ޓޫރިޒަމާ ގުޅޭ އދގެ އޭޖެންސީ، ވޯލްޑް ޓޫރިޒަމް އޯގަނައިޒޭޝަން (ޔޫއެންޑަބްލިއުޓީއޯ)ގެ މެމްބަޝިޕް، ރާއްޖޭގެ ރިސޯޓު އޯނަރުންގެ ޖަމިއްޔާއަށް ލިބިއްޖެ އެވެ.
ވޯލްޑް ޓޫރިޒަމް އޯގަނައިޒޭޝަނަކީ ޒިންމާދާރު، ދެމެހެއްޓެނިވި އަދި ހުރިހާ އެންމެންނަށްވެސް ޝާމިލުވެވޭ ޓޫރިޒަމެއް ޕްރޮމޯޓުކުރުމުގެ މަސްއޫލިއްޔަތު އަދާކުރާ އދ. ގެ އޭޖެންސީ އެވެ.
މޯލްޑިވްސް އެސޯސިއެޝަން އޮފް ޓޫރިޒަމް އިންޑަސްޓްރީ (މަޓީ)އަށް ވޯލްޑް ޓޫރިޒަމް އޯގަނައިޒޭޝަންގެ އެފިލިއޭޓް މެމްބަޝިޕް ލިބުނުކަން އިއުލާނުކުރެއްވީ، މިއަދު ކްރޮސްރޯޑްސް މޯލްޑިވްސްގައި ކުރިއަށްދާ ޓޫރިޒަމް ކޮންފަރަންސްގައި، މަޓީގެ ޗެއާމަން މުހައްމަދު އުމަރު މަނިކު (އެމްޔޫ މަނިކު)އެވެ.
މަނިކު ވިދާޅުވީ މަޓީއަށް ޔޫއެންޑަބްލިއުޓީއޯގެ އެފިލިއޭޓް މެމްބަޝިޕް ލިބުނީ މިދިޔަ ސެޕްޓެމްބަރު މަހުގެ 11 ވަނަ ދުވަހު ރަޝިއާގެ ސެއިންޓް ޕީޓާސްބާގުގައި އޮތް އެ ޖަމިއްޔާގެ 23 ވަނަ އާންމު މަޖިލީޖހުގައި ކަމަށެވެ.
އެމްޔޫ މަނިކު ވިދާޅުވީ އަންނަ އަހަރުން ފެށިގެން ވޯލްޑް ޓޫރިޒަމް އޯގަނައިޒޭޝަންގެ އަހަރީ އާންމު ޖަލްސާތަކުގައި ރާއްޖެ ތަމްސީލުކުރުމުގެ ގޮތުން މަޓީއިން ބައިވެރިވާނެ ކަމަށެވެ.
ދުނިޔޭގެ ފަތުރުވެރިކަމުގެ އެންމެ އިސް ޖަމިއްޔާގެ ގޮތުގައި ޔޫއެންޑަބްލިއުޓީއޯއިން ޓޫރިޒަމް ޕްރޮމޯޓުކުރަނީ ދެމެހެއްޓެނިވި، ތިމާވެއްޓާ ރަހުމަތްތެރި، އަދި އެންމެނަށްވެސް އޭގެ އިގްތިސާދީ ފައިދާ ލިބޭ ސިނާއަތަކަށް ހެދުމަށެވެ. އަދި ދުނިޔޭގެ އެކި ކަންކޮޅުތަކުގައި ޓޫރިޒަމް ދާއިރާގެ ތައުލީމު ކުރިއެރުމަށާއި ސިޔާސަތު ކަނޑައެޅުމުގައި އެ ޖަމިއްޔާއިން އެހީތެރިވެދެއެވެ.
މަނިކު ވިދާޅުވީ އެ ޖަމިއްޔާގެ މެމްބަރެއްގެ ހައިސިއްޔަތުން ރާއްޖޭގެ ޓޫރިޒަމްގެ ދާއިރާގައި ދެމެހެއްޓެނިވި ތަރައްގީ ޕްރޮމޯޓުކުރުމަށާއި، ޔޫއެންޑަބްލިއުޓީއޯގެ އަމާޒުތައް ހާސިލުކުރުމަށް އެ ޖަމިއްޔާއަށް އެހީތެރިކަން ފޯރުކޮށްދިނުމުގައި މަޓީ ދެމިހުންނާނެ ކަމަށެވެ.