އދ. (ނޮވެމްބަރު 12): މިޔަންމާގައި ރޮހިންގާ ދަރިކޮޅުގެ މީހުންނާ ދެކޮޅަށް ގަތުލްއާންމެއް ހިންގި ކަމަށް ބުނެ، މިޔަންމާ ސަރުކާރާ ދެކޮޅަށް ގެމްބިއާއިން އދގެ އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ)އަށް ހުށަހަޅައިފި އެވެ.
މުސްލިމުންގެ އާބާދީ ބޮޑު 57 ގައުމު ހިމެނޭ އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ)ގެ ތާއިދާއެކު ގެމްބިއާއިން އައިސީޖޭއަށް ހުށަހެޅި މައްސަލައިގައިވާ ގޮތުން މިޔަންމާއިން ވަނީ ރޮހިންގާ މީހުން ދިރިއުޅޭ ރާހިން ސްޓޭޓުގައި ގިނަ އަދަދެއްގެ މީހުން މަރާ، ރޭޕްކޮށް، ބޮޑެތި ގެއްލުންތައް ދީފައެވެ.
އައިސީޖޭއިން އެ މައްސަލަ ބަލައިގަނެފިނަމަ ވާނީ ދެވަނަ ބޮޑު ހަނގުރާމައިގެ ފަހުން އެކޯޓުން ބަލާ ތިންވަނަ ގަތުލުއާންމުގެ މައްސަލައަށެވެ. އަދި އދގެ އެހެން ޓްރައިބިއުނަލްއެއްގެ ހޯދުންތަކަށް ބިނާ ނުކޮށް އެ ކޯޓުން މައްސަލައެއް ބަލަން ފަށާ ފުރަތަމަ ފަހަރަށެވެ.
ގެމްބިއާއިން އެމައްސަލަ ހުށަހަޅާފައި ވަނީ މިޔަންމާއިންވެސް ސޮއި ކޮށްފައިވާ، އދގެ ޖެނޮސައިޑް ކޮންވެންޝަންއާ އެގައުމުން ހިލާފުވިކަމަށް ބުނެ އެވެ. އެ މުއާހަދާގައި ސޮއިކުރި ގައުމުތަކުން ވަނީ ގަތުލުއާންމުތައް ހުއްޓުވުމަށާއި ގަތުލުއާންމު ހިންގާ ފަރާތްތަކަށް އަދަބު ދޭނެކަމަށް އެއްބަސްވެފައެވެ.
އަދި ގެމްބިއާއިން ވަނީ މިޔަންމާއިން ރޮހިންގާ ދަރިކޮޅުގެ މީހުންނާ ދެކޮޅަށް ގަތުލުއާންމާއި އެހެނިހެން ޖަރީމާތައް ހިންގުން ހުއްޓުވުމަށް އައިސީޖޭއިން އަމުރެއް ނެރެދިނުމަށް އެދިފައެވެ.
އަމިއްލަ ބަހަކާއި ސަގާފަތެއް އޮންނަ ރޮހިންގާ ދަރިކޮޅުގެ މީހުން މިޔަންމާގައި ދިރިއުޅޭތާ ގަރުނުތަކެއްވެފައިވީ ނަމަވެސް އެ ގައުމުގެ އާބާދީގެ ބޮޑުބައެއް ކަމަށްވާ ބުޑިސްޓުން ދެކޭ ގޮތުގައި ރޮހިންގާ ދަރިކޮޅުގެ މީހުންނަކީ އެގައުމަށް އަރާ ތިބި ބަންގުލަދޭޝްގެ ބަޔެކެވެ. އަދި މިޔަންމާގެ ސަރުކާރުން ވަނީ ރޮހިންގާ ދަރިކޮޅުގެ މީހުންނަށް ރަށްވެހިކަން ދޭން ދެކޮޅު ހަދާފައެވެ.
ދެހާސް ސަތާރަވަނަ އަހަރުގެ އޮގަސްޓު މަހު މިޔަންމާގެ އަސްކަރިއްޔާއިން ރާހިން ސްޓޭޓުގައި އަނިޔާވެރި އޮޕަރޭޝަނެއް ފެށީ، އަރާކަން ރޮހިންގާ ސެލްވޭޝަން އާމީ ކިޔާ ހަނގުރާމަވެރި ޖަމާއަތަކުން މިޔަންމާގެ ފުލުހުންތަކެއް މަރާލުމާ ގުޅިގެންނެވެ. އެ ހަމަލާތަކަށްފަހު، ހަނގުރާމަވެރިން އަތުލައިގަތުމަށް ކަމަށް ބުނެ މިޔަންމާއިން ފެށި އަސްކަރީ އޮޕަރޭޝަނުގައި ބައެއް އަވަށްތައް އެއްކޮށް އަންދާލައި، އާންމު ރައްޔިތުންނަށް އަނިޔާކޮށް، ރޭޕްކުރިކަމަށް އދގެ އިންވެސްޓިގޭޓަރުން ބުންޏެވެ.
އޭގެ ސަބަބަބުން ގާތްގަނޑަކަށް 750،000 ރޮހިންގާއިންނަށް މިޔަންމާ ދޫކޮށް ދާން މަޖުބޫރުވިއެވެ.
ބަންގުލަދޭޝްގައި ތިބި ރޮހިންގާ ރެފިއުޖީން އެ ގައުމުން މިޔަންމާއަށް ގެންދަން އެ ދެ ގައުމުން މިދިޔަ އަހަރާއި މިއަހަރުވެސް މަސައްކަތްކުރި ނަމަވެސް، ރޮހިންގާއިން ވަނީ އެނބުރި ގައުމަށް ދިޔުމުން ވާނެ ގޮތެއް ނޭނގޭތީ، އަނބުރާ ދާން ދެކޮޅު ހަދާފައެވެ.