ކޮވިޑް 19ގެ ސަބަބުން ރާއްޖޭގައި ސިއްހީ ކުއްލި ހާލަތު އިއުލާން ކޮއްފައިވާތީ މިއަދުން ފެށިގެން ސެންޓްރަލް ޕާކް ހިމެނޭ ގޮތަށް ހުޅުމާލޭގެ ހުރިހާ ޕާކުތައް އާންމުންނަށް ބަންދުކޮށްފައިވާކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބުނެފިއެވެ.
އެޗްޑީސީން ކުރި ޓުވީޓެއްގައި ބުނީ މިއަދުން ފެށިގެން ހުޅުމާލޭގެ ހުރިހާ ޕާކެއް ވަގުތީ ގޮތުން ބަންދުކުރަން ނިންމާފައިވާ ކަމަށެވެ.
ހުޅުމާލޭ ސެންޓްރަލް ޕާކަކީ ހަފްތާ ބަންދުގައި ގިނަ އަދަދެއްގެ ކުޑަކުދިންނާއި، އުމުރުން ދުވަސްވީ މީހުންގެ އިިތުރުން ބިދޭސީން ވެސް ޖަމާވާ ތަނެކެވެ.
ހުޅުމާލޭގެ ހުރިހާ ޕާކުތަކެއް ބަންދުކޮށްފައި ވާއިރު، ޖުމްހޫރީ މައިދާން ހިމެނޭ ގޮތުން މާލޭގެ ހުރިހާ ޕާކްތަކާއި މައިޒާންތައް ވެސް ވަނީ އާންމުންނަށް ބަންދުކޮށްފައެވެ.
ރާއްޖެއިން ކޮރޯނާ ވައިރަސް ޖެހިފައިވާ އަށް މީހަކު ފެނިފައިވާ އިރު، އެ ވައިރަސް އިތުރަށް ފެތުރިގެން ނުދިޔުމަށް ހާއްސަ ފިޔަވަޅުތަކެއް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ވަނީ އަޅައިފަ އެވެ.
އެގޮތުން ރިސޯޓްތަކާއި ސަފާރީތަކުން، މީހުން އުޅޭ ރަށްރަށަށް ޓޫރިސްޓުން އެކްސްކާޝަންއަށް ގެންދިޔުމާއި ރަށްރަށުގެ ގެސްޓްހައުސްތަކުގައި ތިބޭ ޓޫރިސްޓުން ރިސޯޓްތަކަށާއި ސަފާރީތަކަށް ގެންދިޔުން ހުއްޓާލަން ވެސް އެޗްޕީއޭއިން ރޭ ވަނީ އަންގައިފަ އެވެ. އަދި ސްކޫލްތައް ހުޅުވުން ވެސް މި މަގުގެ 22 ވަނަ ދުވަހަށް ވަނީ ލަސްކޮށްފަ އެވެ.
މީގެ އިތުރުން، ރޯގާ ޖެހިފައިވާ މީހުންނާއި ކުޑަކުދިން އަދި މުސްކުޅިން މިސްކިތުގެ ޖަމާއަތްތަކަށް ނުދިޔުމަށް ވަނީ އިލްތިމާސްކޮށްފަ އެވެ. އަދި މިސްކިތްތަކުގެ ކާޕެޓްތައް ވެސް އަންނަނީ ބަދަލުކުރަމުންނެވެ. އަދި މިއަދުގެ ހުކުރު ހުތުބާ އާއި ނަމާދު ވީހާވެސް ކުރުކުރުމަށް މިނިސްޓްރީން މިހާރު ވަނީ އިމާމުންނަށް އިރުޝާދު ދީފަ އެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އިއްޔެ ގައުމާ މުހާތަބު ކުރައްވަމުން ވިދާޅުވީ ކޮރޯނާވައިރަސް ފެތުރިގެން ނުދިޔުމަށް ފަރުދީ ފެންވަރުގެ މަސައްކަތްތަކެއް ކުރަން ޖެހޭ ކަމަށެވެ. އެގޮތުން ގިނަގިނައިން ސައިބޯނިލައިގެން އަތްދޮވުމަށާއި އެއްވުންތަކާއި ހަފްލާތައް ނުބޭއްވުން އަދި މީހުން އެއްވާ ތަންތަނަށް ނުދިޔުމަށް ރައީސް އިލްތިމާސްކުރެއްވި އެވެ.
ރާއްޖެއިން އެ ވައިރަސް ފެނިފައިވަނީ، ރިސޯޓްތަކަށް އައި ޓޫރިސްޓުންގެ ގައިންނާއި އެ ތަންތަނުގައި މަސައްކަތް ކުރާ ބިދޭސީ މުވައްޒަފުންގެ ކިބައިންނެވެ. އެ އެންމެންގެ ހާލުވެސް ރަނގަޅު ކަމަށް ސަރުކާރުން ބުނެ އެވެ.