ށ. ގޮއިދޫގައި މެޑިކަލް ޓޫރިޒަމް ތަރައްގީ ކުރުމަށް ޕްރޮޖެކްޓެއް ހިންގުމަށް ކުރަން ޖެހޭ މަސައްކަތްތައް ފަށައިފި އެވެ.
އެ ރަށު ކައުންސިލުގެ ރައީސް އިބްރާހިމް ޝާހިދު މިއަދު "ސަން" އަށް ވިދާޅުވީ ގޮއިދޫގައި މިހާތަނަށް ލޯކަލް ޓޫރިޒަމް އަށް ބިން ކަނޑައެޅިފައިވާ ރަށެއް ނޫން ކަމަށާއި މެޑިކަލް ޓޫރިޒަމްގެ ޕްރޮޖެކްޓު ހިންގުމަށް ބޭނުންވާނެ ބިން ކަނޑައަޅައިދިނުމަށް އެދި މިހާރު ރައީސް އޮފީހުގައި އެދިފައިވާނެ ކަމަށެވެ.
"މިހާރު ސޮއިކުރެވުނީ އެމްއޯޔޫއެއްގައި. އެއީ މި ޕްރޮޖެކްޓު ޕްރޮޕޯޒް ކުރި ފަރާތާ އެކު، މަސައްކަތް ފެށުމަށް ވާން ޖެހޭ ތައްޔާރީތައް ވުމަށާއި ގާނޫނީ ގޮތުން ކުރަންޖެހޭ ކަންތައް ގުޅިގެން ކުރުމަށް. މީހުން ދިރިއުޅޭ ރަށްރަށުގައި ޓޫރިޒަމަށް ބިން ކަނޑައަޅަނީ ރައީސްގެ ހާއްސަ ގަރާރަކުން. އެހެންވީމާ އަޅުގަނޑުމެން މިހާރު ވާނީ އެގޮތަށް ބިން ކަނޑައަޅައިދިނުމަށް އެދިފައި. އަދި ޕްލޭނިން މިނިސްޓްރީގައި ވެސް ވާނީ އެދިފައި، ލޭންޑް ޔޫސް ޕްލޭނަށް އެބައި އިތުރުކޮށްދޭން،" ޝާހިދު ވިދާޅުވި އެވެ.
ށ. ގޮއިދޫގައި މެޑިކަލް ޓޫރިޒަމް ތަރައްގީ ކުރުމަށް ޕްރޮޖެކްޓެއް ހިންގުމަށް ކުރަންޖެހޭ މަސައްކަތްތައް ކުރުމަށް އެމްއޯޔޫގައި ސޮއިކުރުން --- ފޮޓޯ: ކައުންސިލް
ގޮއިދޫގައި މެޑިކަލް ޓޫރިޒަމް ފެސިލިޓީއެއް ތަރައްގީކުރަން އެމްއޯޔޫގައި ސޮއިކޮށްފައި ވަނީ ލާވޯސަލް މޯލްޑިވްސް ޕްރައިވެޓް ލިމިޓެޑް ކިޔާ ކުންފުންޏަކާއެކު އެވެ.
ޝާހިދު ވިދާޅުވީ އުއްމީދު ކުރަނީ ކުރިއަށް އޮތް ހަފްތާއެއް ނޫނީ ދެ ހަފްތާ ތެރޭ ބިން ކަނޑައެޅުމުގެ ކަންތައް ނިންމާލެވޭނެ ކަމަށެވެ.
ޝާހިދު ވިދާޅުވީ ލާވޯސަލް އިން ހުށަހަޅާފައި ވަނީ 90 ރޫމު ހިމެނޭ ޓޫރިސްޓު ފެސިލިޓީ އަކާއި ރިސާޗު ލެބެއް ހިމެނޭ ހޮސްޕިޓަލެއް ގޮއިދޫގައި ތަރައްގީ ކުރުމަށެވެ. މި ހޮސްޕިޓަލުގައި ރިސާޗު ލެބެއް ހުންނާނެ ކަމަށާއި ފަރުވާދޭނީ ސްޓެމްސެލް ޓެކްނޮލަޖީ ބޭނުންކޮށްގެން ކަމަށް އޭނާ ވިދާޅުވި އެވެ. މީގެ އިތުރުން ހޮސްޕިޓަލުން ޒަމާނީ ފެންވަރުގެ ގިނަ ހިދުމަތްތައް ލިބޭނެ ކަމަށާއި މިތަނުގެ ހިދުމަތްތައް ފަތުރުވެރިންގެ އިތުރުން ރަށާއި އަތޮޅުގެ ރައްޔިތުންނަށް ޖުމްލަކޮށް ހުރިހާ ދިވެހިންނަށް ވެސް ލިބޭނެ ކަމަށް ޝާހިދު ވިދާޅުވި އެވެ.
"މި ޕްރޮޖެކްޓުގައި ތަރައްގީ ކުރާނީ ފަސް ތަރީގެ ފެންވަރުގެ މެޑިކަލް ރިސޯޓެއް. ވޯޓާ ވިލާސް ވެސް ހިމެނޭ. ފަތުރުވެރިންނަށް ދޭންޖެހޭ ފަރުވާ އެމީހުންގެ ރޫމްގައި ވެސް ދެވޭނެހެން ތަރައްގީ ކުރަނީ،" ޝާހިދު ވިދާޅުވި އެވެ.
ށ.ގޮއިދޫ---
ޝާހިދު ވިދާޅުވީ ލޯކަލް ޓޫރިޒަމްގެ އެއްވެސް ކަމެއް މިވަގުތު ނެތް ގޮއިދޫގައި މި ޕްރޮޖެކްޓު ހިމްގުމުގެ ހުއްދަ ލިބުމުން ހުޅުވާލާނީ އޯޕަން ބިޑަކަށް ކަމަށެވެ. މި ޕްރޮޖެކްޓު ޕްރޮޕޯޒްކުރި ކުންފުންޏަށް ވެސް ބިޑު ކުރެވޭނެ ކަމަށާއި އެކުންފުނިން ހުށަހަޅާފައިވާ ޕްރޮޕޯޒަލްގައި ވަނީ 2021ގެ ނިޔަލަށް ޕްރޮޖެކްޓު ނިންމުމަށް ކަމަށް ޝާހިދު ވިދާޅުވި އެވެ.
"މި ޕްރޮޖެކްޓުގެ ތެރެއިން ރަށުގެ ޒުވާނުންނަށް ވަޒީފާގެ ގިނަ ފުރުސަތުތައް ލިބިގެންދާނެ. އުއްމީދު ކުރަނީ މިރަށުގެ ދަނޑުވެރިންނަށް ވެސް އެމީހުންގެ އުފެއްދުންތައް މާކެޓު ކުރުމަށް މިއީ ރަނގަޅު ފުރުސަތަކަށް ވާނެ ކަމަށް،" ޝާހިދު ވިދާޅުވި އެވެ.