އަތޮޅު ކައުންސިލެއްގެ ރައީސަކަށް ފުރަތަމަ ފަހަރަށް އަންހެނަކު އިންތިޚާބުކުރި އަތޮޅަކަށް, ފ. އަތޮޅުވެއްޖެއެވެ.
ފ. އަތޮޅު ކައުންސިލްގެ ރައީސް އިންތިޚާބު ކުރުމަށް މިއަދު ބޭއްވި ބައި-އިލެކްޝަންގައި ވާދަކުރެއްވީ ވެރިކަން ކުރާ ޕީއެންސީގެ ފަރާތުން, ފ. ނިލަންދޫ، ފޮނިލުނބޯގެ، ހައްވާ އަބްދުލްއަޒީޒާއި އިދިކޮޅު އެމްޑީޕީގެ ފަރާތުން, ފ. ނިލަންދޫ، އަޒުމް، އިބްރާހީމް ޚަލީލެވެ.
އިލެކްޝަންސް ކޮމިޝަން (އީސީ)އިން އާންމުކޮށްފައިވާ ވަގުތީ ނަތީޖާއިން ދައްކާ ގޮތުގައި، އެ އިންތިޚާބުގައި 1،881 މީހުން ވޯޓުލިއިރު އޭގެ ތެރެއިން 941 މީހުން ވޯޓުދިނީ ހައްވައަށެވެ. ޚަލީލަށް ލިބުނީ 888 ވޯޓެވެ.
އެ އިންތިޚާބުގައި 52 މީހަކު ބާތިލު ވޯޓުލިއެވެ.
މިއަދު އިތުރު ދެ ބައި-އިލެކްޝަނެއް ވެސް ބޭއްވިއެވެ. އެއީ ވ. ފެލިދޫ ކައުންސިލް ރައީސާއި ރ. ރަސްގެތީމު އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެންބަރަކު އިންތިޚާބު ކުުރުމަށެވެ.
އޭގެ ތެރެއިން ފެލިދޫ ކައުންސިލްގެ ރައީސްކަމަށް ވާދަކުރީ ޕީއެންސީން، އެ ރަށު، ލަކީސްޓާ، ހުސައިން ވިސާމާއި އަމިއްލަ ގޮތުން މާލެ، ވ. މަންހަލް، އަބްދުއްޝަކޫރު އިބްރާހީމެވެ. އެ އިންތިޚާބުގައި ބައިވެރިވި 486 މީހުންގެ ތެރެއިން 200 ވޯޓާއެކު އިންތިޚާބު ކާމިޔާބުކުރީ ވިސާމެވެ. އޭނާއާ ވާދަކުރި ޝަކޫރަށް ލިބުނީ 106 ވޯޓެވެ.
ރަސްގެތީމު އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ ބައި-އިލެކްޝަން ކާމިޔާބު ކުރީ، އެމްޑީޕީގެ ކެންޑިޑޭޓް އެ ރަށު، ކުދިރަތްމާގެ، ޙައްވާ އަލީއެވެ. އޭނާއާ ވާދަކުރި ކޮންގްރެސް ޕާޓީގެ ކެންޑިޑޭޓް، އެ ރަށު ފަރުދާވިލާ، މަރްޔަމް ސުހާއަށް ލިބުނީ 86 ވޯޓެވެ.