ރ. ފައިނަކީ ޒަމާނުއްސުރެ ދަނޑުވެރި ރަށެކެވެ. އެ ރަށުގައި އާންމުކޮށް ދަނޑު ހައްދައި އުޅެނީ ރޯދަމަހަށެވެ. ކަރާ، ބަރަނބޯ، މިރުސް، ބަޓާނާ އަދި ކިއުކަމްބާ ފަދަ ތަކެތި އެ ރަށުގައި ހައްދައި މާރުކޭޓަށް ނެރެ އެވެ. ގިނަ ބަޔަކަށް އެކަމުން މަންފާ ކުރެ އެވެ.
ރައީސް އަބްދުﷲ ޔާމީންގެ ސަރުކާރުގައި ފައިނުގައި އެއާޕޯޓަކާއި ސިޓީހޮޓަލެއް އަޅަން ނިންމުމުން އެކަން ވެގެން ދިޔައީ، އެ ރަށުގައި ކުރަމުން އައި ދަނޑުވެރިކަމަށް ކުރިމަތިވި ނުރައްކަލަކަށެވެ. އެ ރަށުގެ ދަނޑުވެރިކަން ނެތިގެންދާނެ ކަމުގެ ބިރު އޭރު އޮތެވެ. އެހެންކަމުން، މުޅި ރާއްޖޭގައިވެސް އެ މަޝްރޫއާ ދެކޮޅަށް އަޑުއުފުލައި، "ސޭވް ފައިނު"ގެ ނަމުގައި ކެމްޕޭނެއްވެސް ފެށި އެވެ. އެންމެފަހުން އީޕީއޭއިން ނިންމީ އެ މަޝްރޫއު ކުރިއަށް ގެންދަން ހުއްދަ ނުދިނުމަށެވެ.
އީއައިއޭ ރިޕޯޓަށް ބެލުމަށް ފަހު އެއާޕޯޓު މަޝްރޫއު ކުރިއަށް ގެންދަން އީޕީއޭއިން ހުއްދަ ނުދިން ސަބަބުތަކުގެ ތެރޭގައި މަޝްރޫއިން އަސަރު ކުރާނެ މީހުންގެ މަޝްވަރާ ހޯދާފައި ނުވުން ހިމެނެ އެވެ. އޭގެ ތެރޭގައި އެއާޕޯޓު އަޅާ ސަރަހައްދުގައި ދަނޑުވެރިކަން ކުރާ މީހުންވެސް ހިމެނޭ ކަމަށް އީޕީއޭގެ ނިންމުމުގައިވެ އެވެ.
ފައިނުގައި އެއާޕޯޓު މަޝްރޫއު އާއި ސިޓީ ހޮޓާގެ މަޝްރޫއު ކުރިއަށް ގެންދަން ނިންނި ސަރަހައްދު --
މިއަދު ސަރުކާރުން ވަނީ ކާނާގެ އުފެއްދުންތެރިކަން އިތުރުކޮށް ކާބޯތަކެތި ލިބޭނެކަން ޔަގީންކުރުމަށް މުޅި ރާއްޖޭގައި ދަނޑުވެރިކަން ކުރުމުގެ ޕްރޮގްރާމެއް ފަށަން ނިންމައިފައެވެ. ސަރުކާރުން ބޭނުންވަނީ ފައިނު ފަދަ ބިންބޮޑު ރަށްތަކުގައި ދަނޑުބިން ދޫކޮށްގެން އާންމުން ލައްވައި ދަނޑުވެރިކަން ކުރުމަށެވެ. ރާވާފައި އޮތީ އާންމުން ހައްދާ ހުރިހާ އެއްޗެއް ސަރުކާރު ކުންފުންޏެއް މެދުވެރިކޮށް ގަނެ މާކެޓު ކުރުމެވެ. މިފަދަ ދަނޑިވަޅެއްގައި ފައިނު ފަދަ ބިންބޮޑު، ބިން ހެޔޮ ރަށެއްގެ މުހިންމުކަން ބައެއް މީހުން ދަނީ ފާހަގަ ކުރަމުންނެވެ. އަދި ފައިނުގައި އެއާޕޯޓު އެޅުވުމާ ދެކޮޅަށް މަސައްކަތް ކުރީ މިފަދަ ދުވަހަކަށްޓަކައި ކަމަށް އެކަމަށް ވަކާލާތު ކުރި މީހުން ދަނީ ބުނަމުންނެވެ.
މިހާތަނަށް ފައިނުގައި ކުރަމުން އައީ މޫސުމީ ދަނޑުވެރިކަމެކެވެ. ދަނޑުބިންތައް ދޫކުރަމުން އައީ ހަ މަހަށެވެ. އެހެންނަމަވެސް، ދިގު މުއްދަތަކަށް ބިން ދޫކޮށްގެން ދަނޑުވެރިކަން ކުރުވުމުގެ ވިސްނުން މިހާރު ކައުންސިލުން ގެންގުޅެއެވެ. އަދި ދަނޑުވެރިކަމަށް ދޫކުރާ ބިން ދޫކުރުމުގެ ވިސްނުންވެސް ކައުންސިލުން ގެންގުޅެއެވެ.
ފައިނުން ވާހަކަ ދެއްކި ދަނޑުވެރިއެއް ކަމަށްވާ އަހުމަދު ވަހީދު ބުނީ ކުރިއަށް އޮތްތަނުގައި ތަންކޮޅެއް ފުޅާކޮށް ދަނޑުވެރިކަން ކުރުމުގެ ވިސްނުން ގެންގުޅޭ ކަމަށެވެ. އެއާޕޯޓު އެޅި ނަމަ މިއަދު އޭނާއަށް އެކަމެއް ނުކުރެވޭނެއެވެ. ފުޅާ ދާއިރާއެއްގައި ދަނޑުވެރިކަން ކުރާނެހާ ބިމެއްވެސް ނޯންނާނެ އެވެ.
ވަހީދު ބުނީ، އޭނާއަށް އަބަދުވެސް މުހިންމުވީ އެއާޕޯޓަށް ވުރެ ރަށުގެ ދަނޑުބިންތައް ކަމަށެވެ. މިއަދު ދަނޑުވެރިކަން ކުރާނެ ބިން ހުރީތީ އޭނާ އުފާ ކުރެ އެވެ. އޭނާގެ އިތުރުން ގިނަ އަދަދެއްގެ ދަނޑުވެރިން އެކަމަށް އުފާ ކުރެ އެވެ.
"ދަނޑުބިން އިހްތިޔާރު ކުރީ އޭރުވެސް މިހާރުވެސް. ދަނޑުބިން އެކަންޏެއް ނޫން އެއާޕޯޓު އަޅަން ރާވާފައި އޮތް ގޮތުން ރަށުގެ ވަރަށް ބޮޑު ބައި ދާއިމަށް ގެއްލޭ. އަޅުގަނޑުމެންނަށް މާ މިހިންމު ދަނޑުވެރިކަމާއި ވަށައިގެންވާ ބީޗާ އެ ހުރިހާ އެއްޗެއް،" ވަހީދު ވިދާޅުވި އެވެ.
ފައިނު ހިމެނޭ އޫނގޫފާރު ދާއިރާގެ މެމްބަރު އަދި އެ ރަށަށް އުފަން، މުހައްމަދު ވަހީދު (ވައްޑޭ) އަކީ ފައިނު ސަލާމަތް ކުރަން ވަކާލާތު ކުރި އެކަކެވެ. އޭނާ "ސަން"އަށް ވިދާޅުވީ، ފައިނުގައި އެއާޕޯޓު ނޭޅީ ސޭވް ފައިނު މޫވްމަންޓުގެ މަސައްކަތުން ކަމަށެވެ. އަދި އޭރުވެސް އެ ބޭފުޅުން ދައްކަމުން ދިޔަ ވާހައަކީ އެއާޕޯޓާއި ސިޓީ ހޮޓާ އަޅައިފި ނަމަ ރަށުގެ ދަނޑުބިންތައް ގެއްލިގެންދާނެ ވާހަކަ ކަމަށް އޭނާ ވިދާޅުވި އެވެ.
ވައްޑޭ އަދި ފާހަގަ ކުރެއްވި ގޮތުގައި އެއާޕޯޓް އަޅަން ހިއްކާނެ ވަރުގެ ފަޅެއް އެ ރަށުގައި ނެތުމުން އެއާޕޯޓް އަޅަން ރޭވީ ރަށު ބިމުގައި ކަމަށެވެ. އެހެން ކަމުން، އެއާޕޯޓް އެޅި ނަމަ ރަށުގެ މީހުން ދިރިއުޅޭ ސަރަހައްދު ނޫން ބޮޑު ބައެއް ގެއްލިގެން ދާނެ ކަމަށް އޭނާ ވިދާޅުވި އެވެ.
ފައިނު ކައުންސިލުގެ ރައީސް އިބްރާހިމް ނާސިރު "ސަން"އަށް ވިދާޅުވީ، ފައިނުގައި އެއާޕޯޓު އެޅި ނަމަވެސް އެ ރަށުގައި ދަނޑުވެރިކަން ކުރެވޭނެ ކަމަށެވެ. އަދި އެއާޕޯޓުގެ ސަރަހައްދުގެ ތެރޭގައި ހިމެނޭނީ ރަށުގެ އިރުމަތީގައި އޮންނަ ދަނޑުބިން އެކަނި ކަމަށް އޭނާ ވިދާޅުވި އެވެ.
"އެއާޕޯޓު އަޅަން އޮތް އޭރިއާ އަކީ ފުނަ ގަސްތަކެއް ހުރި ސަރަހައްދެއް. ދަނޑުބިމަށް ދޭ ސަރަހައްދަކަށް އެ ބިމެއް ނުވާނެ. އެހެންވީމަ ދަނޑުވެރިކަން މި ކުރާ އާބާދީއަށް ބޭނުންވާ ވަރަށް ބިން އޮންނާނެ. އެއާޕޯޓު އައި ނަމަ އިތުރު ތަރައްގީއާއި އިތުރު ކުރިއެރުންތައް ލިބި ރައްޔިތުންގެ ފުދުންތެރިކަން ހުންނާނީ އިތުރުވެފައި،" ނާސިރު ވިދާޅުވި އެވެ.
ނާސިރު ވިދާޅުވި ގޮތަށް ރަށުގައި އިރުމަތީ ފަރާތުގެ ދަނޑުބިން އެއްކޮށް އެއާޕޯޓުގެ ބައުންޑަރީގެ ތެރޭގައި ހިމެނެ އެވެ. އަދި، އެއާޕޯޓު މަޝްރޫއާ އެކު ކުރިއަށް ގެންދަން ނިންމި އެހެން މަޝްރޫއުތައް ހިންގަން ރާވާފައި އޮތީ ރަށުގެ ހުޅަނގު ފަރާތު ދަނޑުބިންތައްވެސް ހުންނަ ސަރަހައްދުގަ އެވެ.
ފައިނުގެ ގަސްގަހާ ގެހި ބެހިގެންވާ ގޮތް: އެ ރަށުގެ ދެ ސަރަހައްދެއްގައި ދަނޑުބިން ހުރޭ --
ފައިނުގެ އެއާޕޯޓު މަޝްރޫއާ އެކު އެ ރަށުގައި ސިޓީ ހޮޓަލެއް ތަރައްގީ ކުރުމުގެ ޕްލޭނުވެސް ކުރީގެ ސަރުކާރުން ގެންގުޅުނެވެ. އަދި އައިލެންޑް އޭވިއޭޝަންގެ ޓްރެއިނިން ސެންޓަރަކާއި ކާގޯ ވިލެޖެއްވެސް ތަރައްގީ ކުރުމުގެ ވިސްނުން ގެންގުޅުނެވެ. ސިޓީ ހޮޓާ އަޅަން ރާވާފައި އޮތީ ފައިނުގެ ހުޅަނގު ފަރާތުގައި އޮންނަ ދަނޑުބިންތައް އޮންނަ ސަރަހައްދުގަ އެވެ. އެއާޕޯޓު މަޝްރޫއާ އެކު މަޝްރޫއުތައް ކުރިއަށްގެންދިޔަ ނަމަ މިހާރު އެ ދަނޑުބިންތަކެއް ނޯންނާނެ އެވެ. އެއީ އެ ރަށު މީހުން މިއަދު ޝުކުރުވެރިވާ ކަމެކެވެ.