މާލޭގައި އޯޓަމެޓިކް ޕެޓްރޯލް ސްޓޭޝަންތަކެއް ގާއިމް ކުރަން ނިންމާފައިވާކަމަށް ފިއުލް ސަޕްލައި މޯލްޑިވްސް (އެފްއެސްއެމް) އިން ބުނެފިއެވެ.
ސަރުކާރުގެ މައި ވިޔަފާރި ކުންފުނި، އެސްޓީއޯގެ ސަބްސިޑަރީ ކުންފުންޏެއް ކަމަށްވާ ފިއުލް ސަޕްލައި މޯލްޑިވްސްގެ މެނޭޖިން ޑިރެކްޓަރު މުހައްމަދު ގަސަމް މިރޭ "ސަން" އަށް ވިދާޅުވީ މާލޭގައި ގާއިމް ކުރާ އޮޓަމެޓިކް ސްޓޭޝަންތައް ގާއިމް ކޮށް ނިމުމުން ދެން މާލޭގައި ޕެޓްރޯލު އެޅުމުގެ ހިދުމަތް ލިބޭނީ އެ ސްޓޭޝަންތަކުން އެކަނި ކަމަށެވެ.
އެގޮތުން މިހާރުވެސް އެފްއެސްއެމްގެ ޕެޓްރޯލު ޝެޑު އެކެއް ހިންގާ ފަތާ ޓްރެކް ސަރަހައްދުގެ އިތުރުން އިންޑަސްޓްރިއަލް ވިލެޖުގައި އޮޓަމެޓިކް ޕެޓްރޯލު ސްޓޭޝަންތައް ގާއިމް ކުރަން ނިންމާފައިވާ ކަމަށް ގަސަމް ވިދާޅުވިއެވެ.
އޮޓަމެޓިކް ޕެޓްރޯލް ސްޓޭޝަނެއް ---
"ޓްރެކް ސަރަހައްދުގައި ހުންނަ ޝެޑާ އިންވެގެން ހުންނަ ހަކަތަ ޕެޓްރޯލް ޝެޑު އެފްއެސްއެމް އަށް ލިބޭގޮތަށް އޮތީ. ހަކަތައަށް އޭގެ ބަދަލުގައި އެހެން ބިމެއް ހަމަޖެހުނުހާ އަވަހަކަށް އެ ތަން ލިބޭނެ. އަޅުގަނޑުމެން ނިންމާފައި އޮތީ މިހާރުވެސް އެތަނުގައި ހިންގާ ޝެޑާ އެއްކޮށްލައިގެން ހިދުމަތް ދޭން،" ގަސަމް ވިދާޅުވިއެވެ.
"އޭގެ އިތުރުން އެފްއެސްއެމް އިން މިހާރު އިންޑަސްޓްރިއަލް ވިލެޖުގައި ހިންގާ ޝެޑުގެ އިތުރުން އިތުރު ބިމެއް ލިބޭގޮތަށް އޮތީ. އެ ތަނުގައި ވެސް އޮޓަމެޓިކް ސްޓޭޝަނެއް ގާއިމް ކުރާނެ،" ގަސަމް ވިދާޅުވިއެވެ.
ގަސަމް ވިދާޅުވީ މި ޕެޓްރޯލު ސްޓޭޝަންތައް ގާއިމް ކުރުމަށް މިއަހަރަށް ބަޖެޓުކޮށްފައިވާ ކަމަށާއި ޕްލޭނިން މިނިސްޓްރީ އިން ހޯދަންޖެހޭ ހުއްދަތަކުގެ މަސައްކަތް ކުރަމުންދާ ކަމަށެވެ. އަދި ޕެޓްރޯލު ޝެޑުތަކުގެ ޑިޒައިން މަސައްކަތްވެސް މިހާރު ކުރިއަށްދާ ކަމަށާއި ނަމަވެސް ކޮވިޑް19 ހާލަތާއެކު މަސައްކަތަށް މަޑުޖެހުމެއް އައިސްފައިވާ ކަމަށް އޭނާ ވިދާޅުވިއެވެ.
ގަސަމް ވިދާޅުވީ މަސައްކަތް ކުރާނީ ފަހަރަކު ޝެޑެއްގެ މަސައްކަތް ނިންމުމަށް ކަމަށާއި ޝެޑެއް ހަތަރެއް ނޫނީ ފަސް މަހުން ނިންމާލެވޭނެ ކަމަށެވެ. ނަމަވެސް މިހާރު ހާލަތު އޮތްގޮތުން މަސައްކަތް ފެށޭނެ ދުވަހެއް ބުނަން ދަތިކަމަށް އޭނާ ވިދާޅުވިއެވެ.
"ސަރުކާރުން ބުނެފައި އޮތީ މި ދެ ޝެޑް ގާއިމް ކުރުމުން ދެން ކާނިވާ ސަރަހައްދުގައި ހުންނަ ޝެޑާއި އައިޖީއެމްއެޗު ސަރަހައްދުގައި ހުންނަ ޝެޑް ބަންދު ކުރަން ޖެހޭނެ ކަމަށް،" އެފްއެސްއެމްގެ އެމްޑީ ވިދާޅުވިއެވެ.
މާޗް 22، 2020: ރޭއްޖޭގައި ވެސް ފެތުރެމުންދާ ކޮވިޑް-19 އާ ގުޅިގެން ރައްކާތެރިވުމަށް ފޭސް މާސްކު އެޅުން -- ސަން ފޮޓޯ/ ފަޔާޒު މޫސާ
ކޮވިޑް19 ގެ ހާލަތުގައި އެފްއެސްއެމް އިން ހިދުމަތްދެނީ ޓްރެކު ސަރަހައްދުގައި ހުންނަ އެފްއެސްއެމް 1 އަދި ހުޅުމާލޭގައި ހުންނަ އެފްއެސްއެމް4 އިންނެވެ. ކޮންމެ ދުވަހެއްގެވެސް ހެނދުނު 10 އިން ހަވީރު ފަހަކަށް އަދި ރޭގަނޑު 8:30 އިން 12:00 އަށް ހިދުމަތް ދެއެވެ.
ކަސްޓަމަރުން ހިދުމަތް ހޯދަން އަންނައިރު މާސްކު އަޅަން އެފްއެސްއެމް އިން އެދެއެވެ. އެފްއެސްއެމް އިން ވަނީ ބީއެމްއެލް ކާޑު ބޭނުންކޮށްގެން ޕެޓްރޯލު ޝެޑުތަކުގައި ފައިސާ ދެއްކޭނެ އިންތިޒާމުވެސް ހަމަޖައްސައިފައެވެ.