އާލާކޮށްފައިވާ ފާނަތައް ނީލަމުގައި ވިއްކަން ނިންމައި އެ ނީލަމުގައި ރަޖިސްޓްރީވާން ފިޝަރީޒް މިނިސްޓްރީން ހުޅުވާލައިިފިއެވެ.
ނީލަމުގައި ވިއްކަން ނިންމާފައިވަނީ ރާއްޖޭގައި މުޅިން އަލަށް މޫދުކޮށީގައި ބޮޑުކޮށްފައިވާ ކަސް ފާނަ ނުވަތަ ބްރައުން މާބެލްޑް ގްރޫޕާއެވެ.
އދ. މަހިބަދޫގައި އާލާކޮށްފައިވާ އެ ފާނަތައް ނީލަމުގައި ވިއްކަން ނިންމައި ރަޖިސްޓްރީންވާން މިދިޔަ މަހު މެދުތެރޭވެސް ހުޅުވާލިއެވެ. ނަމަވެސް އެކަމަށް އެެއްވެސް ފަރާތަކުން އަގު ހުށަހަޅާފައިނުވާ ކަމަށްވެސް މިނިސްޓްރީން ބުންޏެވެ.
އެހެންކަމުން މިފަހަރު އަނެއްކާވެސް އަލުން ނީލަމުގައި ރަޖިސްޓްރީވާން ވަނީ ފުރުސަތު ހުޅުވާލައިފައެވެ. އަދި ކުރިން ރަޖިސްޓްރީވެފައިވާ ފަރާތްތަކުން އަލުން ރަޖިސްޓްރީވާކަށް ނުޖެހޭނެކަމަށްވެސް މިނިސްޓްރީން ބުންޏެވެ. މިފަހަރު ހުޅުވާލައިފައިވަނީ ވަކި ވަކި ކޮށީގައި ހުރި ފާޏަ ވިއްކާލުމަށެވެެ.
ނީލަމަށް ޚާއްސަކުރެވިފައިވާ މޯލްޑިވްސް މެރިން ރިސާޗް އިންސްޓިޓިއިޓުގެ ވެބްޕޭޖްއިން ނީލަމުގައި ބައިވެރިވެވޭނެއެވެ.
ނީީލަމުގައި ވިއްކަން ނިންމާފައިވަނީ އދ. މަހިބަދޫގެ ހަތް ގޭބިސީއަކުން ބޮޑުކޮށްފައިވާ ފާނައެވެ. މިއީ ފާނަ މާކެޓް ސައިޒަށް ބޮޑުކުރުން ތަޖުރިބާކުރުމަށް ހިންގަމުންދާ ހަރަކާތުގެ ތެރެއިން ބޮޑުކޮށްފައިވާ ފާނަތަކެކެވެ. ވިއްކާލުމަށް ހަމަޖެހިފައިވަނީ ބަރުދަނުގައި 450 ގްރާމަށްވުރެ ބޮޑުވެފައިވާ ފާނައެވެ. 437 އާއި 715ދެމެދުގެ އަދަދަކަށް މާކެޓް ސައިޒުގެ ފާނަ ވަކިވަކި ކޮށިތަކުގައި ވަނީ ސްޓޮކް ކޮށްފައެވެ.
މިއީ ވޯލްޑް ބޭންކްގެ އެހީގައި ފިޝަރީޒް މިނިސްޓްރީން ހިންގާ "ސަސްޓެއިނަބަލް ފިޝަރީޒް ރިސޯސަސް ޑިވެލޮޕްމަންޓް ޕްރޮޖެކްޓް" ގެ ދަށުން ރާއްޖޭގައި މެރިކަލްޗަރ ދާއިރާއެއް އުފެއްދުމަށް ކުރެވޭ މަސައްކަތްތަކެއްގެ ތެރެއިން، އދ. އަތޮޅުގެ 4 ރަށަކަށް އަމާޒުކޮށްގެން ހިންގަމުންދާ ހަރަކާތެއްގެ ދަށުން އާލާކޮށްފައިވާ ފާނަތަކެވެ.
އެގޮތުން، އދ. އަތޮޅު ކައުންސިލާއި، އެ އަތޮޅު މަހިބަދޫ، އޮމަދޫ، ދިގުރަށް އަދި ދަނގެތީ ކައުންސިލާއި ގުޅިގެން ހިންގާ ފާނަ ބޮޑުކުރުމުގެ ޕައިލެޓް ހަރަކާތުގައި ޖުމްލަ 19 ގޭބިސީއަކުން ވަނީ ފާނަ ބޮޑުކުުރުމުގެ ތަޖުރިބާގެ މަސައްކަތް މިދިޔަ ޖެނުއަރީ މަހު ވަނީ ފަށައިފައެވެ.