ރާއްޖޭގައި އުފެދުނު އެންމެ މަގްބޫލު އެކްޓަރު އަލީ ސީޒަން ޑައިރެކްޓްކޮށް އޭނާ ލީޑު ރޯލު ކުޅޭ ފިލްމު "އަނދިރިކަން"ގެ ޓިކެޓު ވިއްކަން ފެށި ނަމަވެސް އެ ފިލްމު ރިލީޒްކުރުން ކެންސަލްކޮށްފިއެވެ.
ސަން އަށް މައުލޫމާތު ދެމުން ސީޒަން ބުނީ ފިލްމު އެޅުވުން ކެންސަލްކުރީ ފިލްމުމުގެ ޕްރޮޖެކްޓް ފައިލަށް ދިމާވި ޓެކްނިކަލް މައްސަލައަކާއި ގުޅިގެން ކަނޑައަޅާފައިވާ ތާރީހުގައި ފިލްމު ނޭޅުވޭނެތީކަމަށެވެ.
އަދި އެ މައްސަލަ ހައްލުކުރެވުމާއެކު ފިލްމު ރިލީޒްކުރާނެ އާ ތާރީޚެއް ފަހުން އިއުލާންކުރާނެ ކަމަށްވެސް ސީޒަން ބުންޏެވެ.
ފިލްމު އަޅުވަން ނިންމީ މި މަހުގެ 22 ވަނަ ދުވަހުއެވެ. ފިލްމަށް ޓިކެޓް ގަތް މީހުންނަށް ވަކި ވަކިން ގުޅަމުންދާ ކަމަށާއި ޓިކެޓް ގަތް ފަރާތްތަކަށް ރީފަންޑުދޭނެކަމަށް ކާމިޔާބު ބަތަލު ބުންޏެވެ. އަދި ޓިކެޓް ގަތް ފަރާތްތަކުންވެސް އޮލިމްޕަހަށް ގުޅާ ޓިކެޓް ރީފަންޑް ހޯދުމަށް އޭނާ އެދެއެވެ.
"ފިލްމު ލަފާކުރެވޭ ގޮތުގައި އެޅުވޭނީ އަންނަ އަހަރުގައި،"
ޖުމްލަ ތިން ލަވަ ހިމެނޭ "އަނދިރިކަން" ފިލްމުގެ ލީޑު ތަރީންގެ ގޮތުގައި ފެނިގެންދާނީ ސީޒަން އަދި އައިމިނަތު ރިޝްފާގެ އިތުރުން ޝީލާ ނަޖީބެވެ. އެ ތަރީންގެ އިތުރުން ފިލްމުން ފެނިގެންދާނީ މަރިޔަމް ޝަކީލާ، ޒީނަތު އައްބާސް އަދި އަހްމަދު ސައީދެވެ.