ބޮގޮޓާ (އޮކްޓޯބަރު 4): މިދިޔަ މަހު ކޮލަމްބިއާގައި ޖަލަށް ލި ކުރީގެ ސެނެޓަރު އައިދާ މަލާނޯ ސިއްހީ މަރުކަޒަކަށް ގެންދިޔުމުން އޭނާ ފިލައިފިއެވެ.
މިދިޔަ އަންގާރަ ދުވަހު މަލާނޯ ޑެންޓިސްޓެއް ކައިރިއަށް ގެންދިޔުމުން އޭނާ އެތަނުން ފިލާ މަންޒަރު ފެންނަ ވީޑިއޯތައް ވަނީ ސޯޝަލް މީޑިއާގައި އާއްމުވެފައެވެ.
އެ ވީޑިއޯތަކުން ފެންނަ ގޮތުގައި މަލާނޯ މަރުކަޒަށް ގެންދިޔަ ގާޑާއި ޑެންޓިސްޓު ކުޑަ ވަގުތުކޮޅަކަށް ކޮޓަރިން ބޭރަށް ދިޔުމުން އޭނާ ކުޑަ ދޮރުގައި ވާގަނޑެއް އެއްސުމަށް ފަހު ތިރިއަށް ވައްޓައެވެ. އަދި އެވާގަނޑުގައި އެލިގެން، އެ އިމާރާތުގެ ފުރަތަމަ ބުރިން އޭނާ ތިރިއަށް ފައިބައެވެ. އެއަށް ފަހު ސައިކަލެއްގައި އިން މީހަކާއެކު އެ ސައިކަލަށް އަރައިގެން އޭނާ ދެއެވެ.
ކޮލޮމްބިއާގެ ފުލުހުން މިހާރު ދަނީ އެމައްސަލަ ތަހުގީގުކޮށް، މަލާނޯ ހޯދުމުގެ މަސައްކަތް ކުރަމުންނެވެ. އަދި އެ ހާދިސާއާ ގުޅިގެން އެގައުމުގެ ޖަސްޓިސް މިނިސްޓަރު ވަނީ އަންހެނުންގެ ޖަލުގެ ވެރިޔާ މަގާމުން ދުރުކޮށް، ޖަލުގެ އަށް މުވައްޒަފުން ސަސްޕެންޑު ކުރައްވާފައެވެ. އަދި ގައުމުގެ ޕްރިޒަން ސިސްޓަމްގެ ވެރިޔާވެސް އިސްތިއުފާ ދެއްވަން އެދިލައްވާފައެވެ.
ކޮލޮމްބިއާއިން ވަނީ މަލާނޯ ހައްޔަރު ކުރުމަށް ބޭނުންވާ މައުލޫމާތު ފޯރުކޮށްދޭ މީހަކަށް 50 މިލިއަން ޕޭސޯސް (14،000 ޑޮލަރު) ދޭނެ ކަމަށް ބުނެފައެވެ. އަދި އޭނާގެ ޑެންޓިސްޓު އޭނާ ފިލުމަށް އެހީތެރިވި ކަމަށް ބެލެވޭ ކަމަށާއި އެހެންކަމުން އެ މައްސަލަވެސް ބަލަމުންދާ ކަމަށް ބުނެފައެވެ.
މިދިޔަ އަހަރު ކޮލޮމްބިއާގައި ބޭއްވި އާންމު އިންތިހާބު ކާމިޔާބުކޮށްގެން ސެނެޓަރު ކަމަށް ހޮވުނު މަލާނޯގެ މައްޗަށް ވަނީ ވޯޓު ގަތުމުގެ ކުށް ސާބިތުވެފަ އެވެ. އަދި މިދިޔަ މަހު އެގައުމުގެ ކޯޓަކުން ވަނީ އޭނާ 15 އަހަރަށް ޖަލަށް ލާން ހުކުމްކޮށްފަ އެވެ. އޭގެ ކުރިން ކޯޓުން ވަނީ މަލާނޯ ސެނެޓަރުގެ މަގާމުން ދުރުކޮށްފައެވެ.
އެއީ ކޮލޮމްބިއާގައި ވޯޓު ގަތުމުގެ ކުށުގައި ސިޔާސީ އިސް ފަރާތެއް ޖަލަށް ލި ފުރަތަމަ ފަހަރެވެ.