މާލޭގެ ތޮއްޖެހުމަށް ހައްލެއް އަންނާނީ މާލޭގައި ރެޖިސްޓްރީކުރާ ވެހިކަލްތަކުގެ އަދަދު ލިމިޓް ކޮށްގެން ކަމަށް ޓްރާންސްޕޯޓު މިނިސްޓަރު އާއިޝަތު ނަހުލާ ވިދާޅުވެއްޖެ އެވެ.
ޕާކިން ސްޓިކާ ޖެހުމާ ގުޅޭ ގޮތުން ރައްޔިތުންގެ މަޖިލީހުގެ ކާށިދޫ ދާއިރާގެ މެންބަރު އަބްދުﷲ ޖާބިރު މިއަދު މަޖިލީހުގެ ޖަލްސާގައި ކުރެއްވި ސުވާލަށް ޖަވާބު ދެއްވަމުން މިނިސްޓަރު ނަހުލާ ވިދާޅުވީ މާލޭގެ ޕާކު ކުރުމުގެ މައްސަލައަށް ހައްލެއް ގެނައުމަށް މި އަހަރުގެ ނިޔަލަށް ސައިކަލު ޕާކުކުރުމަށް 1000-1500 ޖާގަ އަދި ހަތަރު ފުރޮޅުލީ އުޅަނދު ޕާކު ކުރުމަށް 100 ޖާގަ މި އަހަރުގެ ނިޔަލަށް ކަނޑައަޅާނެ ކަމަށެވެ.
މާލޭގެ މަގުތަކަށް ފަސޭހައެއް ގެނައުމަށް ސަރުކާރުން މަސައްކަތް ކުރަމުންދާކަން ފާހަގަކުރައްވާ މިނިސްޓަރު ނަހުލާ ވިދާޅުވީ މާލޭގެ އެކި ސަރަހައްދުތަކުގައި ޕާކު ކުރާނެ ޖާގަތައް ހަދަމުންދާ ކަމަށެވެ. މިހާތަނަށް ފަސް ސަރަހައްދެއްގައި ޕާކިން ސްޕޭސް ގާއިމް ކުރެވިފައިވާކަން މިނިސްޓަރު ފާހަގަ ކުރެއްވި އެވެ.
"މާލޭގައި ޕާކު ކުރާނެ ތަންތަން ހެދިކަމުގައި ވިޔަސް މާލޭގެ ޕާކިންއަށް މުޅިން ހައްލެއް ގެނެވިގެންދާނީ މާލޭގައި ރެޖިސްޓްރީ ކުރެވޭ އުޅަނދުތައް ކޮންޓްރޯލު ކުރެވިގެން ކަމުގައި ދަންނަވަން،" މިނިސްޓަރު ވިދާޅުވި އެވެ. އަދި ވިދާޅުވީ، މާލޭގައި ދުއްވާ އުޅަނދުތަކާ އެކު ތޮއްޖެހުން ކުޑަކުރުމަށް ކެބިނެޓަށް ކަރުދާހެއް މިހާރު ހުށަހަޅުއްވާފައިވާ ކަމަށެވެ.
"އެ ކަރުދާހުގައި ވަރަށް ތަފްސީލުކޮށް ޓްރެފިކްގެ މައްސަލައާއި ހައްލު ބަޔާންކޮށްފައިވާނެ،" މިނިސްޓަރު ވިދާޅުވި އެވެ.
ނަހުލާ ވިދާޅުވީ ވެލާނާ އިންޓަނޭޝަނަލް އެއާޕޯޓްގެ މުވައްޒަފުންނަށް ހާއްސަކޮށްގެން އެއާޕޯޓުގައި ޕާކު ކުރެވޭނެ އިންތިޒާމު ހަމަޖެއްސުމާއެކު މާލެގެ ބޮޑުތަކުުރުފާނު މަގުގައި ޕާކު ކުރާ ވެހިކަލްތައް މަދުވެފައިވާ ކަމަށެވެ.
"އެއާޕޯޓުގެ ދެ ސަރަހައްދަކުން ސައިކަލުތައް ޕާކުކުރެވޭނެ 1692 ޖާގަ އަދި ހަތަރު ފުރޮޅުލީ އުޅަނދު ޕާކު ކުރުމަށް ވަނީ 47 ޖާގަ ކަނޑައެޅިފައި،" މިނިސްޓަރު ނަހުލާ ވިދާޅުވި އެވެ.
އެކިއެކި ބޭނުންތަކަށް އެއާޕޯޓަށްދާ މީހުންނަށް ފީ އެއް ދައްކައިގެން އެއާޕޯޓުގައި ޕާކު ކުރެވެނެ އިންތިޒާމު ހަމަޖައްސާފައިވާކަން މިނިސްޓަރު ވިދާޅުވި އެވެެ.
"އަޅުގަނޑުމެންގެ އާދަކާދަ ހުންނަ ގޮތުނ ކޮންމެ ބޭފުޅަކުވެސް އެބޭފުޅަކު އެދާތަނެއްގެ ކުރިމަތީގައި ޕާކު ނުކުރެވޭނަމަ، ޕާކިން ޒޯނަކަށް ބެލުމެއް ނެތި، ޕާކު ކުރަމުން ދިޔުމަކީ މިއަދުވެސް ފެންނަމުންދާ ހަގީގަތެއް،" އެކަން އެގޮތަށް ކުރުމުން ހުރިހާ ރައްޔިތުންނަށްވެސް އުނދަގޫވާކަން މިނިސްޓަރު ފާހަގަ ކުރެއްވި އެވެ.
މިނިސްޓަރު ވިދާޅުވީ އެއްގަމު އުޅަނދުތަކުގެ ގާނޫނަކީ ތަންފީޒު ކުރަންޖެހޭ ގާނުނެއް ކަމަށާއި ގަވައިދާ ހިލާފަށް ޕާކުކުރާ ފަރާތްތަކާމެދު އަޅަންޖެހޭ ފިޔަވަޅުތައް ގަވައިދުގައި ބަޔާންކޮށްފައިވާ ކަމަށެވެ.
"އެހެންކަމާއެކު އާންމު ރައްޔިތުންގެ މަސްލަހަތާ ގުޅޭގޮތުން ކޮންމެހެން އަޅަންޖެހޭ ފިޔަވަޅުތައް ނާޅާ ދޫކޮށްލުމަކީވެސް ކުރެވޭނެ ކަމެއް ކަމަށް ނުފެންނާތީ ފުލުހުން ސްޓިކާ ޖަހަމުން ގެންދަނީ ގަވައިދާ ހިލާފަށް ޕާކު ކުރުމުގެ ސަބަބުން އާންމުންނަށް ދަތިވާގޮތަށް ޕާކުކޮށްފައި ހުންނަ އުޅަނދުތަކުގައި ކަމުގައި ދަންނަވަން،" މިނިސްޓަރު ވިދާޅުވި އެވެ.
މިނިސްޓަރު ނަހުލާ ވިދާޅުވީ ޕާކު ކުރުމުގެ މައްސަލައަށް ދާއިމީ ހައްލެއް ގެނައުމަށް އެކަން އިތުރަށް ދިރާސާ ކުރަމުންދާ ކަމަށެވެ. މީގެ އިތުރުން މާލެގެ މަތުތައް ފަރުމާކޮށްފައިހުރީ ޕާކިން އަށް ޖާގަ ދީގެން އެކަމަށް ވިސްނައިގެން ނޫން ކަމަށާއި، ނަމަވެސް ސަރުކާރުގެ ވިސްނުމަކީ ރައްޔިތުންނަށް ލުއިފަސޭހަވާނެ ގޮތަކަށް ކަންތައް ކުރުން ކަމަށެވެ. އެގޮތުން ވީވަރަކުން ޕާކިން ސަރަހައްދުތައް ގާއިމް ކުރައްވާނެ ކަމަށް މިނިސްޓަރު ނަހުލާ ވިދާޅުވިއެވެ.
ފުލުހުން އާންމުކޮށްފައިވާގޮތުން ނުވަ ސަރަހައްދެއްގައި ޕާކު ކުރާނަމަ ސްޓިކާ ޖަހާނެ އެވެ.
އެ ސަރަހައްދުތަކަކީ:
މިސްކިތްތައް ކައިރިކަފިހި ހުރަސް/ ދުވާރުމަގު/ ގޯޅި ތަކުގެ ކަންމަތިސްކޫލުތައް ކައިރިހޮސްޕިޓަލުތައް ކައިރިބޭންކުތައް ކައިރިބޮޑުތަކުރުފާނުމަގުގެ ތާރު އެޅި ސަރަހައްދުފުލުހުންގެ ކޯނު/ ބެރިކޭޑް ބަހައްޓާފައިވާ ސަރަހައްދުޑަބަލް ލައިން ދަމާފައިވާ ސަރަހައްދު
ޓްރެފިކް ފުލުހުން ވެހިކަލްތަކުގައި ސްޓިކާ ޖަހަނީ ރައްޔިތުންނަށް އުނދަގޫވާގޮތަށް، ގަވައިދާ ހިލާފަށް ޕާކު ކޮށްފައި ހުންނަ އުޅަނދުތަކުގައި ހުންނަ އުޅަނދުތަކުގައި ކަން މިނިސްޓަރު ތަކުރާރުކޮށް ފާހަގަކުރެއްވިއެވެ.
ޕާކިން އަށް ހައްލު ހޯދުމަށް ތިން ޕާކިން ބިލްޑިން އެއް އެޅުމަށް ބަޖެޓުކޮށްފައިވާކަން ފާހަގަކުރައްވާ މިނިސްޓަރު ވިދާޅުވީ އެ ތިން ބިލްޑިން އާއެކު މާލޭގެ ޓްރެފިކަށް އަދި ޕާކިން މައްސަލައަށް އެދެވޭ ބަދަލެއް އަންނާނެކަމަށެވެ.