ރާއްޖޭގައި ދިރިއުޅޭ އިންޑިއާގެ ރައްޔިތުންނަށް ސަލްޓަންޕާކަށް ހިލޭ ނުވަދެވޭތީ ކަންބޮޑުވުން ފާޅުކޮށްފިއެވެ.
ރާއްޖޭގައި ދިރިއުޅޭ އިންޑިއާގެ ރައްޔިތުންގެ ނަމުގައި ހިންގާ ޓުވީޓާ އެކައުންޓުން ކުރި ޓުވީޓުގައި ބުނީ ރާއްޖޭގައި އިންޑިއާގެ އެތަކެއް ހާސް ރައްޔިތުންނެއް މާލޭގައި މަސައްކަތް ކުރަމުންދާ ކަމަށެވެ. ނަމަވެސް މާލޭގައި ހުންނަނީ ވަރަށް މަދު ޕާކުތަކެއް ހުންނައިރު ޓެކްސްވެސް ދައްކައިގެން ނޫނީ ސަލްޓަން ޕާކްއަށް ނުވަދެވޭ ކަމަށެވެ.
"އަހަރުމެންވެސް ހަމަ އުޅެނީ ޓެކްސް ދައްކައިގެން. ރާއްހޭގެ އިގްތިސާދުގައި އަހަރުމެންގެ ހިއްސާ އެބައޮތް،" އިންޑިއަން އިން މޯލްޑިވްސް (އައިއައިއެމް) ގެ ޓުވީޓުގައި ވެއެވެ.
މާލޭގެ މޭޔަރު ޝިފާ މުހައްމަދު ޓެގްކޮށް އައިއައިއެމް އިން ވަނީ ސަލްޓަންޕާކަށް ވަނުމަށް ނަގާ ޓެކްސް އުވާލުމަށްވެސް ދަންނަވައިފައެވެ.
އައިއައިއެމްއިން އިތުރަށް ބުނީ އިންޑިއާގެ ސަރުކާރުން ރާއްޖެއަށް އެތަކެއް މިލިއަން ޑޮލަރުގެ އެހީ ދެމުންގެންދާއިރު ޕާކްފަދަ ތަންތަނަށް އިންޑިއާގެ ރައްޔިތުންނަށް ހިލޭ ވަދެވެންޖެހޭނެ ކަމަށް ގަބޫލުކުރާ ކަމަށެވެ.
އައިއައިއެމްގެ ޓުވީޓުތަކާ ގުޅިގެން ރާއްޖޭގެ ބައެއް މީހުންގެ ހިޔާލުވެސް ވަނީ ދެބައިވެފައެވެ.
މިނިވަން ނޫހުގެ ކުރީގެ އެޑިޓަރު އައިޝަތު އާނިޔާ ވިދާޅުވީ އާޓިފިޝަލް ބީޗާއި އަދި ސަލްޓަން ޕާކަށް ހަމައެކަނި ދިވެހިންނަށް ހިލޭ ވަދެވޭގޮތަށް އޮންނަ އޮތުމަށް ތާއިދުކުރައްވާ ކަމަށެވެ.
ރާއްޖޭގެ ބައެއް މީހުން ބުނީ ޓުވިޓާގައި ބުނީ އިންޑިއާގެ ރައްޔިތުންނަށް ހިލޭ ޕާކްއަށް ވަދެވޭނަމަ ބަނގުލަދޭޝްގެ ރައްޔިތުންނަށްވެސް ހިލޭ ވަދެވޭން ޖެހޭނެ ކަަމަށެވެ.
" ރާއްޖޭގައި އޮތް 1190 ރަށުގެ ތެރެއިން އެންމެ ރަށެއްގައި އެންމެ ޕާކަކަށް ވަނުމުގައި ބޭރު މީހުންގެ އަތުން ފީއެއް ނެގުމަކީ ބޮޑު މައްސަލައެއް ތޯ؟" ސަލްޓަންޕާކްއަށް ހިލޭ ހަމައެކަނި ދިވެހިންނަށް ވަދެވޭތީ އެކަމަށް ތާއިދުކޮށް އަންހެނަކު ކުރި ޓުވީޓެއްގައި ބުންޏެވެ.
ޓުވިޓާގައި ދިވެހިންގެ ބައެއް މީހުން ބުނީ އިންޑިއާގެ ތާޖް މަހަލްފަދަ ތަންތަނަށް ވަނުމަށްވެސް އެގައުމުގެ ރައްޔިތުން ނޫން މީހުންގެ އަތުންވެސް ބޮޑު ފީއެއް ނަގާ ކަމަށެވެ. އަދި މިއީ ތަފާތުކުރުން ނޫންތޯ ބައެއް މީހުން ވަނީ ސުވާލުކޮށްފައެވެ.
ރާއްޖޭގައި އިންސާނީ ހައްގުތަކަށް ވަކާލާތުކުރާ ބައެއް މީހުން ވަނީ އައިއައިއެމްގެ ވާހަކަތަކަށް ތާއިދުކޮށްފައެވެ.
އެގޮތުން އދ.ގެ ސްޕެޝަލް ރެޕަޓުއާ ފޯ ފްރީޑަމް އެންޑް ރެލިޖަސް ބިލީފްސް ޑރ. އަހުމަދު ޝަހީދު ވިދާޅުވީ އައިއައިއެމްއިން އެދުނު އެދުމުގައި ބުރަދަން އެބަހުރި ކަމަށެވެ.
"އަޅުގަނޑުމެން ފާރެއް ނޫން އަޅަންވީ. (އެއްބަޔަކު އަނެއްބަޔަކާ ގުޅުވަން) ބުރިޖުތައް ބިނާކުރަންވީ." ޑރ. ޝަހީދު ވިދާޅުވިއެވެ.
އިންސާނީ ހައްގުތަކަށް މަސައްކަތް ކުރައްވާ ރާއްޖޭގެ އެކްޓިވިސްޓެއް ކަމަށްވާ އަހުމަދު މުހައްމަދު (ފޯމި) ވެސް ވިދާޅުވީ ބިދޭސީންނާއި ދިވެހިންނަށްވެސް ރާއްޖޭގައި ހަމަހަމަކަން އޮންނަން ޖެހޭނެ ކަމަށެވެ. އަދި ބިދޭސީންނަށްވެސް ޕެންޝަން ލިބޭނެގޮތް ހެދުމަށް އޭނާ ވަނީ ގޮވާލައްވައިފައެވެ.
ހިއުމަން ރައިޓްސް ކޮމިޝަން (އެޗްއާރްސީއެމް)ގެ ކުރީގެ ނައިބު ރައީސް އަހުމަދު ތޮލާލްވެސް ވަނީ ބިދޭސީންނަށް ހިލޭ ޕާކަށް ވަނުމަށް ތާއިދުކުރައްވައިފައެވެ.