ކުޑައިރުގެ ފޮނިފޮނި ހަނދާނެއް އާކޮށްލަން ހިނގާށެވެ. އަހަރެމެން ރޮއެެގެންވެސް އެންމެ މީރުކޮށް ޒިލޭބި ހަދާ ގެއަކުން ހަވީރު ސައި ފުރިހަމަކޮށްލުމަށް ޒިލޭބީ ގަންނަށް ކުސްތަޅާ ހަނދާން އެބަހުރިކަން ގައިމެވެ.
އޭރުވެސް މިހާރުވެސް ޒިލޭބިއޭ ބުނެފިނަމަ އަހަރެމެން ހޭވައްލާ ތައްޔާރެވެ. މިލޮކްޑައުންގައި ރޯދަމަހު ސުފުރާމަތިން ޒިލޭބި "މިސްވާނެ" ގޭގެ ބައިވަރެވެ.
އައިމިނަތު ރުޚުޝާ(ތޫތަ) މިއަދު ސަންބަދިގެއަށް ހިއްސާކޮށްލި ރެސިޕީއަކީ މިއީ އެކަމުގެ ފަރުވާ އެވެ.
ގޭގެ ބަދިގޭގެ "ސްޓޭޕްލް" ހަރުން އެއްޗެހި ހަމަކޮށްލައިގެން މިކަން ކޮށްލެވޭނެކަމުގެ ޔަޤީންކަން ތޫތަ އަހެރެމެންނަށް ދެއެވެ.
ބޭނުންވާތަކެތި:
ޒިލޭބި
- 2 ޖޯޑު ފުށް
- 1 މޭޒުމަތީ ސަމުސާ ކޯން ފްލަރ
- 1 ޖޯޑު ފެން
- 1 މޭޒުމަތީ ސަމުސާ ޔީސްޓް
- 1 މޭޒުމަތީ ސަމުސާ ހަކުރު
- 1/2 ޖޯޑު ތާފަނާ ފެން
- 1/2 މޭޒުމަތީ ސަމުސާ ކާކުލަ (ރަތް)
- ތެޔޮ (ޒިލޭބި ތެލަށްއެޅުމަށް)
ޝުގަރ ސިރަފް
- 3 ޖޯޑު ހަކުރު
- 1 1/2 ޖޯޑު ފެން
- ލިބޯ ފަޅިއެއްގެ ހުތް
- 1 ސައިސަމުސާ ވެނީލާ އެސެންސް
ތައްޔާރުކުރާނެގޮތް
1/2 ޖޯޑު ތާފަނާ ފެނުގައި ޔީސްޓް އަދި ހަކުރު މިކްސް ކޮށްލާށެވެ. ފަސްވަރަކަށް މިނެޓު ބެހެއްޓުމުން މި މިކްސްއިން ފޮނުއަރާލާނެއެވެ. މާ ހޫނު ފެނުގައި ޔީސްޓް އަދި ހަކުރު އެއްކޮށްލެވިއްޖެނަމަ އަހަރެމެން މި ބޭނުންވާ 'ފްރޮތީ" މިކްސްޗަރ އެއް ނުހެދޭނެއެވެ.
އެއަށްފަހު ޒިލޭބި ތައްޔާރުކުރަން ބޭނުންވާ 2 ޖޯޑު ފުށް، 1 މޭޒުމަތީ ސަމުސާ ކޯންފްލަރ، 1 މޭޒުމަތީ ސަމުސާ ޔީސްޓް، 1 މޭޒުމަތީ ސަމުސާ ހަކުރު އަދި ކާކުލަ އާއި ޔީސްޓް މިކްސްގެ އިތުރުން ޖޯޑެއްގެ ފެން ބޯތައްޓަކަށް އަޅާ ރަނގަޅަށް ވިސްކް ކޮށްލާށެވެ. ވިސްކްއެއް ނެތްނަމަ ދޭފަތެއް ފަދަ އެއްޗަކުން ނަމަވެސް ރަނގަޅަށް އެއްކޮށްލާށެވެ.
މިކްސްޗަރ ތައްޔާރުވުމުން ކްލިންގ ފިލްމް ނުވަތަ ޕްލާސްޓިކް ރެޕް އެޅުމަށްފަހު 2 ގަޑިރުވަންދެން ބަހައްޓާލާށެވެ. މިއީ މިކްސް ރަނގަޅަށް "ފާރމެންޓް" ވެ ނުވަތަ ފުފުމަށެވެ. އަހަރެމެން ޒިލޭބި ތެލަށް އެޅުމަށް ބޭނުންވާ ކޮންސިސްޓެންސީ ލިބޭނީ އޭރުންނެވެ.
މިވަގުތުކޮޅު ޝުގަރ ސިރަޕް ހަދަމާ ހިނގާށެވެ. އުނދަގުލެއް ނުވާނެއެވެ. 3 ޖޯޑު ހަކުރާއި، ފެން، ލިބޯފަޅިއެއްގެ ހުތް އަދި 1 ސައިސަމުސާ ވެނީލާ އެސެންސް 10 ވަރަކަށް މިނެޓް ވަންދެން ކައްކާލާށެވެ.
ޒިލޭބިތައް ތެލަށް އެޅުމަށްޓަކައި ޕައިޕިންގ ބޭގަކަށް އަޅާށެވެ. ނުވަތަ ޒިޕްލޮކް ބޭގަކަށް އެޅުމަށްފަހު ކޮޅު ކަނޑާލާށެވެ.
ވެޖިޓަބަލް އޮއިލް ކޮޅެއް އަޅާ ތެޔޮގަނޑު ހޫނުވުމުން ވީޑިއޯ އިން ފެންނަގޮތަށް ޕައިޕިންގ ބޭގް އިން ތެޔޮގަނޑަށް ޒިލޭބި ފުށްގަނޑު އަޅަމުން ގެންދާށެވެ. ފުސްގަނޑު ރަނގަޅަށް ތެލަށް އެޅުމުން ތެޔޮގަނޑުގެ މައްޗަށް އަރާނެއެވެ. އަދި އިތުރު 2 މިނެޓު ތެޔޮގަނޑުގައި ޒިލޭބި ފްރައި ކޮށްލާށެވެ.
ހޫނު ޒިލޭބި ނަގާގޮތަށް ޝުގަރ ސިރަޕްއަށް އަޅަމުން ގެންދާށެވެ. ޝުގަރ ސިރަޕް ހުންނާނީ މިހާރު ހިހޫވެފައެވެ.
ކަމުދާ މިންވަރަކަށް ޝުގަރ ސިރަޕްގައި ޒިލޭބި ފޯކޮށްލުމަށްފަހު އަވަހަށް ރަހަ ބަލާލާށެވެ.
ދެކުނު އޭޝިޔާގައި ޚާއްސަކޮށް އިންޑިޔާ އަދި މެދުއިރުމަތީގައިވެސް މަޤުބޫލް ޒިލޭބި އަކީ ތިހީކުރާ ވަރަށް ވުރެ ފަސޭހައިން ތައްޔާރުކޮށްލެވޭ އެއްޗެކެވެ.
ލޮކްޑައުންވިޔަސް މިހާރު ހާސްވާނެކަމެއްނެތެވެ. ޒިލޭބި "ކްރޭވިންގ" އެއް އަންނަށްއިރަށް ފޮނިތޮށިއެމްވީގެ ފަސޭހަ މިރެސިޕީ ތައްޔާރުކޮށްލާށެވެ!