ސުޕްރީމް ކޯޓުގެ ފަނޑިޔާރުންގެ ގޮތުގައި ޑރ. އަޒްމިރަލްދާ ޒާހިރު އަދި އައިޝާ ޝުޖޫނު އައްޔަނުކޮށްދިނުމަށް އެދި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ރައްޔިތުންގެ މަޖިލީހަށް ފޮނުވި މައްސަލަ ދިރާސާ ކުރުމަށް މަޖިލީހުގެ ޖުޑިޝަރީ ކޮމިޓީއަށް ފޮނުވައިފި އެވެ.
އަޒްމިރަލްދާ އަދި ޝުޖޫންގެ ނަންފުޅާ އެކު ސުޕްރީމް ކޯޓުގެ ފަނޑިޔާރު ކަމަށް ކުރިމަތިލީ ބޭފުޅުންގެ ނަންފުޅުތައް ރައީސް މަޖިލީހަށް ފޮނުއްވީ މިރެ އެވެ. މިހާރު ކުރިއަށް ދާ މަޖިލީހުގެ ޖަލްސާގައި މަޖިލީހުގެ ރައީސް މުހައްމަދު ނަޝީދު ވަނީ އެމައްސަލަ ޖުޑިޝަރީ ކޮމިޓީއަށް ފޮނުއްވާކަން އިއުލާނު ކުރައްވާފަ އެވެ.
ރައީސް ނަޝީދު ވިދާޅުވީ މަޖިލީހުގެ ތަޅުމަށް ފަނޑިޔާރުންގެ ނަންތައް އިއްވުމަށް ފަހުގައި އެ ނަންފުޅުތައް ކަމާ ގުޅޭ ކޮމިޓީއަށް ދާ ގޮތަށް މަޖިލީހުގެ ގަވައިދުގައި ލިޔެފައިވާ ކަމަށެވެ. އޭގެ ފަހުން ކޮމިޓީގެ ރިޕޯޓު އެކުލަވާލުމަށް ފަހު މެމްބަރުންނަށް ތިން ދުވަސް ދޭން ޖެހޭ ކަމަށް މަޖިލީހުގެ ރައީސް ވިދާޅުވި އެވެ.
އަދި ތަޅުމަށް ކޮމިޓީ ރިޕޯޓު ހުށަހަޅައި ބަހުސް ކުރުމަށް ފަހު ވޯޓަށް އަހާގޮތަށް މަޖިލީހުގެ ގަވައިދުގައި އޮންނަކަން ފާހަގަ ކުރައްވާ ރައީސް ނަޝީދު ވިދާޅުވީ ފަނޑިޔާރުން އައްޔަން ކުރުމުގެ މައްސަލަ ބުރާސްފަތި ދުވަހާ ހަމައަށް ނިންމާ ނުލެވޭނެ ކަމަށެވެ.
"މިތަރުތީބުން އަޅުގަނޑުމެން ދާއިރުގައި ފަނޑިޔާރުން އައްޔަން ކުރުމުގެ މަސައްކަތް ދެމިގެން އެބަދޭ ބުރާސްފަތި ދުވަހުގެ ފަހަތަށް. އެނގިވަޑައިގަންނަވާނެ މި މަޖިލީހުން އެހެން ގޮތަކަށް ނުނިންމަވާ ނަމަ ބުރާސްފަތި ދުވަހަކީ ދައުރު ނިމޭ ދުވަސް. އަޅުގަނޑުމެންނަށް އިތުރު ތިން ހަތަރު ދުވަސް ބޭނުންވާކަން އެއީ ހުރިހައި މެމްބަރުންނަށްވެސް ސާފުވެވަޑައިގަންނަވާނެ ކަމެއް." ނަޝީދު ވިދާޅުވި އެވެ.
ނަޝީދު ވިދާޅުވާގޮތުން ސުޕްރީމް ކޯޓަށް ފަނޑިޔާރުން އައްޔަން ކުރަން އިތުރު ތިން ދުވަސް މަޖިލީހުގެ ދައުރަށް އިތުރުކުރަން ޖެހޭނެ އެވެ.
ސުޕްރީމް ކޯޓުގެ ފަނޑިޔާރުންގެ ގޮތުގައި އަޒްމިރަލްދާ އަދި ޝުޖޫން އައްޔަނު ކުރުމަށް ޖުޑިޝަލް ސާވިސް ކޮމިޝަނުގެ ލަފައަކަށް އެދި ރައީސް ހުށަހެޅުއްވުމުން ޖޭއެސްސީއިން ވަނީ އެ ދެ ބޭފުޅުން ސުޕްރީމް ކޯޓުގެ ފަނޑިޔާރުންނަށް އައްޔަން ކުރުމަށް ފެންނަ ކަމަށް ލަފާ ދެއްވާފަ އެވެ.
ސުޕްރީމު ކޯޓުގެ ފަނޑިޔާރުކަމަށް ކުރިމަތިލެއްވި ބޭފުޅުންނަކީ ހައިކޯޓުގެ ފަނޑިޔާރު އަލީ ސަމީރާއި އަބްދުﷲ ހަމީދުގެ އިތުރުން ޝުއައިބު ހުސެން ޒަކަރިޔާ އަދި މުހައްމަދު ނިޔާޒެވެ.
އައިޝާ ޝުޖޫން މުހައްމަދަކީ ސިވިލް ކޯޓުގެ ގާޒީކަން ކުރައްވާފައިވާ ބޭފުޅެކެވެ. އަދި ޑރ. އަޒްމިރަލްދާ ޒާހިރަކީ ހައިކޯޓުގެ ފަނޑިޔާރުކަން ކުރައްވާފައިވާ ބޭފުޅެކެވެ.
ސުޕްރީމް ކޯޓުގެ ފަނޑިޔާރު ކަމަށް އަންހެން ބޭފުޅުން އައްޔަން ކުރާތީ ބައެއް ދީނީ އިލްމުވެރިން ވަނީ ކަންބޮޑުވުންފާޅު ކުރައްވާފައެވެ.