ރާއްޖޭގައި ގަވާއިދާ ޚިލާފަށް އުޅޭ ބިދޭސީންގެ މައުލޫމާތު އެއްކުރަން ހޯމް މިނިސްޓްރީން ފެށި ކުރަނގި އޮޕަރޭޝަންގެ ދަށުން މިހާތަނަށް 25،000 އަށް ވުރެ ގިނަ ބިދޭސީންގެ މައުލޫމާތު އެއްކޮށްފައިވާ ކަމަށް ހޯމް މިނިސްޓަރު އަލީ އިހުސާން ރޭ ވިދާޅުވެއްޖެއެވެ.
އޮޕަރޭޝަން ކުރަނގީގެ މައިގަނޑު މަގުސަދަކީ ދިވެހިރާއްޖޭގައި ޤަވާއިދާ ޚިލާފަށް ދިރިއުޅެމުންދާ ބިދޭސީ މަސައްކަތްތެރިންގެ މައްސަލައަށް ދާއިމީ ހައްލެއް ހޯދުމެވެ. އެގޮތުން، ރާއްޖޭގައި ވަޒީފާ އަދާކުރާ ބިދޭސީންގެ އިނގިލީގެ ނިޝާން ނެގުމާއި އެ ބިދޭސީ މީހާ ވަޒީފާ އަދާކުރަނީ ރާއްޖޭގައި ހެދިފައިހުރި ޤަނޫނާއި ޤަވާއިދުގެ ދަށުންތޯ މި އޮޕަރޭޝަނުގެ ތެރެއިން ޔަގީން ކުރާނެއެވެ.
މި އޮޕަރޭޝަންގެ ބޮޑު ހަރަކާތެއް އިއްޔެ މާލޭގައި ހިންގާފައިވާއިރު، މިނިސްޓަރު އިހުސާން ރޭ އެކްސްގައި ކުރެއްވި ޕޯސްޓެއްގައި ވަނީ އެ ހަރަކާތާ ގުޅޭ ތަފާސްހިސާބުތަކެއް ހިއްސާކުރައްވާފައެވެ.
ހޯމް މިނިސްޓަރު އަލީ އިހުސާން: މިނިސްޓަރު ވަނީ އޮޕަރޭޝަން ކުރަނގީގެ ތަފާސްހިސާބުތަކެއް ހިއްސާކުރައްވާފައި -- ސަން ފޮޓޯ/ މޫސާ ނަދީމް
މިގޮތުން، މިނިސްޓަރު ވިދާޅުވީ، އިއްޔެ އަކީ މާލެ ސަރަހައްދުގައި ޕްރައިވެޓް ސެކްޓާއާއި އާންމު ތަންތަނަށް ފުޅާކޮށް މި އޮޕަރޭޝަން ފެށުނު ދުވަސް ކަމަށެވެ.
އިއްޔެ ކުރެވުނު މަސައްކަތުން 1455 ބިދޭސީން މަސައްކަތްތެރިންގެ 10 އިނގިލީގެ ނިޝާނާއި ފޭޝަލް ރިކޮގްނިޝަންއަށް ބޭނުންވާ ފޮޓޯ ނަގައި، ޑޭޓާ ބޭސް އަޕްޑޭޓުކޮށްފައިވާ ކަމަށް މިނިސްޓަރު ވިދާޅުވިއެވެ.
އޭގެ އިތުރުން، 17 ނޮވެންބަރު 2024 ގައި ރައީސް ޑރ، މުޙައްމަދު މުއިއްޒު ގައުމާ މުޚާތަބުކުރެއްވިއިރު، މި އޮޕަރޭޝަންގެ ދަށުން 10،000 ބިދޭސީންގެ މައުލޫމާތު ނަގާފައިވާ ކަމަށާއި އޭގެ ފަހުން މިދިޔަ ދެ މަސް ތެރޭ 15،000 އަށް ވުރެ ގިނަ ބިދޭސީންގެ މައުލޫމާތު އެއްކޮށްފައިވާ ކަމަށް މިނިސްޓަރު އިހުސާން ވިދާޅުވެފައިވެއެވެ.
މިނިސްޓަރު ވިދާޅުވީ، އިއްޔެއާ ހަމައަށް 25،483 ބިދޭސީންގެ މައުލޫމާތު އެއްކުރެވިފައިވާ ކަމަށެވެ.
"ރާއްޖޭގައި ގަވައިދާ ޚިލާފަށް އުޅޭ ބިދޭސީންގެ މައްސަލައަށް ދާއިމީ ހައްލެއް ހޯދުމަށް ތިން އަހަރުގެ ޕްލޭނެއްގެ ދަށުން ކުރެވެމުންދާ މި މަސައްކަތް ﷲ އިރާދަފުޅާ އެކު، ކާމިޔާބު ކަމާ އެކު ނިންމާލެވޭނީ 2027 ވަނަ އަހަރުގެ އޭޕްރީލް މަހުގައި،" މިނިސްޓަރު ވިދާޅުވިއެވެ.
އިހުސާން ވަނީ މި އޮޕަރޭޝަންގެ މަސައްކަތުގައި އިމިގްރޭޝަނާއި ފުލުހުންނާއި ހޯމް ސެކްޓާގެ މުވައްޒަފުންނާއި ކައުންސިލްތަކުން ކުރާ މަސައްކަތް ފާހަގަކުރައްވައި، އެކަމަށް ޝުކުރު ދަންނަވާފައެވެ.