ކޮރޯނާވައިރަހުގެ ބަލިމަޑުކަން، ސަބަބުން ރާއްޖެއަށް ކުރިމަތިވެފައިވާ އިގްތިސާދީ ހާލަތާ ގުޅިގެން މުވައްޒަފުންގެ މުސާރަ ކުޑަކުރުމާއި ނޯޕޭ ލީވްއަށް ފޮނުވުމާއި ވަޒީފާއިން ވަކިކުރުން ފަދަ ކަންކަން ކުރަމުންދަނީ ގާނޫނާ ހިލާފަށް ކަމަށް ލޭބާ ރިލޭޝަންސް އޮތޯރިޓީން ބުނެފި އެވެ.
ލޭބާ ރިލޭޝަންސްއިން ބުނީ ވަޒީފާ ދޭ ފަރާތްތަކުން މި ދުވަސްވަރު މުވައްޒަފުން ވަޒީފާއިން ވަކި ކުރުމާއި މުސާރަ ދަށްކުރުމާއި ނޯޕޭއަށް ފޮނުވަމުންދާކަމުގެ ޝަކުވާތައް އެ އޮތޯރިޓީއަށާއި ސަރުކާރުގެ ބައެއް މުއައްސަސާތަކަށް ލިބެމުންދާ ކަމަށެވެ.
މިކަން ހިނގަމުން އަންނަ ގޮތް ބަލާފައިވާ ކަމަށާއި ބައެއް ފަރާތްތަކުން މުވައްޒަފުންގެ ކަންކަން ނިންމާފައިވަނީ ވަޒީފާއާ ބެހޭ ގާނޫނާ ހިލާފަށް ކަމަށް އެ އޮތޯރިޓީން ބުނެ އެވެ.
މާޗް މަހުން ފެށިގެން ވަޒީފާ ދޭ އެއްވެސް ފަރާތަކުން އެއްވެސް މުވައްޒަފެއްގެ ވަޒީފާގެ ހާލަތަށް ބަދަލެއް ގެނެސްފައިވާނަމަ އެކަން ނިންމި ގޮތް ލޭބާ ރިލޭޝަންސް އޮތޯރިޓީއަށް އެންގުމަށް ވެސް ވަނީ އެދިފަ އެވެ.
މިކަން އެންގުމަށްޓަކައި އެ އޮތޯރިޓީގެ ވެބްސައިޓުގައިވާ 'އެމްޕްލޯއިމަންޓް ސްޓޭޓަސް ޗޭންޖް އިންފޮމޭޝަން ޝީޓު' ފުރިހަމަ ކުރުމަށްފަހު އޭޕްރީލް 15 ވަނަ ދުވަހުގެ ކުރިން [email protected] އަށް މެއިލް ކުރުމަށް އެދިފައިވެ އެވެ.
މި ދަނޑިވަޅުގައި ވިޔަފާރިތަކަށް ދިމާވެދާނެ ދަތިތަކުން އަރައިގަނެ، މުވައްޒަފުންގެ ހައްގުތައް ރައްކާތެރި ކުރުމަށްޓަަކައި 2.5 ބިލިއަން ރުފިޔާގެ އެހީގެ ލޯނު ދޫކުރުމާއި އެކި ދާއިރާތަކަށް އަމާޒުކޮށްގެން ސަރުކާރުން ވަނީ ލުއި ގޮތްތަކެއް ފަހިކޮށްދީފަ އެވެ.
މި އިނާޔަތްތައް ދިނުމުގައި ވެސް މުވައްޒަފުން ވަޒީފާއިން ވަކިނުކުރާ ފަރާތްތަކަށް އިސްކަން ދޭނެ ކަމަށް ސަރުކާރުން މީގެ ކުރިން ވަނީ ބުނެފަ އެވެ. އެހެންކަމުން މި ދުވަސްވަރު މުވައްޒަފުން ވަޒީފާއިން ވަކި ކުރުމުގެ ކުރިން ލޭބާ ރިލޭޝަންސް އޮތޯރިޓީއާ މަޝްވަރާ ކުރުމަށާއި ގާނޫނާ ހިލާފު އެއްވެސް ފިޔަވަޅެއް މުވައްޒަފަކާ މެދު ނޭޅުމަށް އެ އޮތޯރިޓީން ވަނީ އިލްތިމާސްކޮށްފަ އެވެ.
ކުރިއަށް އޮތް ތަނުގައިވެސް މުވައްޒަފުންގެ ވަޒީފާއަށް އެއްވެސް ބަދަލެއް ގެންނަނަމަ، ލޭބާ ރިލޭޝަންސް އޮތޯރިޓީއަށް އެންގުމަށް އެ އޮތޯރިޓީން އިލްތިމާސްކުރެ އެވެ.
ކޮރޯނާވައިރަހުގެ ބަލިމަޑުކަމުގެ ސަބަބުން މުވައްޒަފުން ވަޒީފާއިން ވަކިކޮށް، މުސާރަ ކުޑަ ކުރަމުންދާއިރު، 58 ރިސޯޓަކުން 11،000އެއްހާ މުވައްޒަފުން ނޯޕޭއަށް ފޮނުވާލާން ނިންމާފައިވާ ކަމަށް ޓޫރިޒަމް އެމްޕްލޯއީސް އެސޯސިއޭޝަން އޮފް މޯލްޑިވްސް (ޓީމް)އިން މީގެ ކުރިން ވަނީ ބުނެފަ އެވެ.