ކިންޝާސާ (ޖުލައި 23): ޑިމޮކްރެޓިކް ރިޕަބްލިކް އޮފް ކޮންގޯގައި އެބޯލާ ފެތުރުން ހުއްޓުވުމަށް އެކުލަވާލާފައިވާ ރެސްޕޮންސް ޓީމުން އެ ގައުމުގެ ހެލްތު މިނިސްޓަރު ވަކި ކުރުމުން އޭނާ މަގާމުން އިސްތިއުފާ ދެއްވައިފި އެވެ.
މިނިސްޓަރު އޮލީ އިލުންގާ ކަލެންގާ ވިދާޅުވި ގޮތުގައި އޭނާ އިސްތިއުފާ ދެއްވަނީ އެބޯލާ ފެތުރުމާ ބެހޭ ކަންތައްތައް ސީދާ ރައީސްގެ ބެއްލެވުމުގެ ދަށަށް ގެންދެވުމުންނެވެ.
މިދިޔަ ހޮނިހިރު ދުވަހު ކޮންގޯގެ ރައީސް ފީލިކްސް ޝައިސްކެޑީ ވަނީ އެބޯލާ ރެސްޕޮންސް ޓީމުގައި އިސްކޮށް ހުންނެވި އިލުންގާ އެޓީމުން ވަކިކޮށް، އޭނާގެ މަގާމަށް ހާއްސަ ކޮމިޓީއެއް އައްޔަން ކުރައްވައިފަ އެވެ. އަދި އެކޮމިޓީގެ ކަންތައްތައް ބައްލަވާނީ ރައީސް ކަމަށް ވިދާޅުވެފަ އެވެ.
"އެބޯލާ ފެތުރުމުގެ މައްސަލަ ރައީސް އަމިއްލަފުޅަށް ބައްލަވަން ނިންމެވުމުން، އަޅުގަނޑު ވަނީ އިއްޔެ ހެލްތު މިނިސްޓަރު ކަމުން އިސްތިއުފާ ދީފައި،" އިލުންގާ ވިދާޅުވި އެވެ.
އަދި އެއީ އެއް މައްސަލައަކާ ބެހޭ ގޮތުން އެކި ފަރާތްތަކުން ގޮތް ނިންމަންވެއްޖެ ނަމަ އޮޅުން އަރާނެތީ ކަމަށް އިލުންގާ ވިދާޅުވި އެވެ.
މީގެ އިތުރުން އިލުންގާ ވަނީ ފާއިތުވި މަސްތަކުގައި ރައީސްގެ ކޮމިޓީން އޭނާގެ ޒިންމާތަކަށް ހުރަސް އެޅި ކަމަށް ތުހުމަތު ކުރައްވައިފަ އެވެ. އަދި ބައެއް ބޭރުގެ ފަރާތްތަކުން ދަނީ އެގައުމުގައި އެބޯލާއަށް އާ ވެކްސިންއެއް ބޭނުން ކުރުމަށް ޕްރެޝަރު ކުރަމުން ކަމަށް ވިދާޅުވެ، އެފަރާތްތަކަށް ފާޑު ވިދާޅުވެފަ އެވެ.
އެ "ބޭރުގެ ފަރާތްތަކަކީ" ކޮން ބަޔެއްކަން އިލުންގާ ހާމަ ނުކުރެއްވި ނަމަވެސް މީގެ ކުރިން ވޯލްޑް ހެލްތު އޯގަނައިޒޭޝަން (ޑަބްލިއުއެޗްއޯ) އާއި ޑޮކްޓާސް ވިތައުޓް ބޯޑާސްއިން ވަނީ ދެވަނަ ވެކްސިންއެއް ބޭނުން ކުރުމަށް ގޮވާލައިފަ އެވެ. އަދި އެވެކްސިން އުފެއްދި ޖޯންސަން އެންޑް ޖޯންސަން ކުންފުނިން އެއީ ބޭނުން ކުރުން ރައްކާތެރި ވެކްސިނެއް ކަމަށް ބުނެފަ އެވެ.
މިދިޔަ ހަފްތާގައި ޑަބްލިއުއެޗްއޯއިން ވަނީ އެބޯލާ ފެތުރެމުން ދިޔުމަކީ ބައިނަލްއަގުވާމީ ގޮތުން ކަންބޮޑުވުން އޮތް ސިއްހީ އެމާޖެންސީއެއް ކަމަށް ކަނޑައަޅާފަ އެވެ.
މިދިޔަ އަހަރުގެ އޮގަސްޓު މަހު ކޮންގޯގައި ފެތުރެން ފެށި އެބޯލާ ވައިރަސް އެގައުމުގެ 2،500 މީހަކަށް ޖެހި، 1،700 އަށް ވުރެ ގިނަ މީހުން ވަނީ މަރުވެފަ އެވެ.