މިހާރު ފެތުރެމުންދާ ކޮރޯނާ ވައިރަހުން ރައްކާތެރިވުމުގެ ގޮތުން ޔޫރޮޕްގެ ފުޓުބޯޅަ ލީގުތަކާއި ކުލަބުތަކުގެ ތަމްރީންތައް ހުއްޓާލާފައި އޮތް ނަމަވެސް ސްޕެއިނުގެ ރެއާލް ސޮސެއިޑާޑުން ޓްރެއިނިންގް ފަށަން ހަމަޖައްސާފައިވާ ކަމަށް އެކުލަބުން ބުނެފި އެވެ.
ލީގުތަކުގެ ކުޅުން ހުއްޓާލާފައި އޮންނަތާ މަހެއް ވެގެން ދިޔަ އިރު އަދިވެސް ލީގުތައް ފެށޭނެ ތާރީހެއް ނޭންގެ އެވެ. ޔޫރޮޕުގެ ގައުމުތަކުގައި އަދިވެސް ހަލުވިކަމާ އެކު ކޮރޯނާ ވައިރަސް ފެތުރެމުންދާ އިރު ގިނަ ގައުމުތައް އަދިވެސް ލޮކްޑައުންގައި އޮތުމުން، ލީގުތައް ކެންސަލް ކުރުމަށް ވެސް މިހާރު ޔޫއެފާއިން ވަނީ ވާހަކަ ދައްކަން ފަށައިފަ އެވެ.
ވައިރަސް ޖެހިގެން މިހާތަނަށް ދުނިޔޭގައި 108،700 މީހުން މަރުވެފައިވާ އިރު ސްޕެއިނުން އެކަނި ވެސް 16،600 މީހުން ވަނީ މަރުވެފަ އެވެ. ނަމަވެސް ސޮސެއިޑާޑުން އަންނަ ހަފުތާގެ އަންގާރަ ދުވަހު ޓްރެއިނިންގް ފެސިލިޓީތައް ހުޅުވާލައި ކުޅުންތެރިންނަށް ތަމްރީންތައް ދޭން ފަށާނެ ކަމަށް އެކުލަބުން ވަނީ ބުނެފަ އެވެ.
އެކަމަކު ހެލްތް އޭޖެންސީތަކުގެ ގަވާއިދާ އެއްގޮތަށް ކުޅުންތެރިން ތަމްރީން ހޯދާނީ ވަކި ވަކިން ކަމަށް އެކުލަބުން ވަނީ ބުނެފަ އެވެ. އަދި މިއީ މަޖުބޫރުކަމެއް އޮތް ކަމެއް ނޫން ކަމަށާއި، ކުޅުންތެރިން ބޭނުން ނަމަ ގޭގައި ތިބެގެން ވެސް ފަރިތަކުރުންތައް ކުރިއަށް ގެންދެވޭނެ ކަމަށް އެކުލަބުން ވަނީ ބުނެފަ އެވެ.
"ވޭތުވެ ދިޔަ ހަތަރު ހަފުތާގައި ކުޅުންތެރިން ތަމްރީންތައް ހަދަމުން ދިޔައީ ގޭގައި ތިބެގެން. ޓްރެއިނިންގް ފެސިލިޓީ ހުޅުވާލި ނަމަވެސް ޓީމުގެ ޕްރެކްޓިސްތަކެއް ނުކުރާނެ. ވަކި ވަކި ކުޅުންތެރިންގެ ޓްރެއިނިންގްތައް ކުރިއަށް ގެންދާނީ،" ސޮސެއިޑާޑްއިން ބުނެފައިވެ އެވެ.
ސޮސެއިޑާޑުން ބުނީ، ގޭގައި ތިބެގެން ވެސް ފަރިތަކުރުންތައް ކުރިއަށް ގެންދެވޭނެ ކަމަށާއި އެހެން ނަމަވެސް ކުލަބުގެ ކޯޗުންނާއި، ފިސިކަލް އެކްސްޕާޓުންގެ އެހީތެރިކަން އެކުޅުންތެރިންނަށް ލިބޭނެ ކަމަށެވެ.
ސްޕެނިޝް ލީގު މެދު ކަނޑާލި އިރު ރެއާލް ސޮސެއިޑާޑް އޮތީ ތާވަލުގެ ހަތަރުވަނައިގައި ތިންވަަނައިގައި އޮތް ސެވިއްޔާއަށް ވުރެން އެއް ޕޮއިންޓް ފަހަތުގަ އެވެ.