ބޮގޮޓާ (އޮގަސްޓު 17): ކޮލޮމްބިއާގެ ނަރީނިޔޯ ޕްރޮވިންސުގައި މިދިޔަ ހޮނިހިރު ދުވަހު ބަޑި ޖަހާ އަށް މީހަކު މަރާލި ހާދިސާއާ ގުޅޭ މައުލޫމާތު ފޯރުކޮށްދޭ މީހަކަށް އެގައުމުން އިނާޔާތެއްގެ ގޮތުގައި 200 މިލިއަން ޕޭސޯސް (53،000 ޑޮލަރު) ދޭނެ ކަމަށް ބުނެފި އެވެ.
ނަރީނިޔޯގެ ސަމަނިއޭގޯގައި އެ ހަމަލާ ދިނީ 20 ވަރަކަށް ޒުވާނުން ޕާޓީއެއް ބާއްވަމުން ދިޔަ ގެޔެއްގަ އެވެ. އަދި އޭގެ ތެރޭގައި ގިނައިން ތިބީ ޔުނިވާސިޓީ ދަރިވަރުންނާއި އެއަށް ވަރު ހަގު ކުދިންނެވެ.
އެ ހަމަލާއިން ސަލާމަތްވި ބައެއް މީހުން ކޮލޮމްބިއާގެ ނޫހަކަށް މައުލޫމާތު ދިން ގޮތުގައި ހޮނިހިރު ދުވަހު އެ ޕާޓީ ނުބޭއްވުމަށް އަންގާ އެމީހުންނަށް ބަޔަކު ވަޓްސްއެޕް މެދުވެރިކޮށް އިންޒާރު ދިނެވެ. އަދި ޕާޓީ ކުރިއަށް ދަނިކޮށް ސައިކަލުގައި ތިބި ބަޔަކު ވަދެ، ބަޑިން ހަމަލާ ދިނީ އެވެ.
އެ ހާދިސާގައި މަރުވީ ހަތް ފިރިހެނުންނާއި އަންހެނެކެވެ. އަދި އެ ހަމަލާގައި ފަސް މީހަކަށް އަނިޔާވި އެވެ.
ކޮލޮމްބިއާގެ ސަރުކާރުން ވަނީ އެ ހަމަލާ ދިން މީހުން ހޯދާނެ ކަމުގެ ޔަގީންކަންދީ، އެމީހުން ހައްޔަރު ކުރުމަށް ބޭނުންވާ މައުލޫމާތު ފޯރުކޮށްދޭ ފަރާތަކަށް އިނާޔަތެއް ހުށަހަޅައިފަ އެވެ.
ކޮލޮމްބިއާގެ ބައެއް އޮފިޝަލުން ވަނީ، އެގައުމާއި އިކުއެޑޯ ގުޅޭ ބޯޑަރު ކައިރީގައި އެ ހާދިސާ ހިނގީ މަސްތުވާތަކެތީގެ ވަގުފާރި ކުރާ ގޭންގުތަކެއްގެ މެދުގައި ހިނގި ހަމަނުޖެހުމެއްގެ ސަބަބުން ކަމަށް ތުހުމަތުކޮށްފަ އެވެ.