ކޮވިޑް-19 ނުވަތަ ކޮރޯނާވައިރަސް ފެތުރެމުން ދާތީ، ދުނިޔޭގެ ޓޫރިޒަމް ސިނާއަތުގެ އެންމެ ބޮޑު ފެއާ އައިޓީބީ، ބާލިން 2020 ކެންސަލް ކުރުމަށް ޖަރުމަނުގެ ސަރުކާރުން ނިންމައިފި އެވެ.
އަހަރަކު އެއްފަހަރު ޖަރުމަނުގެ ބާލިންގައި ބާއްވާ އައިޓީބީ ފެއާ މިއަހަރު ބާއްވަން ނިންމާފައި އޮތީ އަންނަ މަހުގެ 4-8 އަށެވެ.
ރާއްޖޭގެ ފަތުރުވެރިކަމުގެ ސިނާއަތުގެ ގިނަ ފަރާތްތައް ވެސް ބައިވެރިވާ އައިޓީބީ -ބާލިން އިންތިޒާމް ކުރާ ފަރާތް، "މެސް ބާލިން"އިން މިރޭ ނެރުނު ކުރު ބަޔާނެއްގައި ބުނީ، މިއީ އެ ފެއާ ބާއްވާތާ މިވީ 54 އަހަރުގެ ތެރޭގައި ފެއާ ކެންސަލް ކުރަން ޖެހުނު ފުރަތަމަ ފަހަރު ކަމަށެވެ.
އެ އުނދަގޫ ނިންމުން ނިންމަން ޖެހުނީ، މިވަގުތަކީ އެ ފެއާއަށް ޒިޔާރަތް ކުރާ މީހުންނާއި ބައިވެރިން އަދި މުވައްޒަފުންގެ ސިއްހީ ސަލާމަތްތެރިކަން ކަށަވަރު ކުރަން ޖެހޭ ވަގުތު ކަމަށްވާތީ ކަމަށް ވެސް އެ ކުންފުނިން ބުންޏެވެ.
އައިޓީބީ-ބާލިންއަކީ، ދުނިޔޭގެ 180 އަށް ވުރެ ގިނަ ގައުމުން 10،000 ފަރާތް ބައިވެރިވާ ފެއާއެކެވެ. އެ ފެއާއަކީ ފަތުރުވެރިކަމުގެ މަންޒިލްތައް އިޝްތިހާރު ކުރުމާއި އެ ދާއިރާއާ ގުޅޭ އެންމެ މުހިންމުފެއާ އެވެ.
ޓޫރިޒަމް އިޝްތިހާރު ކުރާ ދައުލަތުގެ ކުންފުނި، އެމްއެމްޕީއާރުސީއިން ބުނެފައިވާ ގޮތުގައި މިއަހަރުގެ ފެއާގައި ރާއްޖެއިން 99 ކުންފުންޏަކުން 244 ފަރާތެއް ބައިވެރިވާން ހަމަޖެހިފައިވެ އެވެ.
ޖަރުމަނުގެ ސަރުކާރުގެ އެންގުމަށް އައިޓީބީ ބާލިން ނުބާއްވާން ނިންމި އިރު، ކޮރޯނާވައިރަސް ޖެހިފައިވާ 60 މީހަކު ވަނީ އެ ގައުމުން ފެނިފަ އެވެ. އަދި އޭގެ ތެރެއިން ދެ މީހެއްގެ ހާލު ސީރިއަސް އިރު، އެ ބައްޔަށް ޝައްކު ވެގެން 1،000 އެއްހާ މީހުން ކަރަންޓީނުކޮށްފައިވާ ކަމަށް އެ ގައުމުގެ މީޑިއާތަކުން ބުންޏެވެ.
ޔޫރަޕްގެ ގިނަ ގައުމުތަކުން އެ ވައިރަސް ފެނިފައިވާ އިރު، އިޓަލީގައި އަންނަނީ ކޮރޯނާ ވައިރަސް ބާރު މިނުގައި ފެތުރެމުންނެވެ.