މިދިޔަ ދެ އަހަރެއްހާ ދުވަހުގެ ތެރޭގައި ބްރޮޑްކާސްޓިން ކޮމިޝަނުން ރީ-ބްރޮޑްކާސްޓަރުންނަށް ކޮށްފައިވާ ޖޫރިމަނާތައް މައާފްކޮށް ދިނުމާ މެދު އެޓާނީ ޖެނެރަލްގެ ލަފަޔަކަށް އެ ކޮމިޝަނުން އެދިއްޖެ އެވެ.
އެ ކޮމިޝަނުން މިއަދު ބުނީ މިދިޔަ ދެ އަހަރު ދުވަހުގެ ތެރޭގައި ކޮމިޝަނަށް ހުށަހެޅުނު، ލައިސަންސް ނެތި އަދި ޤަވާއިދާ ހިލާފަށް ރީ-ބްރޯޑްކާސްޓް ކުރުމާ ގުޅޭ މައްސަލަތައް ބެލުމަށް ފަހު، 29 ފަރާތެއް ޖޫރިމަނާ ކުރި ނަމަވެސް އެ ފައިސާ ނުދައްކާ 15 ފަރާތެއް އަދިވެސް އެބަ ހުރި ކަމަށެވެ.
އެ ފަރާތްތަކަށް އެ ފައިސާ ނުދެއްކި ވަނީ، އެ ފަރާތްތަކަކީ ރަށްރަށުގައި ކުދި ވިޔަފާރި ކުރާފަރާތްތަކެއް ކަމަށްވާތީ އާއި އެ ކުންފުނިތަކުގެ މާލީ ހާލަތު ހުރި ގޮތުން ކަމަށް ބުނެ ޝަކުވާ ހުށަހަޅަމުން އަންނަ ކަމަށް ވެސް ބްރޮޑްކޮމް އިން ބުންޏެވެ. އަދި ބުނީ، އެ ފަރާތްތަކުން ވެސް އެދިފައި ވަނީ ޖޫރިމަނާ މާފުކޮށް ދިނުން ނުވަތަ ފަސްކޮށް ދިނުމަށް ކަމަށް ވެސް ކޮމިޝަނުން ބުންޏެވެ.
އެހެން ކަމުން ކޮމިޝަނުން ބޭނުން ވަނީ ޖޫރިމަނާ ފައިސާ މާފުކޮށްދޭން ކަމަށް ވާތީ، އެކަމުގައި މިހާރު ވަނީ އޭޖީގެ ލަފަޔަކަށް އެދިފަ އެވެ.