ފީލީ އޭނާ އެކަނި ނޫން ކަމަށް ބުނެ، ފިލި އެހެން މީހުންގެ މައްސަލަތައްވެސް ބަލަން ޖެހޭ ކަމަށް ކުރީގެ ނައިބު ރައީސް އަހްމަދު އަދީބު އަބްދުލް ގަފޫރު ވިދާޅުވެއެޖެ އެވެ.
ޕާސްޕޯޓު ހިފަހައްޓާފައި ވަނިކޮށް ފިލަން މަސައްކަތް ކުރި އަދީބު ރާއްޖޭގެ ކަނޑުގެ ސަރަހައްދުން ބޭރުން ހައްޔަރުކޮށްފައިވަނީ ގާނޫނާ ހިލާފަށް ކަނޑައަޅާ ރޭ ދަންވަރު ކްރިމިނަލް ކޯޓުން އޭނާ މިނިވަން ކުރިއެވެ. ނަމަވެސް އެނެއްކާ ވެސް މިއަދު ހެނދުނު ކޯޓު އަމުރަކާއެކު ފުލުހުން އޭނާ ހައްޔަރު ކުރިއެވެ.
ބަންދާމެދު ގޮތެއް ކަނޑައެޅުމަށް މިއަދު ހަވީރު 4:30 ގައި ކްރިމިނަލް ކޯޓަށް ހާޒިރުކުރުމުން އަދީބު ވިދާޅުވީ، އޭނާ ފިއްލެވީ އޭނާގެ ފުރާނައަށް ނުރައްކާވުމުގެ ސަބަބުން ކަމަށެވެ. އަދި ފުރާނައަށް ނުރައްކާވީ، ދައުލަތާއެކު ވެފައިވާ އެއްބަސްވުމެއްގެ ދަށުން ހިޔާނާތާ ގުޅޭ ބާރުވެރި ފަރާތްތަކުގެ މައުލޫމަތު ހިއްސާ ކުރެއްވުމުން ކަމަށް އަދީބު ވިދާޅުވިއެވެ.
ފިއްލަވަން މައްސަކަތް ކުރެއްވުމަށްފަހު އަދީބު ވަނީ، އޭނާގެ ބައިނަލްއަގުވާމީ ވަކީލުން މެދުވެރިކޮށް އިންޑިއާގެ ސިޔާސީ ހިމާޔަތައް އެދިވަޑައިގެންފައެވެ. ނަމަވެސް ހިމާޔަތް ނުދޭން ނިންމާ އިންޑިއާއިން އޭނާ އަނބުރާ ރާއްޖެ ފޮނުވާލިއެވެ. އަދީބު ފިލި މައްސަލައިގައި ހެއްކާ ގަރީނާ ހޯދުމަށް ފުލުހުން އޭނާގެ ދިރިއުޅުއްވާ ގ. ހުމަށި، 10 ވަނަ ފަންގިފިލާގައި ހުންނަ އޭނާގެ އެޕާޓްމަންޓް ބަލާ ފާސް ކުރިއެވެ.
"ސިޔާސީ ހިމާޔަތް ހޯއްދެވީ އަޅުގަނޑު އެކަންޏެއް ނޫން. އަޅުގަނޑު މައްސަލަ ބަލާ ނަމަ އެ މައްސަލަތައް ވެސް ބަލަން ޖެހޭ،" އަދީބު ވިދާޅުވިއެެވެ.
އަދީބު އެ ގޮތަށް ވިދާޅުވި ނަމަވެސް އޭނާ ފިއްލެވި މައްސަލަ ފުލުހުން ބަލަމުންދާ ކަމެއް އަދި ކަށަވެރެއް ނޫންނެވެ. ފުލުހުން މީގެ ކުރިން ބުނެފައިވަނީ އޭނާ ފިލުމަށް އެހީތެރިވި ފަރާތްތަކާ މެދު ފިޔަވަޅު އަޅާނެ ކަމަށެވެ. އޭނާ ފިލުމާ ގުޅޭ ފުލުހުން އަދި މާބޮޑު ތަފްސީލެއް މިހާތަނަށް ރަސްމީކޮށް ހާމަކޮށްފައި ނުވެއެވެ.
މިއަދު ހަވީރު ބޭއްވި ބަންދުގެ މަޖިލީހަށް އެސިސްޓެންޓް ކޮމިޝަނާ އޮފް ޕޮލިސް މުހައްމަދު ރިޔާޒުވެސް ވަޑައިގެންނެވިވެވެ. ބަންދުގެ މަޖިލީހުގައި ވާހަކަ ދައްކަވަމުން ރިޔާޒު ވިދާޅުވީ، އަދީބު ފިލުމުގެ ކުރިން އޭނާގެ ފުރާނައަށް ނުރައްކާވެފައިވާ ކަމުގެ އެއްވެސް މައުލޫމާތެއް އޭނާ ފުލުހުންނާ ހިއްސާ ކުރައްވާފައި ނުވާ ކަމަށެވެ. ބިރުދައްކައި އިންޒާރު ދިނުމަކީ ގާނޫނީ ކުށަކަށްވެފައި އެ މައްސަލަ ފުލުހުންނަށް ހުށަނާޅާ ކަމަށް ރިޔާޒު ވިދާޅުވިއެވެ.
"ފިލުމުގެ ކުރިން ތްރެޓެއް އައި ކަމަށް އަދީބު އަންގާފައެއް ނުވޭ. ނަމަވެސް ރޭ އަދީބު މާލެ ގެނެއުމުން ޖުމްލަކޮށް އަދީބަށް ޓްރެޓް އައި ކަމަށް އޭނާ ވިދާޅުވި،" އެސިސްޓެންޓް ކޮމިޝަނާ އޮފް ޕޮލިސް ރިޔާޒު ވިދާޅުވިއެވެ.
އެސިސްޓެންޓް ކޮމިޝަނާ އޮފް ޕޮލިސް ރިޔާޒު އަދީބުގެ އަރިހުގައި: ރިޔާޒު ވިދާޅުވީ އަދީބަށް ނުރައްކާ އޮތް ކަމަށް އަދީބު ފިލުމުގެ ކުރިން އަންގާފައި ނުވާކަމަށް -- ސަން ފޮޓޯ/ އަހުމަދު އައުޝަން އިލްޔާސް
ރިޔާޒު ވިދާޅުވީ، އަދީބުގެ ފުރާނައަށް ނުރައްކާ އޮތް ކަމަށް އޭނާ ހައްޔަރަށްފަހު، ފުލުހުންނަށް އެވާހަކަ ކިޔައިދިން ނަމަވެސް އެކަމާ ގުޅޭ މާބޮޑު ތަފްސީލެއް ހާމަ ނުކުރައްވާ ކަމަށެވެ.
ފީލީ އޭނާ އެކަނި ނޫން ކަމަށް ބުނެ، ފިލި އެހެން މީހުންގެ މައްސަލަތައްވެސް ބަލަން ޖެހޭ ކަމަށް އަދީބު މިއަދު ވިދާޅުވިއިރު، މިދިޔަ ފަސް އަހަރު ސިޔާސީ އެކި ފަރާތްތައް ވަނީ ފިއްލަވައިގެން ބޭރު ގައުމުތަކުން ސިޔާސީ ހިމާޔަތް ހޯއްދަވާފައިވެއެވެ. އޭގެ ތެރޭގައި ކުރީގެ ރައީސް އަދި މިހާރު މަޖިލިސް ރައީސް، ރައީސް މުހައްމަދު ނަޝީދާއި ކުރީގެ ނައިބު ރައީސް ޑރ. ޖަމީލް އަހްމަދު އަދި ޖުމްހޫރީ ޕާޓީގެ ލީޑަރު، މާމިގިލީ ދާއިރާ މެމްބަރު ގާސިމް އިބްރާހީމް ވެސް ހިމެނިވަޑައިގަންނަވައެެވެ. އޭގެ އިތުރުން އިތުރު އެހެން ސިޔާސީ މީހުންވެސް ހިމެނެވެ. ސިޔާސީ ހިމާޔަތް ހޯއްދެވި ބައެއް މީހުންނަށް އޭރު ޖަލު ހުކުމަތަކެއްވެސް ވަނީ އައިސްފައެވެ.
އަދީބު މިއަދު ހެނދުނު ހައްޔަރު ކޮށްފައިވަނީ، އޭނާގެ މައްޗަށް ތުހުމަތު ކުރެވޭ އެމްއެމްޕީއާރުސީގެ ހިޔާނާތުގެ މައްސަލައިގައި ކަމަށް ބަންދުގެ މަޖިލީހުގައި ފުލުހުން ވަނީ ބުނެފައެވެ. އަދި އޭނާގެ މައްޗަށް އިންތިޒާމްވެގެން ހިންގާފައިވާ ސިރިޔަސް ތުހުމަތުތަކެއް ކުރެވި އެމައްސަލަތައް ތަހުގީގު ކުރަމުންދާކަމަށް ވެސް ފުލުހުން ބުންޏެވެ.
ބަންދުގެ މަޖިލީގައި ދެ ފަރާތުގެ ވާހަކަތައް އަޑުއެހުމަށްފަހު، މައްސަލަ ބައްލަވާ ގަޒީ އަލީ ރަޝީދު ނިންމެވީ، އަދީބަށް ހެއްކަށް ނުފޫޒު ފޮރުވާނެ ކަމަށް ބެލެވޭތީއާއި ޕާސްޕޯޓު ހިފަހައްޓާފައިވަނިކޮށް އޭނާ ފިލުމުން ދެންވެސް އޭނާ ފިލާފާނެ ކަމުގެ އިހްތިމާލެއް އޮތުމުން އޭނާގެ ބަންދަށް 15 ދުވަސް ޖެހުމަށެވެ.
ބަންދުގެ މަޖިލީހަށްފަހު، އަދީބު ދޫނިދޫއަށް ގެންދަނީ: ކްރިމިނަލް ކޯޓުން ވަނީ 15 ދުވަސް އޭނާގެ ބަންދަށް ޖަހާފައި -- ސަން ފޮޓޯ/ އަހުމަދު އައުޝަން އިލްޔާސް
ޖިނާއީ އިޖުރާތުގެ ގާނޫނުގައި ދަށުން ދެން ވެސް ފިލާފާނެ ކަމުގެ އިހްތިމާލު އޮތް ކަމަށް ގަބޫލު ކުރައްވާކަން އަދީބުގެ ދިފާއީ ވަކީލުވެސް ފާހަގަ ކުރައްވާފައިވާތީވެ، އެއީ ޖިނާއީ އިޖުރާތުގެ ގާނޫނުގެ 166 ވަނަ މާއްދާގެ ދަށުން ކުއްވެރިޔަކު ބަންދުކުރަން ޖެހޭ ހަތަރު ހާލަތުން ކުރެ ހާލަތެއް ކަން ގާޒީ ފާހަގަކުރެއްވި އެވެ.
ތިން މައްސަލައެއްގައި އަދީބުގެ މައްޗަށް ޖުމްލަ 33 އަހަރުގެ ޖަލު ހުކުމް ކުރި އެވެ. ނަމަވެސް ފަހުން ކޯޓުތަކުން އެ ހުކުމްތައް ވަނީ ބާތިލްކޮށްފަ އެވެ.
މިހާރު ކޯޓުގައި އޮތީ އަދީބާ ގުޅޭ އެންމެ މައްސަލައެކެވެ. އެއީ ޅ. މާބިންހުރާގައި ޓޫރިސްޓް ރިސޯޓެއް ތަރައްގީ ކުރުމަށް ކުއްޔަށްދިން ކުރެއްދޫ ހޯލްޑިންގްސް އިން އެމްއެމްޕީއާރްސީއަށް ދިން އެއް މިލިއަން ޑޮލަރަށް ހިޔާނާތްތެރިވި މައްސަލާގައި އަދީބަށް އިއްވި އަށް އަހަރުގެ ޖަލު ހުކުމް ބާތިލު ކުރި މައްސަލަ ދައުލަތުން އިސްތިއުނާފު ކޮށްފައިވާ މައްސަލައެ އެވެ. އިސްތިއުނާފީ މައްސަލާގައި ގޮތެއް ކަނޑައަޅަން ދެން ޖޫން، 24 ވަނަ ދުވަހު ސުޕްރީމް ކޯޓުން އޭނާގެ ޕާސްޕޯޓު ހިފެހެއްޓި އެވެ.
އެ މައްސަލައިގެ އަަޑުއެހުމަށް މާދަމާ ހެނދުނު 10:30 އަށް ވަނީ ތާވަލުކޮށްފައެވެ.