ކުރީގެ ނައިބު ރައީސް އަހްމަދު އަދީބު އަބްދުލް ޣަފޫރު ފިލަން މަސައްކަތް ކުރި "ވާގޯ 9" ޓަގް ބޯޓުގެ މައްސަލަ އެއް ބަލަމުންދާ ކަމަށް ފުލުހުން ބުނެފި އެވެ.
އަދީބު ޓަގު ބޯޓުގައި ފިލަން މަސައްކަތް ކުރަނިކޮށް އިންޑިއާގެ ޓުޓިކޮރިން އިން އަތުލައިގަތީ މިދިޔަ ބުރާސްފަތި ދުވަހުއެވެ. އިންޑިއާއިން މިދިޔަ ހޮނިހިރު ދުވަހު އަދީބު އަނބުރާ ރާއްޖެ ފޮނުވާލި އިރު، އެ ޓަގު ބޯޓުވެސް ސަލާމަތީ ބާރުތަކާ ހަވާލު ކުރިއެވެ.
ދިވެހި ފުލުހުން މިރޭ ބުނީ،"ވާގޯ9" ޓަގު ބޯޓާ ގުޅިގެން ފުލުހުން ހިންގާ ތަހުގީގުގެ ބޭނުމަށް އެ ބޯޓު ރާއްޖެ އައުމުން ހިފެހެއްޓުމަށް މޯލްޑިވްސް ކަސްޓަމްސް އަށް ދަންނަވާފައިވާ ކަމަށެެވެ. ފުލުހުން ޓަގު ބޯޓުގެ މައްސަލައެއް ބަލަމުންދާކަމަށް ވިދާޅުވި ނަމަވެސް ފުލުހުން ބަލަމުންދަނީ ކޮން މައްސަލައެއް ކަމެއް ވިދާޅެއް ނުވެއެވެ.
"[ޓަގު ބޯޓު]މި މައްސަލައާ ގުޅިގެން އެއްވެސް މީހަކު މިހާތަނަށް ހައްޔަރުކޮށްފައި ނުވޭ،" ފުލުހުން ބުންޏެވެ.
އަދީބު އިންޑިއާގެ ޓުޓިކޮރިން އިން އަތުލައިގަތް އިރު، ޓަގު ބޯޓުގައި އިތުރު ނުވަ މީހުން ތިބި ކަމަށް އިންޑިއާގެ ނޫސްތަކުން ވަނީ ރިޕޯޓުކޮށްފައެވެ. އެއީ އިންޑިއާގެ އެއް ފަޅުވެރިއަކާއި އިންޑޮނޭޝިޔާގެ އަށް މީހެކެވެ. އަދީބު ބޯޓުގައި ހުރިކަން ފަޅާ އަރުވާލީ އެ ބޯޓުގައި ހުރި ފަޅުވެރިޔެއް ކަމަށް ވެސް ނޫސްތަކުގައި ވަނީ ރިޕޯޓުކޮށްފައެވެ. ބޯޓުން ދަތުރު ކުރި އިންޑިއާ މީހާޔާ ހަވާލާދީ ނޫސްތަކުގައި ބުނާ ގޮތުން އަދީބު އެ ޓަގް ބޯޓަށް އެރީ، ބޭސްފަރުވާ ފުރިހަމަ ކުރަން އަނބުރާ އިންޑިއާޔަށް ދަނީ ކަމަށް ބުނެ އެވެ.
ޓަގު ބޯޓަކީ ސިންގަޕޫރުގެ ޓަގު ބޯޓެއް ކަމަށް ވެއެވެ. ނަމަވެސް އަދީބުގެ ބަންދުގެ މަޖިލީހުގައި ފުލުހުން ބުނެފައި ވަނީ ރާއްޖޭގެ ކަނޑުގެ ސަރަހައްދުން ބޭރުން އަދީބު ހައްޔަރު ކުރި އިރު އެ ބޯޓުގައި ނަގައިފައިވަނީ އިންޑިއާގެ ދިދައެއް ކަމަށެވެ.