ދުނިޔޭގެ ގިނަ އިލްމުވެރިންގެ ދަރުސްތައް ގެނެސްދެމުން އަންނަ "ޕީސް ޓީވީ" އަލުން ފެންނަގޮތް މީޑިއާ ނެޓުން ހަދައިފި އެވެ.
މީޑިއާ ނެޓްގެ އޮފިޝަލަކު "ސަން" އަށް މިއަދު ވިދާޅުވީ އެ ޓީވީ ނުފެނުނީ ސިގްނަލްއަށް ދިމާވި މައްސަލައަކުން ކަމަށާއި މިހާރު އެ ޗެނަލް ކުރިއެކޭ އެއްގޮތަށް ފެންނާނެ ކަަމަށެވެ.
އޮފިޝަލް ވިދާޅުވީ މީގެ ކުރިންވެސް ބައެއް އެހެން ޗެނަލްތަަކަށް ދިމާވި ސިގްނަލްތަކާ ގުޅިގެން ޗެނަލްތައް މެދުކެނޑުނު ކަމަށެވެ.
ޔޫއޭއީގެ ދުބާއީން އޮޕަރޭޓްކުރާ އެ ޗެނެލްގެ ފައުންޑާއަކީ މަޝްހޫރު ދީނީ އިލްމުވެރިޔާ ޑރ. ޒާކިރު ނައިކްއެވެ. ނަމަވެސް ޑރ. ނައިކް މިހާރު އުޅުއްވަނީ އަމިއްލައަށް އަރުވާލެވިގެން މެލޭޝިއާގައެވެ.
އެ ޗެނަލްއަކީ މުޅި ދުނިޔޭގެ އިތުރުން ދިވެހިންގެ ތެރޭގައިވެސް ވަރަށް މަގުބޫލް ޗެނަލްއެކެވެ.
ޑރ. ނައިކްގެ މައްސަލަތަކެއް އިންޑިއާއިން ތަހުގީގު ކުރަމުންދާއިރު ޕީސްޓީވީ ވަނީ އެގައުމުގައި މަނާވެސްކޮށްފައެވެ. އަދި ހަމަ ބަންގްލަދޭޝްއިންވެސް ވަނީ ޒާކިރު ނައިކް ޓެރެރިޒަމްއަށް ވާގިވެރިވާކަމަށް ބުނެ އެ ޗެނަލް ބްލޮކްކޮށްފައެވެ. އޭގެ އިތުރުން ދާދި ފަހުން ސްރީލަންކާއިންވެސް ދާދި ފަހުން ޕީސްޓީވީ ވަނީ ބްލޮކްކޮށްފައެވެ.
ޕީސްޓީވީ ނުފެންނާތީ އެޗެނެލް ނުފެންނަ ގޮތަށް ހަދައިފައިވާ ކަމަށްވެސް ބައެއް މީޑީއާތަކުން ވަނީ ރިޕޯޓްކޮށްފައެވެ. ނަމަވެސް އެއީ ހަގީގަތެއް ނޫން ކަމަށް މީޑިއާ ނެޓްއިން ބުންޏެވެ.
ޕީސްޓީވީ ބްލޮކް ކުރިކަމަށް އަޑުފެތުރުނުއިރު ދާދި ފަހުން ރާއްޖެ ގެންނަން އުޅުނު ދީނީ އިލްމުވެރިޔާ ޑރ. ބިލާލް ފިލިޕްސް ގެނައުންވެސް ވަނީ މަޑުޖައްސާލައިފައެވެ.