ކުރީގެ ނައިބު ރައީސް އަހްމަދު އަދީބު އަބްދުލް ގަފޫރު ފިލަން މަސައްކަތް ކުރި ޓަގު ބޯޓު ދުއްވި ކެޕްޓަން ރާއްޖެއިން ފުރުން މަނާކޮށްފައިވާ ކަމަށް ފުލުހުން ބުނެފި އެވެ.
ޕާސްޕޯޓު ހިފަހައްޓާފައި ވަނިކޮށް އަދީބު "ވާގޯ 9" ނަމަކަށް ކިޔާ ޓަގު ބޯޓުގައި ފިލަން މައްސައްކަތް ކުރަނިކޮށް އިންޑީއާގެ ޓުޓިކޮރިން އިން އަތުލައިގަތީ މިމަހުގެ އެއްވަނަ ދުވަހު އެވެ. އެ ޓަގު ބޯޓާއެކު އަދީބު އެނބުރި މާލެ ގެނައީ އޭގެ ތިން ދުވަސް ފަހުން މިމަހު ހަތަރު ވަނަ ދުވަހު އެވެ.
ފުލުހުންގެ މީޑިއާ އޮފިޝަލް މިއަދު "ސަން" އަށް ވިދާޅުވީ، ޓަގު ބޯޓުގެ ކެޕްޓަން ރާއްޖެއިން ފުރައިގެން ދިޔުމަށް މިހާރު މަނާކޮށްފައިވާ ކަމަށާއި އަދިވެސް އެ މައްސަލަ އިތުރަށް ތަހުގީގު ކުރަމުންދާ ކަމަށެވެ. މަސައްލައާ ގުޅޭ އިތުރު ތަފްސީލެއް މީޑިއާ އޮފިޝަލް ނުދެއްވަ އެވެ.
ޓަގު ބޯޓާ ގުޅިގެން ފުލުހުން ހިންގާ ތަހުގީގުގެ ބޭނުމަށް އެ ބޯޓު ރާއްޖެ އައުމުން ހިފެހެއްޓުމަށް މޯލްޑިވްސް ކަސްޓަމްސް އަށް ދަންނަވާފައިވާ ކަމަށް ފުލުހުން މީގެ ކުރިން ވަނީ ބުނެފައެވެ.
އިންޑިއާގެ ނޫސްތަކުން މީގެ ކުރިން ރިޕޯޓޫކޮށްފައިވާ ގޮތުގައި އަދީބު ރާއްޖެއިން ދަތުރުކުރި "ވާގޯ 9" ގައި އޭނާ ހުރިކަން ފަޅާ އަރުވާލީ އެ ބޯޓުގައި ހުރި އިންޑިއާ ފަޅުވެރި އެކެވެ. އަދީބާއެކު އެ ޓަގު ބޯޓުގައި ޖުމްލަ 10 މީހަކު ދަތުރު ކުރި ކަމަށްވެ އެވެ. އޭގެ ތެރޭގައި ހިމެނެނީ އަދީބު ފަޅާ އަރުވާލި އިންޑިއާ ފަޅުވެރިޔާއާއި އިންޑޮނޭޝިއާއަށް ނިސްބަތްވާ އަށް މީހެއް ކަމަށް ނޫސްތަކުން ވަނީ ރިޕޯޓުކޮށްފަ އެވެ.
އިންޑިއާ ފަޅުވެރިޔާއާ ހަވާލާދީ އެގައުމުގެ ނޫސްތަކުން ރިޕޯޓުކޮށްފައިވާ ގޮތުގައި އަދީބު އެ ޓަގް ބޯޓަށް އެރީ، ބޭސްފަރުވާ ފުރިހަމަ ކުރަން އަނބުރާ އިންޑިއާޔަށް ދަނީ ކަމަށް ބުނެ އެވެ.
ޓަގު ބޯޓަކީ ސިންގަޕޫރުގެ ޓަގު ބޯޓެއް ކަމަށް ވެއެވެ. ނަމަވެސް އަދީބުގެ ބަންދުގެ މަޖިލީހުގައި ފުލުހުން ބުނެފައި ވަނީ ރާއްޖޭގެ ކަނޑުގެ ސަރަހައްދުން ބޭރުން އަދީބު ހައްޔަރު ކުރި އިރު އެ ބޯޓުގައި ނަގައިފައިވަނީ އިންޑިއާގެ ދިދައެއް ކަމަށެވެ.
މުއްދަތުގެ މަޖިލީހުގައި އަދީބު ވިދާޅުވެފައިވަނީ އޭނާ ފިލަން މަސައްކަތް ކުރީ، ޕްރެސެކުއުޓާ ޖެނެރަލްއާއި އޭނާއާ އެކު ވެފައިވާ އެއްބަސްވުމެއްގެ ދަށުން ހިޔާނާތުގެ މައުލޫމަތުތައް ޕީޖީއާއެކު ހިއްސާކުރުމުން ފުރާނައަށް ނުރައްކާވުމުގެ ސަބަބުން ކަމަށެވެ. އަދީބު ވިދާޅުވީ، އޭނާ އަތުގައި ހުރި މައުލޫމަތަކީ ކުރިން ނޭނގޭ ވަރަށް ގިނަ ނުފޫޒުގަދަ ފަރާތްތަކެއްގެ މައުލޫމަތު ކަމަށެވެ.
ޅ. މާބިންހުރާގައި ޓޫރިސްޓް ރިސޯޓެއް ތަރައްގީ ކުރުމަށް ކުރެއްދޫ ހޯލްޑިންގްސްއަށް ދިނުމުން އެކުއިޒިޝަން ކޮސްޓްގެ ގޮތުގައި ދައުލަތަށް ދިން އަށް މިލިއަން ޑޮލަރަށް ޚިޔާނާތްތެރިވި މައްސަލާގައި ކްރިމިނަލް ކޯޓުން އިއްވި އަށް އަހަރުގެ ހުކުމް ހައިކޯޓުން ބާތިލް ކުރުމުން ދައުލަތުން މިހާރު ވަނީ އެ މައްސަލަ އިސްތިއުނާފު ކޮށްފައެވެ. އަދީބުގެ ފާސްޕޯޓު ހިފެހެއްޓީ އެ މައްސަލައިގައެވެ. ސުޕްރީމް ކޯޓުން މިމަހު އަށް ވަނަ ދުވަހު ވަނީ އެ މައްސަލައިގައި ވަކި ގޮތެއް ނިމެންދެން އަދީބު ބަންދު ކުރުމަށް އަމުރުކޮށްފައެވެ.