އައްޑޫ ސިޓީ ވިލިނގިލީގައި ހިންގާ ޝަންގްރިލާ ވިލިނގިލި ރިސޯޓު ހުޅުވުން މުއްދަތެއް ނެތްގޮތަށް ފަސްކޮށް، އެ ރިސޯޓުގެ މުވައްޒަފުން ވަޒީފާއިން ވަކިކުރަން ނިންމައިފި އެވެ.
ޝަންގްރިލާ ވިލިނގިލި ރިސޯޓު ހިންގަނީ ޝަންގްރިލާ މޯލްޑިވްސް ލިމިޓެޑާއި ދިވެހި ސަރުކާރު ގުޅިގެން އުފައްދާފައިވާ ޖޮއިންޓް ވެންޗާ ކުންފުނި "އައްޑޫ އިންވެސްޓްމެންޓްސް ޕްރައިވެޓް ލިމިޓެޑް"އިންނެވެ.
އެ ރިސޯޓުގެ ޖެނެރަލް މެނޭޖަރު ރަހީމް ފްލިން ސޮއިކުރައްވާ މުވައްޒަފުންނަށް ފޮނުވި ލިޔުމުގައި ބުނެފައި ވަނީ ކޮވިޑް19އާ ގުޅިގެން މި އަހަރުގެ އޭޕްރީލް މަހުން ފެށިގެން ރިސޯޓު ބަންދުކޮށްފައިވާ ކަމަށާއި، ރިސޯޓު މެނޭޖުމެންޓާއި އައްޑޫ އިންވެސްޓްމެންޓް ޕްރައިވެޓް ލިމިޓެޑުގެ ބޯޑު ޑިރެކްޓަރުން މިއަދާ ހަމައަށް މަސައްކަތް ކުރަމުން ދިޔައީ މުވައްޒަފުންނާއި ފަތުރުވެރިންގެ ސަލާމަތައި ރައްކާތެރިކަން ކަށަވަރުކޮށް ރިސޯޓުގެެ ހިދުމަތް އަލުން ދޭން ފެށޭނެ ގޮތްތަކެއް ހޯދުމަށް ކަމަށެވެ.
ނަމަވެސް މިހާރު ފެންނަ މަންޒަރުން ރިސޯޓު ހުޅުވައިގެން ހިންގޭނެ ކަމަށް ނުފެންނާތީ، މިއަދުން ފެށިގެން ވަކި މުއްދަތެއް ނެތްގޮތަށް ރިސޯޓުގެ އޮޕަރޭޝަންތައް ހުއްޓާލަން ނިންމާފައިވާ ކަމަށް އެ ލިޔުމުގައި ބުންޏެވެ.
މީގެެ އިތުރުން ރިސޯޓުގެ މުވައްޒަފުންގެ ތެރެއިން މެއިންޓެނަންސް މަސައްކަތަށް ބޭނުންވާނެ މަދު މުވައްޒަފުންތަކެއް ބޭތިއްބުމަށް ފަހު އެހެން މުވައްޒަފުން ވަޒީފާއިން ވަކިކުރަން ނިންމާފައިވާ ކަމަށް އެ ލިޔުމުގައި ބުންޏެވެ.
މިއީ ދަތި އުނދަގޫ ނިންމުމެއްކަން ފާހަގަކޮށް އެ ލިޔުމުގައި ބުނީ އެޗްއާރު ޑިޕާޓްމެންޓުން މުވައްޒަފުންނާ ގުޅިގެން މަސައްކަތް ކުރިއަށް ގެންދާނެ ކަމަށެވެ.
ކޮވިޑް19އާ ގުޅިގެން ރާއްޖޭގެ އިގްތިސޯދު އޮތީ މަޑުޖެހިފަ އެވެ. މިދިޔަ މަހުގެ 15ގައި ބޯޑަރު ހުޅުވި ނަމަވެސް ފަތުރުވެރިން އަންނަ މިންވަރު މަދެވެ. ގިނަ ރިސޯޓުތައް އަދި ނުހުޅުވާއިރު، ކޮވިޑް ފެތުރޭ މިންވަރު ކޮންޓްރޯލު ނުވާތީ އެމެރިކާގެ ސީޑީސީއިން ވަނީ ރާއްޖެއަށް ދަތުރު ނުކުރުމަށް އެދި ޓްރެވަލް އެޑްވައިޒަރީއެއް ވެސް ނެރެފަ އެވެ.