ކޮރަޕްޝަނާ ގުޅޭ މައްސަލަތައް ހުށަހެޅުމަށް ރައީސުލްޖުމްހޫރިއްޔާގެ އޮފީހުން ގާއިމުކުރި އޮންލައިން ޕޯޓަލްއަށް މިހާތަނަށް 400 އެތައް މައްސަލައެއް ލިބިފައިވާ ކަމަށް ރައީސުލްޖުމްހޫރިއްޔާގެ އޮފީހުން ބުނެފިއެވެ.
ރައީސުލްޖުމްހޫރިއްޔާގެ "ޒީރޯ ޓިލަރަންސް ޓު ކޮރަޕްޝަން" ސިޔާސަތުގެ ދަށުން، ރައީސް އޮފީހުން ލޯންޗުކުރީ މި އަހަރުގެ ފެބްރުއަރީ މަހުގެ 12 ވަނަ ދުވަހުއެވެ. އެ ދުވަހު ރައީސް އޮފީހުން ވަނީ ސަރުކާރުގެ އިދާރާތަކުގައި ހުރި ކޮރަޕްޝަނަށް ތުހުމަތުވާ ކަންކަން ކާކުކަން ނޭނގޭ ގޮތަށް ހުށަހެޅޭނެ ޕޯޓަލްއެއް ތައާރަފުކޮށްފައެވެ
ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި އެ އޮފީހުގެ ތަރުޖަމާނު އިބްރާހިމް ހޫދު ވިދާޅުވީ ވިސްލްބްލޯވާ ޕޯޓަލްއަށް މިހާތަނަށް 400 އެއްހާ މައްސަލަ ލިބިފައިވާ ކަމަށެވެ.
އަދި އޭގެ ތެރެއިން ސުވާލު އުފެދޭ 18 މައްސަލައެއް އޭސީސީއަށް ފޮނުވާފައިވާ ކަމަށް ހޫދު ވިދާޅުވިއެވެ.
"މިހާތަނަށް އެބަ އޮތް 400 އެތައް މައްސަލައެއް ލިބިފައި. އޭގެ ތެރެއިން ސުވާލު އުފެދޭ 18 މައްސަލައެއް މިހާރު ވާނީ އޭސީސީއަށް ފޮނުވާފައި، އެކަންކަން އިތުރަށް ބަލައި ތަހުގީގުކުރުމަށް އެދިފައި،" ހޫދު ވިދާޅުވިއެވެ.
ހޫދު ވިދާޅުވީ ޕޯޓަލްއަށް ލިބޭ މައްސަލަތައް ބަލަނީ އެކި މައްސަލަތަކުގައި ރައީސުލްޖުމްހޫރިއްޔާއަށް ލަފާ އަރުވަން އެކުލަވަލާފައިވާ ޕްރެޒިޑެންޓް އެކްޝަން ކޮމިޓީން ކަމަށެވެ.
ހޫދު ވިދާޅުވި ގޮތުގައި، ޕޯޓަލް މެދުވެރިކޮށް ހުށަހެޅި 400 މައްސަލައިގެ ތެރޭގައި ކުދި ޝަކުވާ ފަދަ މައްސަލަތައްވެސް ހުށަހަޅާފައި އެބަ ހުރި ކަމަށެވެ.
"އެބޭފުޅުން ބައްލަވާފައި އޭގެ ތެރެއިން ސުވާލު އުފެދޭ މި ފެނުނީ 18 މައްސަލަ. މި 18 މައްސަލަ އިތުރަށް ބެލުމަށް އެބޭފުޅުން ފޮނުވާފައި ވަނީ. ބާކީ ހުރި ކަންކަމަކީ އޭގައި އެހާ ސަބްސްޓެންސް ނެތް ކަންކަމަށް ބެލެވޭތީ އެކަންކަން ވަނީ ދޫކުރެވިފައި،" ހޫދު ވިދާޅުވިއެވެ.