ތިން އަތޮޅަކަށް ދޭ ފެރީގެ ހިދުމަތް ހުއްޓާލައިފިއެވެ.
ފެރީ ހިދުމަތް ހުއްޓާލި ތިން އަތޮޅަކީ ދ، ފ އަދި މ އަތޮޅުގެ ފެރީގެ ހިދުމަތެވެ. އެ ތިން އަތޮޅަށް ފެރީގެ ހިދުމަތްދެނީ ވާމިލިއަން ކުންފުނިންނެވެ.
އެ ކައުންސިލްތަކުން "ސަން" އާ ވާހަކަ ދައްކަމުން ބުނީ ފެރީގެ ހިދުމަތް މެދުކަނޑާލައިވާ އޮންނަތާ ދުވަސްކޮޅެއް ވެއްޖެކަމަށާއި އެކަމުގެ ސަބަބުން ރައްޔިތުން ބޮޑެތި ތަކުލީފުތަކެއް އުފުލަމުންދާ ކަމަށެވެ.
"ލިބި ލިބި ހުރި ހިދުމަތެއް ހުއްޓުމުން ވަރަށް އުނދަގޫވާނެ. ރަސްމީކޮށް އެއްވެސް ފަރާތަކުން އެއްވެސް އެއްޗެއް ނާންގާ. އެކަމަކު ޓްރާންސްޕޯޓްގެ ސްޓޭޓް މިނިސްޓަރު އަހްމަދު އާދިލް މިއަދު ގުޅުއްވާފައި ބުނުއްވި އެ ހިދުމަތް އަލުން ފެށޭތޯ މަސައްކަތްކުރައްވަމުން އަންނަ ވާހަކަ. އެމްޓީސީސީ މެދުވެރިކޮށް،" ކައުންސިލްގެ މެންބަރަކު ވިދާޅުވި އެވެ.
އެ ކުންފުނިން ފެރީގެ ހިދުމަތް ދިނުމުގެ ބަދަލެއްގެ ގޮތުން، ރިސޯޓް ހެދުމަށް ދެ ރަށް ވަނީ އެ ކުންފުންޏަށް ދީފަ އެވެ. އެ ދެ ރިސޯޓް މިހާރުވެސް ހިންގަމުން އަންނަ ކަމަށްވެސް އޭނާ ވިދާޅުވި އެވެ.
ފ އަތޮޅުގެ ކައުންސިލްގެ ރައީސް އުމަރު ޒާހިރު ވިދާޅުވީ އެކަމާގުޅިގެން އެއްވެސް ފަރާތަކުން އެއްވެސް ކަމެއް އަންގާފައިނުވާ ކަމަށެވެ. އަދި އެ ހިދުމަތް ހުއްޓިގެން އުޅޭ ސަބަބު އޮޅުން ފިލުވުމަށް ކައުންސިލުން މިހާރު ސިޓީ އެއް ފޮނުވާފައިވާ ކަމަށްވެސް ވިދާޅުވި އެވެ.
ފެރީގެ ނިޒާމެއް ތަރައްގީ ކުރުމަށް މި ސަރުކާރުން ދަނީ މިހާރު މަސައްކަތް ކުރަމުން އެވެ.