ހަރުކަށީ ފިކުރު ފެތުރޭ ސަބަބުތަކުގެ ތެރޭގައި ދީނީ އިލްމުވެރިން އެފަދަ މީހުންނަށް އެކަށީގެންވާ ރައްދު ނުދެވުމަކީ ސަބަބެއް ކަމަށް، ނޭޝަނަލް ކައުންޓަ ޓެރަރިޒަމް ސެންޓަރު (އެންސީޓީސީ) އިން ބުނެފި އެވެ.
ރާއްޖޭގެ ހުރިހާ ރަށްތައް ތަމްސީލުވާ ގޮތަށް ކުރޮސް ރޯޑުގައި ބާއްވާ ކައުންސިލަރުންގެ "ވިއަވެތި ރާއްޖެ'' ކޮންފެރެންސްގައި އެންސީޓީސީ އިން ވަނީ ރާއްޖޭގައި ހަރުކަށި ފިކުރު ފެތުރިފައިވާ މިންވަރާ ގުޅޭ ގޮތުން ޕްރެސެންޓޭޝަނެއް ދައްކާފަ އެވެ.
ފުލުހުންނާއި އެމްއެންޑީއެފް ގުޅިގެން ހުށަހެޅި އެ ޕްރެސެންޓޭޝަން، ހުށަހަޅައި ދެއްވަމުން ފުލުހުންގެ ފަރާތުން މުހައްމަދު ޔަމާނީ ޖައުފަރު ވިދާޅުވީ، ހަރުކަށި ފިކުރުގެ މީހުން ބޭރުގައި ހިނގާ ދާހިލީ ހަނގުރާމަތަކައް ދަނީ، އެއީ ދީނުގައި ވާޖިބެއްކަމަށް ދެކިގެން ކަމަށާއި، އަދި އެމީހުން އަމިއްލައަށް ޖިހާދު ފަރުޟު ވެއްޖެ ކަމަށް ނިންމާކަމަށެވެ. އޭގެ އިތުރުން ކުފުރުގެ ބިމަކުން އިމާންވެފައިވާ ބިމަކަށް ހިޖުރަކުރުމަކީ ކުރަން ޖެހޭ ކަމެއް ކަމަށް އެފަދަ މީހުން ދެކޭ ކަމަށް ޔަމާނީ ވިދާޅުވި އެވެ.
ބޭރުގެ ހަނގުރާމަތަކަށް މީހުން ފޮނުވުމުގެ މަސައްކަތް ކުރަނީ ވަރަށް ފުޅާ ދާއިރާއެއްގައި ކަން އޭނާ ފާހަގަ ކުރެއްވި އެވެ. އެގޮތުން ޝޯޝަލް މީޑިއާގައި އެކަމަށް ކެމްޕެއިންކޮށް، ދަލީލުތައް ނެރެ، ހަދާ ކަމަށް ޔަމާނީ ވިދާޅުވި އެވެ. އެފަދަ ކަންކަމަށް ދީނީ އިލްމުވެރިންނަށް ރައްދު ނުދެވޭ ކަން އޭނާ ވިދާޅުވި އެވެ.
"އެ ދަލީލުތަކަށް އަޅުގަނޑުމެންގެ އިލްމުވެރިންނަށް އަޅުގަނޑުމެން ގަބޫލުކުރާ ގޮތުގައި އެކަށީގެންވާ ރައްދެއް ނުދެވުމަކީވެސް މި މީހުން ކުރިއަރައިގެންދާ ސަބަބުތަކުގެ ތެރޭގައި ހިމެނޭ ކަމެއް،" ޔަމާނީ ވިދާޅުވި އެވެ.
ހަރުކަށި ފިކުރުގެ ސަބަބުން ރާއްޖެ ފަދަ ފަތުރުވެރިކަމަށް ބަރޯސާވެފައިވާ ގައުމަކަށް އޭގެ ނެދެވޭ އަސަރު ކުރާނެ ކަމަށާއި، އަދި ދިވެހިން އެހެން ގައުމުތަކަށް ދަތުރުކުރުމަށް އޭގެ ސަބަބުން އުދަނގޫތައްވެސް ކުރިމަތިވާކަން އޭނާ ވިދާވި އެވެ. އަދި ހަނގުރާމައިގައި ބައިވެރިވެ، ތަމްރީނުވެ، އެނބުރި ރާއްޖެ އަންނަ މީހުންނަނަކީވެސް ގައުމީ ސަލާމަތައް ނުރައްކަލެއްކަމަށް އޭނާ ފާހަގަ ކުރެއްވި އެވެ.
ޔަމާނީ އާންމު ކުރެއްވި ތަފާސް ހިސާބުތަކުގައިވާ ގޮތުގައި މިހާތަނަށް 173 ދިވެހިން ސިރިއާއަށް ހަނގުރާމަށް ގޮސްފައިވެ އެވެ.
މި ބައްދަލުވުމުގައި ހަރުކަށި ފިކުރަކީ ކޮބާ ކަމާއި އެމީހުންގެ އަމަލުތަކާ އެކަމަށް މަގުފަހިވާ ކަންތައްވަނީ ކައުންސިލަރުންނާ ހިއްސާ ކުރައްވާފަ އެވެ. އަދި ހަރުކަށި ފިކުރާ ދެކޮޅަށް ކައުންސިލްތަކުން ކުރެވިދާނެ ކަންތައްތަކެއްވެސް ވަނީ އެންސީޓީސީ އިން ހިއްސާކޮށްފަ އެވެ.
ކައުންސިލްތަކުން ކުރެވިދާނެ މުހިންމު ކަންތައްތައް:
- މުޖުތަމައު ބައިބައިވުމަށް ފުރުސަތު ނުދީ، ޓެރަރިޒަމްއާއި ހަރުކަށި ފިކުރާ ފެތުރުމަށް މަގުފަހިވާ ކަންތައްތައް ހައްލުކުރަން މަސައްކަތް ކުރުން.
- ހަރުކަށި ފިކުރު ފަތުރަން ފަސޭހަ ތަންތަނަށް ވިޔަނުދިނުމަށް މުއައްސަސާތައް ގުޅިގެން މަސައްކަތްކޮށް، ހޭލުންތެރިކަމުގެ ޕްރޮގްރާމް ހިންގުން
- ދީނީ ޕްރޮގްރާމްތަކަށް ބޭރުން މީހުން ގެނައުމުގެ ކުރިން އެމީހުންގެ ބެކްގްރައުންޑް ބަލާ މިނިސްޓްރީތަކާ ގުޅިގެން އެކަން ކުރުން.
- ހަރުކަށި ފިކުރުގެ އަމަލު ހިންގާ މީޙުން ފާހަގަކޮށް، އެކަންކަމާ ގުޅޭ މައުލޫމަތު ކަމާ ބެހޭ ފަރާތްތަކަށް އެންގުން.
ޔަމާނީ ވިދާޅުވީ ހަރުކަށި ފިކުރުގެ މީހުން އެހެން މީހުންނަކީ ކާފަރުން ކަމުގައި ބަލައި އެ މީހުންގެ މުދަލަކީ ޣަނީމާ މުދާ ކަމުގައި ބަލައި ކަމަށެވެ. އެހެންވެ، އެ މީހުން ރާވައިގެން ބޮޑެތި ވައްކަންތައް ހިންގާ ކަމަށް ވެސް އޭނާ ވިދާޅުވި އެވެ. އަދި އާއިލީ މީހުންނާ ލޭގެ ގުޅުން ކަނޑައަޅައި ދެން ތިބި ހިޔާލުތަފާތުވާ އެހެން މީހުންނާ މެދު އަނިޔާވެރި ކަމުގެ އަމަލުތައް ހިންގުމުގެ ފިކުރު ގެންގުޅޭކަން ވެސް ޔަމާނީ ފާހަގަ ކުރެއްވި އެވެ.