މިއަހަރު ނާސްތާ ޕްރޮގްރާމްގައި 46،259 ދަރިވަރުން ރާއްޖޭގެ އެކި ސްކޫލްތަކުން ބައިވެރިވިކަމަށް އެޑިއުކޭޝަން މިނިސްޓްރީން ބުނެފިއެވެ.
އެޑިއުކޭޝަން މިނިސްޓްރީން މިއަދު އާންމުކުރި ތަފާސް ހިސާބުތައް ދައްކާގޮތުގައި 213 ސްކޫލެއްގެ 46,259 ދަރިވަރުން އެ ޕްރޮގްރާމްގައި ބައިވެރިވިއެވެ.
އެޑިއުކޭޝަން މިނިސްޓްރީގެ އޮފިޝަލަކު "ސަން" އަށް މިއަދު ވިދާޅުވީ ނާސްތާ ޕްރޮގްރާމްގައި ބައިވެރިވި ކުދިންގެ އަދަދާ މެދު މިނިސްޓްރީން ހިތްހަމަޖެހޭ ކަމަށެވެ.
އެ ޕްރޮގްރާމްގައި ބައިވެރިވާން މަޖުބޫރެއް ނޫނެވެ. އެކަން އޮތީ ބެލެނިވެރިންގެ އިޚްތިޔާރަށް ދޫކޮށްލައިފައެވެ.
"ޖުމްލަކޮށް ދަރިވަރުންގެ ފަރާތުން ލިބުނު ފީޑްބެކާ ދޭތެރޭ ހިތްހަމަޖެެހޭ. ކުޑަކޮށް ބައެއް ފަހަރު ޝަކުވާއައި ފުލްކްރީމް މިލްކް ދޭތީ. ނަމަވެސް ފަހުން ސްކޫލްތަކުން ބުނީ ކުދިން އެ ވައްތަރުގެ ކިރަށް ހޭނެމުންދާ ކަމަށް" އޮފިޝަލް ވިދާޅުވިއެވެ.
ސްކޫލުތަކުގެ ދަރިވަރުންނަށް ހެނދުނުގެ ނާސްތާ ދޭން ފެށީ މިއަހަރުގެ ޖެނުއަރީ މަހު އެވެ. އަޖުމަ ބެލުމުގެ ގޮތުން ފެށި އެ ޕްރޮގްރާމްގައި ނާސްތާ ފުރަތަމަ ދީފައިވަނީ 25 ސްކޫލެއްގަ އެވެ. އަދި ބާކީ ހުރި 188 ސްކޫލުގައި ނާސްތާ ޕްރޮގްރާމް ފެށީ މިދިޔަ ޖުލައި މަހުއެވެ.
މިއަހަރު ފަހުން ވަނީ ނާސްތާ ޕްރޮގްރާމަށް އިތުރު 34 މިލިއަން ރުފިޔާވެސް ބެޖުޓުގައި ހިމަނައިފައެވެ. އެހެންކަމުން ޖުމްލަ އެ ޕްރޮގްރާމަށް މިއަހަރު 184 މިލިއަން ރުފިޔާ ހަރަދުކުރުމަށް މިއަހަރު އޮތީ ހަމަޖެހިފައެވެ.
ދިރާސީ އަހަރު ނިމުމާ ގުޅިގެން މިނިސްޓަރު ދެއްވި ޚިތާބުގައި ބުނީ އެގޮތުން ދަރިވަރުންގެ ހެނދުނުގެ ނާސްތާ ޕްރޮގްރާމް ކާމިޔާބުކަމާ އެކު ހުރިހާ ސުކޫލެއްގައި ތަންފީޒުކުރުމުގެ ސަބަބުން ދަރިވަރުންގެ ޖިސްމާނީ އަދި ނަފްސާނީ ދުޅަހެޔޮކަމަށް ހެޔޮބަދަލެއް އައިސްފައިވާ ކަމަށެވެ.