އައްޑޫ ސިޓީގައި ފަތުރުވެރިކަމަށް 4،000 އެނދު ތަރައްގީކުރުމުގެ ފުރުސަތު އަންނަ މަހު ހުޅުވާލާނެ ކަމަށް ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެއެވެ.
އައްޑޫގެ ފަތުރުވެރިކަމާ ގުޅޭ އެއްބަސްވުމެއްގައި ސިޓީ ކައުންސިލާއި މިނިސްޓްރީ އޮފް ޓޫރިޒަމް އާ ދެމެދު މިއަދު ވަނީ ސޮއިކޮށްފައެވެ. މި އެއްބަސްވުމާގުޅޭގޮތުން މިނިސްޓަރު ވިދާޅުވީ އެއްބަސްވުމަކީ އައްޑޫގައި ތަރައްގީ ކުރަން ކަނޑައަޅާފައިވާ 8،000 އެނދުގެ ތެރެއިން 4،000 އެނދު ތަރައްގީކުރުމާ ގުޅޭގޮތުން އެކުލަވާލި އެއްބަސްވުމެއް ކަމަށެވެ.
މި 4،000 އެނދު ތަރައްގީ ކުރާނީ ސިޓީ ހޮޓެލް އަދި ގެސްޓްހައުސްތަކުގައި ކަމަށް މިނިސްޓަރު ވިދާޅުވިއެވެ.
އައްޑޫ ސިޓީގެ މޭޔަރު އަބްދުﷲ ސޯދިގު ވިދާޅުވީ މި 4،000 އެނދު ތަރައްގީކުރުމަށް ޝައުގުވެރިވާ ފަރާތްތަކަށް އަންނަ މަހުގެ ތެރޭގައި ފުރުސަތު ހުޅުވާލާނެ ކަމަށެވެ. މި ތަންތަން ތަރައްގީކުރުމަށް ބޭނުންވާ ކޮންސެޕްޓު މިހާރު އެކުލަވާލާފައިވާ ކަމަށާއި މިހާރު ކުރިއަށްދަނީ ލޭންޑްސްކޭޕިންގެ މަސައްކަތްތައް ކަމަށް އޭނާ ވިދާޅުވިއެވެ.
"އިއުލާނު ކުރެވިގެންދާއިރު މި ސަރަހައްދުތައް ތަރައްގީ ކުރެވިގެންދަނެ ގޮތުގެ ކޮންސެޕްޓު އެކުލަވާލެވި މިތަންތަން ލޭންޑް ސްކޭޕް ކުރުމަށާއި ބީޗް ތަރައްގީ ކުރުމަށް މަސައްކަތް ވަނީ ފެށިފައި،" މޭޔަރު ވިދާޅުވިއެވެ.
މޭޔަރު ވިދާޅުވީ ފަތުރުވެރިކަން އޮންނަންވީ ވަކި ސަރަހައްދެއްގައި ނޫން ކަމަށާއި ދެކުނާއި އުތުރުގައި ފަތުރުވެރިކަން ތަރައްގީވެގެން ދާއިރު އައްޑޫގައި ކުރިއަށްގެންދާ މަޝްރޫއަކީ ދެކުނުގެ ފަތުރުވެރިކަމަށް ލިބިގެންދާނެ ކުރިއެރުމެއް ކަމަށެވެ.
މޭޔަރު ވިދާޅުވީ ފަތުރުވެރިކަމަށް ތަރައްގީކުރުމަށް އައްޑޫގެ އެކި އަވަށްތަކުން ބިން ކަނޑައަޅާފައިވާ ކަމަށެވެ. ގެސްޓްހައުސް ތަރައްގީ ކުރުމަށް 5،000 އަކަފޫޓުގެ ބިން ދޫކުރާއިރު ސިޓީ ހޮޓާ ތަރައްގީކުރުމަށް ދޫކުރާނީ 10،000 އަކަފޫޓުގެ ބިމެވެ.
"އިންވެސްޓުމެންޓުގެ ނިސްބަތަށް ބަލާފައި ބިން މި އަންނަނީ. ކޮންސެޕްޓު ނިމުނީމާ ޓު ބީ އެގްޒެކްޓް ކިތައް ބިންތޯ ދޫކުރާނީ ކަނޑައެޅިގެން ބުނެވޭނީ. ބައި ހެކްޓަރުން ފެށިގެން ތިނެއް ބައި ހެކްޓަރާ ހަމައަށް ހަ ސަރަހައްދަކުން މިހާރު ބިން ކަނޑައެޅިފައި އޮތީ،" އައްޑޫ މޭޔަރު ވިދާޅުވިއެވެ.
މި ބިންތައް ކަނޑައަޅާފައިވަނީ ބީޗްސައިޑުން ކަމަށާއި ރަނގަޅު އިންވެސްޓުމެންޓުތަކެއް އަންނާނެކަމަށް އުއްމީދު ކުރައްވާކަމަށް އޭނާ ވިދާޅުވިއެވެ.
އައްޑޫގައި 4،000 އެނދު ތަރައްގީ ކުރާއިރު ހުރިހާ އިންވެސްޓަރުންނަށްވެސް ފުރުސަތު އެބައޮތް ކަމަށާއި އައްޑޫގައި ތިބި ކުދި އަދި މެދުފަންތީގެ ވިޔަފާރިތަކަށްވެސް ފުރުސަތު އޮންނާނެ ކަމަށް މޭޔަރު ވިދާޅުވިއެވެ.
"އައްޑޫގައި ގިނަ އިންވެސްޓަރުންވެސް އެބަތިބި. މި ފުރުސަތު ފަތުރުވެރިކަމަށް ނިކުންނަންތިބި ވިޔަފާރިތަކަށް އޮންނާނެ،"
މޭޔަރު ވިދާޅުވީ އިންވެސްޓުކުރުމުގެ ފުރުސަތު ހުރިހާ ފަރާތްތަކަށްވެސް އޮންނާނެ ކަމަށެވެ.
ފަތުރުވެރިކަން ތަރައްގީކުރުމަށް ބިން ކަނޑައެޅިއިރު ބަލާފައިވާނީ ބީޗާކައިރި ފަތުރުވެރިންނަށް ޝައުގުވެރިވާނެ ސައިޓުތައް ކައިރިން ބިން ކަނޑައެޅުމަށް ކަމަށް މޭޔަރު ސޯދިގު ވިދާޅުވިއެވެ.
ރަށު ފަތުރުވެރިކަން ތަރައްގީ ކުރުމަށް 11 ސަރަހައްދަކުން ބިން ދޫކުރަން ނިންމާފައިވާކަން ރައީސް އިބްރާހިމް މުހައްމަދު ސޯލިހު އިއުލާނު ކުރެއްވީ ފަސްވަނަ މާސްޓާޕްލޭންގެ މަސައްކަތް އިފްތިތާހު ކުރުމަށް ބޭއްވި ޖަލްސާގައެވެ.