ރާއްޖޭގައި ފާލު ބަލަން އުޅުނު އިންޑިއާގެ ތިން މީހުން ޑީޕޯޓްކުރުމުގެ މަސައްކަތް ފަށައިފައިވާ ކަމަށް މޯލްޑިވްސް އިމިގްރޭޝަނުން މިއަދު ބުނެފިއެވެ.
އިމިގްރޭޝަނުން މިއަދު އެކްސްގައި ކުރި ޕޯސްޓެއްގައި ވަނީ ގަވައިދާ ޚިލާފަށް ފާލު ބެލުމުގެ ހަރަކާތްތަކެއް ކުރިއަށްގެންދިޔަ ތިން ބިދޭސީއަކު އިއްޔެ ހައްޔަރުކޮށްފައިވާ ކަމަށް ބުނެފައެވެ.
އިންޑިއާއަށް ނިސްބަތްވާ އެ ތިން މީހުންނަކީ:
- ނަގަރަޖާ ބައިލްޕަޓީ، 39 އަހަރު
- ދަނަންޖޭ ބައިލްޕަޓީ، 18 އަހަރު
- ސްރީހަރީ ވަނަމް، 25 އަހަރު
ފުލުހުންނާ ގުޅިގެން ކުރިއަށްގެންދިޔަ އޮޕަރޭޝަނެއްގައި އެ ތިން މީހުން ހައްޔަރުކުރުމަށް ފަހު އެ މީހުން ޑީޕޯޓް ކުރުމުގެ މަސައްކަތް ކުރަމުން އަންނަ ކަމަށް އިމިގްރޭޝަނުން ބުންޏެވެ.
ރާއްޖޭގައި ހިންދޫ ފާދިރީއަކު ރޫހާނީ ކަންކަމަށް ފަރުވާދޭކަމަށް ބުނެ އިޝްތިހާރުކޮށް، އެ ކަން ކުރާ މައްސަލައެއް ބަލަމުން އަންނަކަމަށް އިއްޔެ ފުލުހުން ބުނެފައިވެއެވެ.
"މާސްޓަ ދުރްގާ ރާއޯ ގުރުޖީ" ނަމަކަށް ކިޔާ ހިންދޫ ފާދިރީއެއްގެ ޚިދުމަތްތައް ރާއްޖޭގައި ދޭ ކަމަށް ބުނެ އަންނަނީ އިޝްތިހާރު ކުރަމުންނެވެ. އެގޮތުން އަތް ބެލުމާއި، މޫނު ބެލުމާއި، ހޮރޮސްކޯޕް ބަލައި ދިމާވެފައި ހުންނަ މައްސަލަތައް ދެނެގަނެ ފަރުވާދޭކަމަށް އިޝްތިހާރުކޮށްފައިވެއެވެ.
ފުލުހުން ބުނީ ދިވެހިންގެ ސަގާފަތާއި ދީނާ ޚިލާފު އެ ފަދަ ކަންކަމުގެ މަޢުލޫމާތު އެކަކު އަނެކަކާ ހިއްސާ ކުރުމުގެ ބަދަލުގައި ވީ އެންމެ އަވަހަކަށް ކަމާބެހޭ އިދާރާތަކުގެ ސަމާލުކަމަށް ގެނެސް ގާނޫނީ ފިޔަވަޅު އެޅުމުގެ މަސައްކަތް ކުރިއަށް ގެންދިއުމަކީ މުހިންމު ކަމެއް ކަމަށެވެ.
އެހެންކަމުން، އެ ފަދަ އިޝްތިހާރެއް ފެނިއްޖެ ނަަމަ ލަސްނުކޮށް އަންގަން ފުލުހުން ވަނީ އެދިފައެވެ.
މިދިޔަ އަހަރުގެ އޮގަސްޓު މަހު ވެސް، ޓޫރިސްޓު ވިސާގައި އެ ފަދަ ފާދިރީއަކު ރާއްޖެ އައިސްފައިވެއެވެ.