ހިޔާނާތްތެރިވި ފައިސާއިން އެއްވެސް މިންވަރެއް ނުހޯދާ އަދަބަށް ލުއިދިނުމަށް އިއުތިރާފުގެ އެއްބަސްވުން ހެދުމަކީ ކޮށްގެންވާނެ ކަމެއް ނޫން ކަމަށް ކުރީގެ ޕްރޮސެކިއުޓާ ޖެނެރަލް އަހްމަދު މުއިއްޒު ވިދާޅުވެއްޖެއެވެ.
އެމްއެމްޕީއާރްސީ ހިޔާނާތުގެ މައްސަލައިގައި އެއްބާރުލުން ދިނުމަށް ކުރީގެ ނައިބު ރައީސް، އަހްމަދު އަދީބާއި ދައުލަތާ ދެމެދު ވަނީ އިއުތިރާފުގެ އެއްބަސްވުމެއް ހަދައިފައެވެ.
އެ މައްސަލައާ ގުޅިގެން ދައުލަތުން އުފުލި ހަތް ދައުވާއަށް އަދީބު ވަނީ ކުރިމިނަލް ކޯޓުގެ ޝަރީއަތުގެ މަޖިލީހުގައި އެއްބަސްވެފައެވެ. އަދި ކުށަށް ތައުބާވެ ރައްޔިތުންގެ ކިބައިން މައާފަށް ވެސް އެދިފައިވެއެވެ.
އަދީބާއި ދައުލަތާއެކު ހެދި އެއްބަސްވުމު ދަށުން އޭނާއަށް އަންނާނީ ޖުމްލަ 20 އަހަރު ދުވަހުގެ ޖަލު ހުކުމެވެ.
އެކަމާ ގުޅިގެން މަޖިލީހުގެ ވިލިމާލެ ދާއިރާގެ މެމްބަރު، އަހްމަދު އުޝާމް ވިދާޅުވީ ތައުބާވެ މާފަށް އެދުމަކީ ރިވެތި ސިފައެއް ނަމަވެސް ރައްޔިތުން މިއަދު އެންމެ ބޭނުންވަނީ އެއްވެސް ފަރާތެއް އިސްތިސްނާނުކޮށް، ހިޔާނާތުން ފައިދާ ލިބުނު ހުރިހާ ފަރާތްތަކެއްގެ ނަންތައް ހާމަކޮށްދިނުމަށް ކަމަށެވެ.
އަދި ރައްޔިތުން ބޭނުންވަނީ އެ ބޮޑު ހިޔާނާތުގައި ބައިވެރިވި ހުރިހާ މީހުންނަށް ހައްގު އަދަބުލިބުމަށް ކަމަށެވެ.
އުޝާމްގެ ޓުވީޓަށް ޖަވާބުދެއްވައި މުއިއްޒު ވިދާޅުވީ އެންމެ މުހިންމީ ހިޔާނާތުގެ ފައިސާ އަނބުރާ ހޯދުން ކަމަށާއި، ގެއްލުމުގެ ބަދަލުވެސް ލިބެންޖެހޭނެ ކަމަށެވެ.
އަދި އެމްއެމްޕީއާރްސީ މައްސަލައިގައި އެނމެ ލޯ ލާރިއެއް ވެސް ދައުލަތަށް ހޯދިފައިވޭތޯ މުއިއްޒު ވަނީ ސުވާލުއުފައްދަވައިފައެވެ.
"ހިޔާނާތްތެރިވި ފައިސާއިން އެއްވެސް މިންވަރެއް ނުހޯދާ އަދަބަށް ލުއިދިނުމަށް އިއުތިރާފުގެ އެއްބަސްވުން ހެދުމަކީ ކޮށްގެންވާނެ ކަމެއް ނޫން،" މުއިއްޒު ވިދާޅުވިއެވެ.
އަދީބު ވިދާޅުވީ އެމްއެމްޕީއާރުސީއިން ގެއްލުނު ފައިސާ ހޯދުމަށް އޭނާގެ ކުރިންވެސް އަދިވެސް ފުރިހަމަ އެއްބާރުލުން ދެމުން އަންނަ ކަމަށެވެ. އޭނާ ދެކެވަޑައިގަންނަވާ ގޮތުގައި އެއީ އޭނާ ކުރައްވާ ގައުމީ މަސައްކަތެއް ކަމަށްވެސް ވިދާޅުވިއެވެ.
އަދީބު ވިދާޅުވީ ހިޔާނާތުގެ ފައިސާ ނުލިބޭ ސިޔާސީ ޕާޓީއެއް ނެތް ކަމަށެވެ. އޭނާ ވިދާޅުވި ގޮތުގައި ހިޔާނާތުގެ އެންމެ އަޑީގައި ހުރީ ކުރިގެ ރައީސް ޔާމީން އަބްދުލްގައްޔޫމެވެ. އޭނާ ތުހުމަތުކުރެއްވި ގޮތުގައި އެ ހިޔާނާތުގެ ފައިސާ ރައީސް ޔާމީން ބޭނުންފުޅު ކުރެއްވީ ދައުލަތުގެ އެކި ބާރުތަކާއި މިނިވަން މުއައްސަސާތަކަށް ނުފޫޒު ފޯރުވާށެވެ. ހުރިހާ ކަމެއް ކުރެއްވީ ރައީސް ޔާމީންގެ އިރުޝާދުގެ ދަށުން އެމަނިކުފާނު އެންގެވި ގޮތަކަށް ކަމަށް ވިދާޅުވިއެވެ.
ދައުލަތުން ކުރާ ހުރިހާ ދައުވާއަކަށް އިއުތިރާފްވާ ކަމަށް އަދީބު ވިދާޅުވި އެވެ. ތައުބާވެ، ރައްޔިތުންގެ ކިބައިން މައާފަށް އެދޭކަން ފާހަގަ ކުރަމުން އަދީބު ވަނީ އޭނާއަށް ދެވެން އޮތް އެންމެ ކުޑަ އަދަބެއް ދިނުމަށް ވެސް އެދިވަޑައިގެންފަ އެވެ.
އަދީބުގެ ވާހަކަތަކާ ގުޅިގެން ގާޒީ އަދީބުގެ ކިބައިން އެެއްސެވީ ދައުލަތާ އެކު އިއުތިރާފުގެ އެއްބަސްވުމެއް ހަދާފައި ވަނީ އެއްވެސް މަޖުބޫރު ކަމެއް އޮވެގެންތޯ އެވެ. އަދީބު ވިދާޅުވީ އެއްބަސްވުން ހެދީ މަޖުބޫރުކަމެއް އޮވެގެން ނޫން ކަމަށެވެ. ދެން ގާޒީ އެއްސެވީ އެއްބަސްވުން ހެދިއިރު ހުރީ ހަމަ ބުއްދީގައި ތޯ އެވެ. އެ ސުވާލާ ގުޅިގެން އަދީބު ވިދާޅުވީ އެއްބަސްވުން ހެދީ ހަމަ ބުއްދީގައި ހުރެ ހެޔޮ ނިޔަތުގައި ކަމަށެވެ.
ދައުލަތާއެކު ހެދި އެއްބަސްވުމާ އެއްގޮތަށް އަދީބު ދައުވާތަކަށް އިއުތިރާފުވުމުން، ދެ ފަރާތުން އިއުތިރާޒު ނުކުރާ ނަމަ، އަވަސް ނިޔާއިން މައްސަލަ ނިންމައި ހުކުމް ކުރަން މައްސަލަ ބައްލަވާ ގާޒީ މަސައްކަތް ކުރެއްވިއެވެ. އެކަމަށް ދައުލަތުން އިއުތިރާޒެއް ނުކުރި އެވެ.
ނަމަވެސް، އަދީބުގެ ފަރާތުން ބޭނުންވީ އަދި އިތުރު ފަސް ދުވަސް ދިނުމަށެވެ. އެއީ ދައުލަތާއެކު މަޝްވަރާކޮށްގެން މިހާރަށްވުރެ ކުޑަކޮށް އަދަބެއް ލިބޭތޯ އެވެ. އަދީބުގެ ފަރާތުން ބުނީ އެގޮތަށް މަޝްވަރާ ކުރުމަށާއި، އިތުރު ފަސް ދުވަސް ދިނުމަށް ގާނޫނީ އެއްވެސް ހުރަހެއް ނެތް ކަމަށެވެ.
ގާޒީ ނިންމެވީ، އަދީބުގެ ފަރާތުން އިއުތިރާޒު ކުރެެއްވުމުން އަންނަ ހޯމަ ދުވަހު އަވަސް ނިޔާއިން މައްސަލަ ނިންމުމަށް ތާވަލު ކުރުމަށެވެ.
އެމްއެމްޕީއާރުސީގެ ބޮޑު ހިޔާނާތުގެ ސަބަބުން ދައުލަތަށް ގެއްލުނު ފައިސާގެ އަދަދު 3.4 ބިލިއަން ރުފިޔާއަށް އަރާ ކަމަށް އެސެޓް ރިކަވަރީ ކޮމިޝަނުގެ ތަހުގީގުން ވަނީ ހާމަވެފައެވެ.