ގަވާއިދާ ހިލާފަށް ރާއްޖޭގެ ކަނޑުގެ ސަރަހައްދުން މަސްވެރިކަން ކުރަމުން ދަނިކޮށް، ކޯސްޓްގާޑުން މިދިޔަ ހުކުރު ދުވަހު ހިފެހެއްޓި ލަންކާގެ ހަތް މަސްބޯޓު ހުޅުމާލެއަށް ގެންގޮސްފި އެވެ.
އެމްއެންޑީއެފްއިން ބުނި ގޮތުގައި އެ ހަތް ބޯޓު މިއަދު ފަތިހު ވަނީ ކޯސްޓްގާޑްގެ ބެލުމުގެ ދަށުން ހުޅުމާލޭ ބަނދަރަށް ގެންގޮސްފަ އެވެ.
ހުކުރު ދުވަހު ކޯސްޓްގާޑުގެ ބެލުމުގެ ދަށަށް ގެނައި ހަތް ބޯޓުގެ ތެރެއިން ދެ ބޯޓުން، ގެންދިޔައީ ރާއްޖޭގެ ކަނޑުގެ ސަރަހައްދުން ދާ އަޅައިގެން މަސްވެރިކަން ކުރަމުންނެވެ.
އެ ބޯޓްތައް ހިފެހެއްޓީ، މާލޭގެ އިރުން 175 ނޯޓިކަލް މޭލު ބޭރުން ކަމަށް އެމްއެންޑީއެފްއިން ބުންޏެވެ. އެ ބޯޓްތައް އަތުލައިގަތުމުގެ އޮޕަރޭޝަން ސިފައިން ފެށީ "އަސުރުމާ – 3" ނަމަކަށްކިޔާ މަސްދޯންޏަކުން ދިން މައުލޫމާތަކާ ގުޅިގެންނެވެ.