ފިލްމު "ތޭޒާބް"ގެ ލަވަ "އޭކް ދޯ ތީން" އިން ބޮޑު މަގްބޫލުކަމެއް ހޯދި މަދޫރީ ޑިކްސިޓް މަޝްހޫރުވެފައި ވަނީ ކުޅަދާނަ ނެށުންތެރިއެއްގެ ގޮތުގައެވެ.
މޮޅު ފިލްމުތަކެއް ކުޅެދީފައިވާ މަދޫރީއަކީ މޮޅު ނެށުންތެރިއެއްކަމަށް އެންމެންވެސް އެއްބަސްވެއެވެ. މިފަހަރު މަދޫރީ މި ދައްކާލީ އޭނާގެ އާ ހުނަރެކެވެ. އޭނާގެ އަމިއްލަ އަޑުން ކިޔާފައިވާ ހިތްގައިމު ލަވައެއް މިވަނީ މިހާރު އާންމުވެފައެވެ. ސޯޝަލް މީޑިއާގައި މި ލަވަ ދައުރުވަމުން އަންނައިރު މި ލަވައަކީ ކޮރޯނާވައިރަހާ ގުޅުވައިގެން ނެރުނު ލަވައެކެވެ.
"ކެންޑްލް"ގެ ނަމުން ނަންދީފައިވާ މި ލަވައަށް ބޮޑު މަގްބޫލުކަމެއް ލިބެމުން އަންނައިރު ގިނަ ބަޔަކު އަންނަނީ މަދޫރީއަށް ވެސް ތައުރީފްކުރަމުންނެވެ. މަދޫރީ ބުނީ މި ލަވަ އޭނާގެ ފޭނުންނަށް ކަމުދާނެކަމަށް އުންމީދުކުރާ ކަމަށެވެ. މި ލަވައިގައި ކޮވިޑް19 އާއި ގުޅިގެން ފްރޮންޓްލައިނުގައި މަސައްކަތް ކުރާ މީހުން ކުރަމުންދާ ބުރަ މަސައްކަތްތައް ފެނިގެންދެއެވެ.
ބަތަލާ މަދޫރީ އެންމެ ފަހުން ފެނިގެންދިޔައީ ކަރަން ޖޯހަރުގެ "ކަލަންކް" އިންނެވެ.