒަފަކާ ގުޅަން ބޭނުންނަމަ ކޮމިޝަނުގެ އިދާރާގެ ވެބްސައިޓުގައި އީމެއިލް އަދި ނަންބަރުތައް ޝާއިއުކޮށްފައިވާނެ ކަމަށް ސީއެސްސީ އިން ބުންޏެވެ. މުވައްޒަފަކާ ފޯނުން ނުގުޅިއްޖެނަމަ، އީމެއިލް ކުރުމުން ރަސްމީ އެއް ދުވަސް ތެރޭ އީމެއިލް އަށް ޖަވާބު ލިބޭނެ ކަމަށްވެސް ސީއެސްސީ އިން ބުންޏެވެ.
ކޮމިޝަނުގެ ރިސެޕްޝަން ނަންބަރަށް ނުގުޅޭނަމަ ހޮޓްލައިން ނަންބަރު 7799280 އަށް ގުޅޭނެ ކަމަށައި އެ ނަންބަރުންވެސް ޖަވާބު ނުލިބިއްޖެނަމަ، ގުޅާ ފަރާތުގެ ނަމާއި ނަންބަރުޖަހައި އެސްއެމްއެސް ކުރުމުން އެއް ދުވަސް ތެރޭ އެ ފަރާތަކާ ގުޅާނެ ކަމަށް ސީއެސްސީ އިން ބުންޏެވެ.