ސްވިމިން ޓްރެކް ބަލަހައްޓާ ސާފުކުރުމަށް ގުޑް ވޯކްސް މޯލްޑިވްސްއާ ހަވާލުކޮށްފިއެވެ.
ޔޫތު މިނިސްޓަރު އަހުމަދު މަހުލޫފް އިއްޔެ ކުރެއްވި ޓުވީޓެއްގައި ވިދާޅުވީ ގުޑް ވޯކްސްއާ ހަވާލުކުރީ އެއް އަހަރު ދުވަހުގެ މުއްދަތަކަށް ކަމަށެވެ.
އެ އެއްބަސްވުމުގައި މިނިސްޓްރީގެ ފަރާތުން މަހްލޫފް ސޮއިކުރެއްވިއިރު ގުޑް ވޯކްސް މޯލްޑިވްސްގެ ފަރާތުން ސޮއިކުރެއްވީ މެނޭޖިން ޑިރެކްޓަރ މުހައްމަދު ރާއިދުއެވެ.
ފަތާ ޓްރެކްގައި ގިނަ އަދަދެއްގެ ކުންޏާއި ނަޖިހުން ތަގައްޔަރުވެފައިވާތީ އާންމުން އަބަދުވެސް ޝަކުވާ ކުރެއެވެ. މަހުލޫފް ވިދާޅުވީ ގުޑް ވޯކްސްއާ ހަވާލުކުރުމުން ކުންޏާއި ނަޖިހުގެ މައްސަލައަސް ކޮންމެެސް ވަރެއްގެ ހައްލެއް ލިބޭނެ ކަމަށެވެ.
ސްވިމިން އެސޯސިއޭޝަނުން މިދިޔަ މޭ މަހު ވަނީ، މާލޭ ފަތާ ޓްރެކްގައި ސިޑިބަރިއަކާއެކު ފާހާނާ އާއި ފެންވަރާނެ ވަސީލަތްތައް ހިމެނޭގޮތަށް އިމާރާތެއް ހަދައިދޭނެ ބަޔަކު ހޯދަންވެސް އިއުލާންކޮށްފައެވެ.
ނަމަވެސް އެ އިމާރާތުގެ މަސައްކަތް އަދި އޮތީ ނުފެށިއެވެ. މަހުލޫފް ވިދާޅުވީ އެ އިމާރާތުގެ މަސައްކަތް ލަސްވެގެން އުޅެނީ އެންވަޔަރަމަންޓަލް ޕްރޮޓެކްޝަން އޭޖެންސީ (އީޕީއޭ) ގެ ހުއްދަ ނުލިބިގެން ކަމަށެވެ.
މިދިޔަ މޭ މަހު ފަތާ ޓްރެކް ސަރަހައްދު ވަނީ ފުންވެސްކޮށްފައެވެ. ރާއްޖޭގެ ގިނަ އަދަދެެއްގެ ފެތުންތެރިން އެކި މުބާރާތްތަަަށް ތަމްރީންތައް ހެދުމަށްވެސް ބޭނުންކުރަނީ ހަމަ އެ ފަތާ ޓްރެކެވެ.